​កូរ៉េខាងជើង៖ ទីភ្នាក់ងារសារព័ត៌មាន Yonhap របស់​កូរ៉េខាងត្បូង​បាន​និយាយ​ថា កូរ៉េខាងជើង​បាន​ធ្វើ​ព្យុហយាត្រា​កងទ័ព​ដ៏​ធំ​កាលពី​ថ្ងៃ​ពុធ​។ គេ​រំពឹង​ថា ​ព្យុហយាត្រា​នេះ​នឹង​បង្ហាញ​អាវុធ​ចុងក្រោយ​របស់​ប្រទេស​នេះ​ ដើម្បី​ប្រារព្ធ​ខួប​នៃ​ការ​បង្កើត​កងទ័ព​។

ក្រុម​អ្នក​វិភាគ​អន្តរជាតិ​បាន​និយាយ​ថា រូបភាព​ដែល​ទទួល​បាន​ពី​ផ្កាយរណប​ពាណិជ្ជកម្ម​រយៈពេល​ជាច្រើន​ខែ​មកនេះ បាន​បង្ហាញ​ពី​យោធា​កូរ៉េខាងជើង​កំពុង​ហាត់​សម​សម្រាប់​ព្យុហយាត្រា​ដ៏​ធំ​។ ​គិត​ត្រឹម​យប់​ថ្ងៃ​ពុធ សារព័ត៌មាន​រដ្ឋ​កូរ៉េខាងជើង​ពុំបាន​រាយការណ៍​ពី​ព្យុហយាត្រា​នេះ​ទេ​។ ព្យុហយាត្រា​យោធា​កាលពី​ ៤​លើក​កន្លងទៅ​របស់​កូរ៉េខាងជើង​បាន​កើតឡើង​នៅ​ពេល​យប់ ហើយ​សារព័ត៌មាន​រដ្ឋ​ពុំបាន​រាយការណ៍​ពី​ព្រឹត្តិការ​នោះ​ទេ​រហូតដល់​ថ្ងៃ​បន្ទាប់​។ គេ​ពុំ​បាន​ដឹង​ភ្លាមៗ​ទេ​ថា ​មេដឹកនាំ​កូរ៉េខាងជើង​លោក Kim Jong Un ត្រូវ​បាន​ធ្វើជា​អធិបតី​ក្នុង​ព្យុហយាត្រា​កាលពី​ថ្ងៃ​ពុធ​ដែរ ​ឬ​អត់​ទេ។

​ជា​ធម្មតា​ក្បួន​ព្យុហយាត្រា​បែបនេះ​តែងតែ​ប្រារព្ធ​ឡើង​នៅ​ក្នុង​ទីលាន​ចតុរង្គ Kim Il Sung កណ្ដាល​ទីក្រុង​ព្យុងយ៉ាង ហើយ​ជា​រឿយៗ​ត្រូវ​បាន​ប្រើ​ដើម្បី​បង្ហាញ​អាវុធ​ថ្មីៗ រួម​ទាំង​មីស៊ីល​បាលីស្ទីក​ដែល​ផលិត​ឡើង​ដើម្បី​បំពាក់​ក្បាល​គ្រាប់​នុយក្លេអ៊ែរ​។​ សារព័ត៌មាន​រដ្ឋ​កូរ៉េខាងជើង​បាន​រាយការណ៍​កាលពី​ថ្ងៃ​ពុធ​ថា លោក Kim បាន​អំពាវនាវ​កាលពី​ថ្ងៃ​អង្គារ​ឲ្យ​បង្កើន​អំណាច​យោធា ខណៈ​លោក​គោរព​វិញ្ញាណក្ខន្ធ​កងទ័ព និង​បាន​ជួប​ទាហាន​ដើម្បី​រម្លឹក​ខួប​នៃ​ការបង្កើត​កងទ័ព​៕

អត្ថបទ៖ សុខមាន