ទួរគី៖ ក្រុមអ្នកសង្គ្រោះនៅតែបន្តទាញអ្នកនៅរស់រានមានជីវិតកាលពីថ្ងៃពុធ ពីគំនរកម្ទេចថ្មនៃការរញ្ជួយដីដែលបានសម្លាប់មនុស្សជាង ១៥.០០០នាក់នៅក្នុងប្រទេសទួរគី និងស៊ីរី ខណៈពេលវេលានៃការសង្គ្រោះកាន់តែខើច។
រយៈពេល ២ថ្ងៃ ២យប់ចាប់តាំងពីការរញ្ជួយដីកម្រិត ៧.៨រ៉ិចទ័រ ក្រុមអ្នកស្វែងរកបានធ្វើការទាំងយប់ទាំងថ្ងៃក្នុងសីតុណ្ហភាពដ៏ត្រជាក់ ដើម្បីស្វែងរកអ្នកទាំងឡាយដែលនៅតែមានជីវិត ក្រោមគំនរកម្ទេចថ្មអគារដួលរលំរាបដល់ដីនៅម្ខាងនៃព្រំដែន។ ប្រធានអឌ្ឍចន្ទក្រហមទួរគីលោក Kerem Kinik បានព្រមានថា ពេលវេលា ៧២ម៉ោងដំបូងគឺសំខាន់ណាស់ក្នុងការស្វែងរក និងសង្គ្រោះ ប៉ុន្តែបានលើកឡើងពីភាពស្មុគស្មាញដោយសារកត្តាអាកាសធាតុអាប់អួរខ្លាំង។
ក្រុមបុគ្គលិកសង្គ្រោះបន្ទាន់កាលពីថ្ងៃពុធបានជួយសង្គ្រោះកុមារជាច្រើននាក់ ក្រោមគំនរថ្មអគារបាក់រលំនៅក្នុងខេត្ត Hatay របស់ទួរគីដែលរងគ្រោះធ្ងន់ធ្ងរបំផុត ជាទីដែលទីប្រជុំជនជាច្រើនរងការបំផ្លិចបំផ្លាញ។ ទីភ្នាក់ងារសារព័ត៌មានរដ្ឋទួរគី Anadolu បានរាយការណ៍ដោយសំអាងប្រភពពីអាជ្ញាធរគ្រប់គ្រងគ្រោះមហន្តរាយទួរគីថា អ្នកស្លាប់នៅក្នុងប្រទេសទួរគីបានកើនឡើងដល់ ១២.៣៩១នាក់ និងនៅក្នុងប្រទេសស៊ីរីមានចំនួន ២.៦៦២នាក់ពីការរញ្ជួយដីនេះ ដែលនាំឲ្យអ្នកស្លាប់សរុបកើនឡើងដល់ជាង ១៥.០០០នាក់៕ អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
