បាត់ដំបង៖ ឯកឧត្តម គន់ គីម ថ្លែងថា ការកសាងទីស្នាក់ សមាគមអតីតយុទ្ធជនកម្ពុជា ខេត្តបាត់ដំបង ដើម្បីជួយដល់ការដោះស្រាយបញ្ហា និងតម្រូវការចាំបាច់របស់អតីតយុទ្ធជន។

ថ្លែងនៅថ្ងៃទី៩ ​ខែកុម្ភៈ ឆ្នាំ២០២៣ ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម អគ្គលេខាធិការសមាគមអតីតយុទ្ធជនកម្ពុជា ក្នុងពិធីបញ្ចុះបឋមសិលាសាងសង់ស្នាក់ការ​សមាគម​អតីតយុទ្ធជនកម្ពុជា ខេត្តបាត់ដំបង ជាអំណោយរបស់សម្តេចតេជោ ហ៊ុន សែន ប្រធានសមាគម​អតីយុទ្ធជនកម្ពុជា តាមរយៈអ្នកឧកញ៉ាបណ្ឌិត ម៉ម វណ្ណឌី ស្ថិតក្នុងក្រុងបាត់ដំបង ខេត្តបាត់ដំបង។

នាឱកាសនោះ នាយឧត្តមសេនីយ៍ គន់ គីម បានពាំនាំយកនូវសេចក្តីនឹករឭក និង​ការ​សាកសួរ​សុខទុក្ខ ពីសម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត​ ដែលតែងតែ​យកចិត្ត​ទុកដាក់​ និងនឹក​រលឹកមកដល់អតីតយុទ្ធជនគ្រប់រូប ​គ្រប់ពេលវេលា ​ទោះបីស្ថិតក្នុង​កាលៈទេសៈណា​ក៏ដោយ។

ឯកឧត្តម គន់ គីម មានប្រសាសន៍ថា អ្វីៗដែលសមាជិកអតីតយុទ្ធជនកម្ពុជាទទួល​បានដូច​សព្វថ្ងៃនេះ គឺដោយសារកម្ពុជាមានសន្តិភាពក្រោមការដឹកនាំរបស់សម្តេចតេជោ ហ៊ុន សែន ដែលជាស្ថាបនិកសន្តិភាព។ ឯកឧត្តម ថ្លែងបន្ដថា ការផ្តល់អំណោយដី និងផ្ទះនាពេលនេះ គឺជាការឆ្លើយ ​តបចំពោះការលះបង់ និងការលំបាករបស់អតីតយុទ្ធជនដែលបាន​ពលី​ចំពោះជាតិមាតុភូមិ។

ជាមួយនឹងកសាងទីស្នាក់​សមាគម​នាពេលនេះ នាយឧត្តមសេនីយ៍កិត្តិសង្គហបណ្ឌិត គន់ គីម ថ្លែងបន្តថា ​នេះជាយន្តការមួយ បន្ថែមសម្រាប់ឲ្យថ្នាក់ដឹកនាំសមាគមអតីតយុទ្ធជនខេត្តអាច​ទទួល​ការសំណូមពរ ឬដោះស្រាយតម្រូវការចាំបាច់ ​និងសេវានានាជូន អតីតយុទ្ធជនក្នុងខេត្តរបស់ខ្លួន។

នាយឧត្តមសេនីយ៍ គន់ គីម បញ្ជាក់ថា រាជរដ្ឋាភិបាលតាមរយៈសមាគមអតីតយុទ្ធជនកម្ពុជា ពិសេសថ្នាក់ដឹកនាំ ​សមាគមគ្រប់ថ្នាក់ ត្រូវបន្តការចុះសួរសុខទុក្ខអតីតយុទ្ធជន ដើម្បីស្វែងយល់​ពី​ស្ថានភាពជីវភាព​ ដោយបន្តលើកកម្ពស់ ជីវភាព​ រស់នៅរបស់អតីតយុទ្ធជនគ្រប់រូបឱ្យ​កាន់​តែល្អប្រសើរ និងត្រូវមានវិធានការជួយពួកគាត់ពេលមានបញ្ហាឱ្យទាន់ពេលវេលា។

បន្ថែមលើសពីនេះ នាយឧត្តមសេនីយ៍ គន់ គីម ក៏បានជំរុញឱ្យថ្នាក់ដឹកនាំសមាគមគ្រប់ថ្នាក់ត្រូវ បន្ត យកចិត្តទុកដាក់ដល់អតីតយុទ្ធជន ​ដែលកំពុងរស់នៅតាមឃុំ-សង្កាត់ ​ដោយត្រូវបែងចែកភារកិច្ចគ្នា ចុះជួបសំណេះសំណាលផ្សារភ្ជាប់ទំនាក់ទំនងឱ្យ​ កាន់តែជិតស្និទជា មួយអតីតយុទ្ធជនតាម ខ្នង​ផ្ទះនីមួយៗឱ្យប្រាកដថា គ្រួសារដែលជួបការលំបាកទាំង​អស់ទទួល​បានការជួយពី សមាគម​អតីតយុទ្ធជនកម្ពុជា៕