កំពង់ឆ្នាំង៖ ផ្លូវលេខ៥៣ តភ្ជាប់​ពី​សាលា​ខេត្ត​កំពង់​ឆ្នាំង រហូត​ដល់​ឃុំ​ជ្រៃ​បាក់ ស្រុក​រលាប្អៀរ ត្រូវ​បាន​ជួសជុល​ពង្រីក​ធំ​ទូលាយ និង​ដាក់​ប្រព័ន្ធ​លូ​រំដោះ​ទឹក​ភ្លៀង​ទាំង​សង​ខាង​ដើម្បី​អោយ​ប្រជាពលរដ្ឋ សិស្ស មន្ត្រីរាជការ អ្នក​ទេសចរណ៍​ធ្វើ​ដំណើរ​បាន​ស្រួល និង​រហ័ស។ ប្រជាពលរដ្ឋ​នៅ​ក្នុង​ឃុំ​ស្រែ​ថ្មី និង​ឃុំ​ជ្រៃ​បាក់ ក៏ដូចជាប្រជាពលរដ្ឋរស់នៅតាមបណ្តោយផ្លូវ១នេះ​បាន​សំដែង​ការ​ត្រេកអរ និងអរគុណដល់សម្តេចតេជោ និង​ឯកឧត្តមអភិ​បាលខេត្ត​ដែលបាន​ផ្តល់​សមិទ្ធិផល​ថ្មីនេះ។

តំណាងប្រជាពលរដ្ឋ៤រូបអោយដឹងថា៖ ពីមុនផ្លូវលេខ៥៣នេះ ពេលភ្លៀងម្តងៗ តែងតែ​មាន​ទឹកភ្លៀង​ហូរ​កាត់ ឬ​ហូរ​តាម​បណ្ដោយ​ផ្លូវ​នេះ​រហូត ដែល​នាំ​អោយ​តួ​ផ្លូវ​ត្រូវ​រង​ការ​ខូច​ខាត​យ៉ាង​ខ្លាំង​ហើយ​ទឹកភ្លៀង​មួយ​ចំនួន បាន​ហូរចាក់​ចូល​តាម​ភូមិប្រជាពលរដ្ឋនាំ​អោយទឹក​ភ្លៀង​ដក់ពាសពេញ​តែម្តង។ ដោយសារមើលឃើញនូវភាពលំបាករបស់ប្រជាពលរដ្ឋបែបនេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង​បានស្នើសុំ សម្តេចតេជោ ហ៊ុន សែន នាយករដ្ឋមន្ត្រី តាមរយៈ​ក្រសួងសាធារណការ និងដឹកជញ្ជូន ជួយជួសជុលកំណាត់ផ្លូវ១ខ្សែនេះ ។ ថ្មីៗនេះ មន្ទីរសាធារណការ ​និងដឹកជញ្ជូន បានដាក់គ្រឿងចក្រចុះជួសជុល និងជីកប្រឡាយទាំងសងខាង ដើម្បីពង្រីកតួផ្លូវអោយបានធំទូលាយ។ ក្នុងនាមប្រជាពលរដ្ឋ សូមថ្លែងអំណរគុណ​ដល់​សម្តេចតេជោ ហ៊ុន សែន និងឯកឧត្តមអភិបាលខេត្ត ក្រសួងសាធារណការ ដែលបាន​ជួយដល់​ប្រជាពលរដ្ឋបែបនេះ។

តាមការបញ្ជាក់ពីមន្ទីរសាធារណការ និងដឹកជញ្ជូនខត្តកំពង់ឆ្នាំង ផ្លូវលេខ៥៣នេះ ត្រូវបានពង្រីក និងជួសជុល ក៏ដូចជាការជីកប្រឡាយនៅអមសងខាងផ្លូវ តាមគម្រោងថែទាំខួបឆ្នាំ២០២៣ លើកំណាត់ផ្លូវជាតិលេខ៥៣​ស្ថិតក្នុងសង្កាត់ប្អេរ ក្រុងកំពង់ឆ្នាំង និង ឃុំស្រែថ្មី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ប្រវែងជាង៩គីលូម៉ែត្រ ទទឹងចាប់ពី៨មដល់១២ម ដោយក្រាលកៅស៊ូពីរស្រទាប់ប្រភេទDBST ៕ អត្ថបទ ៖ ហុង វាស្នា