កំពង់ស្ពឺ៖ ឯកឧត្តម វ៉ី សំណាង អភិបាលខេត្តកំពង់ស្ពឺ បានឱ្យដឹងថា នៅទីប្រជុំជន ក្រុងច្បារមន នៃខេត្តកំពង់ស្ពឺ ប្រជាពលរដ្ឋមានទឹកស្អាតប្រើប្រាស់ចំនួន ១២,៣៧១ គ្រួសារ ស្មើនឹង ៩០,០២% ខណៈនៅទូទាំងខេត្តបច្ចុប្បន្ននៅទូទាំងខេត្តមានស្ថានីយផលិត និងផ្គត់ផ្គង់ទឹកស្អាតឯកជនសរុបចំនួន ៥២ មូលដ្ឋាន។

ឯកឧត្តម វ៉ី សំណាង អភិបាលខេត្តកំពង់ស្ពឺ ថ្លែងបញ្ជាក់បែបនេះ ក្នុងសន្និសីទសារព័ត៌មាន ស្ដីពី «ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តកំពង់ស្ពឺ» រៀបចំដោយអង្គភាពអ្នកនាំពាក្យរាជរដ្ឋាភិបាល នាថ្ងៃទី៩ ខែកុម្ភៈ ឆ្នាំ២០២៣នេះ នៅទីស្ដីការគណៈរដ្ឋមន្រ្ដី។

បច្ចុប្បន្ននៅទូទាំងខេត្តមានស្ថានីយផលិតនិងផ្គត់ផ្គង់ទឹកស្អាតឯកជនសរុបចំនួន ៥២ មូលដ្ឋាន ប្រជាពលរដ្ឋមានទឹកស្អាតប្រើប្រាស់ចំនួន ៩១.៨២៦ គ្រួសារ ស្មើនឹង ៤១,៣១%។ ដោយឡែកនៅទីប្រជុំជន ក្រុងច្បារមន ប្រជាពលរដ្ឋមានទឹកស្អាតប្រើប្រាស់ចំនួន ១២,៣៧១ គ្រួសារ ស្មើនឹង ៩០,០២%។

បើតាមឯកឧត្ដមអភិបាលខេត្ត ខេត្តកំពង់ស្ពឺចែកជា ១ ក្រុង និង ៧ ស្រុក សង្កាត់ចំនួន ៥ ឃុំចំនួន៨៣ ភូមិចំនួន ១.៣៧៩ ភូមិ។ ខេត្តមានពលរដ្ឋសរុប ២២២.២៥៧ គ្រួសារ ស្នើនឹងប្រមាណ ៩ សែននាក់ ភាគច្រើនជាប្រជាជន ចំណាកស្រុកមកពីបណ្តាខេត្តនានា។

ខេត្តក៏មាន ក្រុមហ៊ុន​ផ្គត់ផ្គង់ និងចែកចាយអគ្គិសនី (រដ្ឋ និងឯកជន) ចំនួន ២១ ក្រុមហ៊ុនបានភ្ជាប់ បណ្ដាញអគ្គិសនី ចូលដល់ភូមិចំនួន ១.៣៦៧ ភូមិ ស្មើនឹង ៩៩,១៣% ប្រជាពលរដ្ឋមានអគ្គិសនីប្រើប្រាស់ចំនួន ១៨៨.៥២៨ ស្មើនឹង ៩២,២១%៕ អត្ថបទ៖ វ៉ន ដារ៉ា