​បាល់ទាត់៖ ​ក្រុម​កំពូល​តារាង English Premier League, Manchester City បាន​គ្រង​ជើងឯក​ពានរង្វាន់ Carabao Cup បួន​រដូវ​កាល​ជាប់​គ្នា​ក្រោយ​ជ័យជំនះ​វគ្គ​ផ្តាច់ព្រ័ត្រ ១-០ លើ Tottenham Hotspur នៅ​កីឡដ្ឋាន Wembley​។

​​ការប្រកួត​វគ្គ​ផ្តាច់ព្រ័ត្រ​នេះ​មាន​អ្នកចូលរួម​ទស្សនា​ផ្ទាល់ ៨០០០នាក់ ដែល​ក្នុងនោះ​មាន​អ្នកគាំទ្រ​ក្រុម​ទាំងពីរ​ម្ខាង ២០០០នាក់ និង ៤០០០នាក់​ផ្សេងទៀត​រួមមាន​ក្រុមការងារ​គ្រូពេទ្យ និង​ប្រជាជន​ក្នុង​តំបន់​។ Manchester City ទើបតែ​បាត់បង់​ឱកាស​ឈ្នះ​ពាន ៤ ក្នុង​មួយ​រដូវ​កាល​បន្ទាប់ពី​ចាញ់ Chelsea នៅ​វគ្គ​ពាក់កណ្តាល​ផ្តាច់ព្រ័ត្រ FA Cup​។​ ​ខ្សែការពារ Manchester City, Aymeric Laporte ​គឺជា​អ្នក​តែ​ត​បញ្ចូល​ទី​គ្រាប់​បាល់​សំរេច​ជ័យជំនះ​ពី​បាល់ Freekick ​របស់ Kevin de Bruyne ៨នាទី​មុន​ចប់​ការប្រកួត​។

​​ជ័យជំនះ​នេះ​ធ្វើឲ្យ Manchester City បាន​ក្លាយជា​ជើងឯក​ពានរង្វាន់ EFL Cup រឺ Carabao Cup នេះ​លើក​ទី៨ និង ៤រដូវ​កាល​ជាប់​គ្នា​ស្មើនឹង​កំណត់ត្រា​របស់ Liverpool ដែល​ធ្វើបាន​ក្នុង​ទសវត្សរ៍​ឆ្នាំ១៩៨០​។ ​ដោយឡែក​បរាជ័យ​សំរាប់ Spurs ធ្វើអោយ​ក្រុម​ដែលមាន​មូលដ្ឋាន​នៅ​ទីក្រុង​ឡុង​ដ៍​មួយ​នេះ​ នៅតែ​ខកខាន​ឈ្នះ​ពាន​ផ្សេងៗ​រាប់​តាំងពី​ឆ្នាំ២០០៨ ហើយ Spurs ជា​ក្រុមទី២ ដែល​ចាញ់​នៅ​វគ្គ​ផ្តាច់ព្រ័ត្រ Carabao Cup នេះ ៥លើក ខណៈ Arsenal ៦លើក​៕

​អត្ថបទ​៖​នាង សុភា​វុ​ធ