ឧត្តរមានជ័យ៖ ឯកឧត្តម ប៉ែន កុសល្យ បានក្រើនរំលឹក​ដល់មន្រ្តីមន្ទីរស្ថាប័នជំនាញពាក់ព័ន្ធ ទាំងអស់​ធ្វើយ៉ាងណាត្រូវរួមសាមគ្គីគ្នាឲ្យ​បានស្អិតរមួត​ក្នុងការសហការគ្នា​ដើម្បីបង្រ្កាប​ទប់ស្កាត់​ឲ្យខានតែបានរាល់បទល្មើសឆ្លងដែននានា ធនធានធម្មជាតិ​និងល្បែងស៊ីសងជ្រកក្រោមរូបភាពផ្សេងៗ។

ថ្លែងក្នុងកិច្ចប្រជុំ​គណៈបញ្ជាការ​ឯកភាពខេត្ត នាព្រឹកថ្ងៃទី៩ កុម្ភៈ ឆ្នាំ២០២៣នេះ ឯកឧត្តមប៉ែន កុសល្យ អភិបាលខេត្តឧត្តរមានជ័យ បានបន្តថា ការទប់ស្កាត់រាល់បទល្មើសនានា និងល្បែងស៊ីសង​ជ្រកក្រោមរូបភាពផ្សេងៗនោះ គឺជាកត្ដាចាំបាច់ដ៏សំខាន់សម្រាប់អស់លោកដែលជាមន្រ្តី​ជំនាញ​ស្ថាប័នពាក់ព័ន្ធទាំងអស់ត្រូវយកចិត្តទុកដាក់គិតគូរខ្ពស់លើបញ្ហាទាំងអស់នេះ ដើម្បីឲ្យខេត្តមិនមានបទល្មើស និងល្បែងស៊ីសងនោះ។

ក្នុងនោះដែរឯកឧត្តម បានរំលឹកដល់ស្ថាប័នជំនាញទាំងអស់​ និងនៅតាមបណ្តាល​គណៈបញ្ជាការ​ក្រុងស្រុកធ្វើយ៉ាងណាត្រូវធ្វើការទប់ស្កាត់ និងពិនិត្យឲ្យ​បាន​ម៉ត់ចត់​ប្រសិនបើដែនសមត្ថកិច្ចណា​នៅតែបន្តមានបទល្មើសកើតមាននោះ អាជ្ញាធរទាំងអស់​ត្រូវមាន​ភារកិច្ចទទួលខុស​ត្រូវដោយខ្លួនឯង៕ អត្ថបទ៖ សារិទ្ធ