កំពង់ស្ពឺ៖ គិតត្រឹមត្រីមាសទី១ឆ្នាំ២០២៣នេះ ការចុះបញ្ជីដីធ្លីមានលក្ខណៈជាប្រព័ន្ធនៅខេត្តកំពង់ស្ពឺ សម្រចបានជាង ១៣ម៉ឺនក្បាលដី។

មានប្រសាសន៍ក្នុងសន្និសីទសារព័ត៌មានស្តីពី៖ ភាពជោគជ័យក្នុងរយៈពេល៥ឆ្នាំ (២០១៨-២០២២) របស់រដ្ឋបាលខេត្តកំពង់ស្ពឺ ​ដែលរៀបចំដោយទីស្តីការគណៈរដ្ឋមន្ត្រី ​នាថ្ងៃទី៩ខែកុម្ភៈនេះ ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ បានថ្លែងថា ការងារចុះបញ្ជីដីធ្លីមាន​លក្ខណៈជា​ប្រព័ន្ធនៅខេត្តកំពង់ស្ពឺ ​ដោយគិតពីឆ្នាំ២០១៨​ ដល់ត្រីមាសទី១ឆ្នាំ២០២៣ បានបញ្ចូល​ទិន្នន័យ​ក្បាលដីសម្រេចបានចំនួនជាង ១៣ម៉ឺនក្បាលដី និងកំពុងបិទផ្សាយជាសាធារណៈចំនួន​ជាង ១១ម៉ឺនក្បាលដី និងបានចែកបណ្ណជូនប្រជាពលរដ្ឋបានចំនួនជាង៨ម៉ឺនបណ្ណ។

ក្នុងនោះដីរដ្ឋដែលបានចុះបញ្ជីលក្ខណៈជាប្រព័ន្ធ ​មានចំនួន ១,៣៦៨ក្បាលដី ក្នុងនោះចេញបណ្ណ​បានចំនួន ១,៣៥២ក្បាលដី និងកំពុងដំណើរការចុះបញ្ជីចំនួន១៦ក្បាលដី)។ ហើយការងារ​ចុះ​បញ្ជីដីធ្លីមានលក្ខណៈដាច់ដោយដុំសម្រេចបានចំនួនជាង១ពាន់ក្បាលដី ​ការចុះបញ្ជីដីរដ្ឋសម្រេច​បាន​ចំនួន ៩៨ក្បាលដី​ ការចុះបញ្ជីសិទ្ធិជួលអចិន្ត្រៃយ៍​បានចំនួន០៣ក្បាលដី ការចេញ​លិខិត​អនុញ្ញាត​សាងសង់ចំនួន១០១ក្បាលដី ​និងការអភិវឌ្ឍដីចំនួន៧៥ គម្រោង។

សម្រាប់ទិសដៅបន្ត រដ្ឋបាលខេត្តកំពង់ស្ពឺ ​នឹងបន្តយកចិត្តទុកដាក់ខិតខំអនុវត្តតួនាទីភារកិច្ចរបស់​ខ្លួន​ស្របតាមទិសដៅរបស់ខេត្ត ដែលបានដាក់ចេញ និងទិសដៅរបស់ក្រសួងមហាផ្ទៃឱ្យ​សម្រេច​បានលទ្ធផលជាផ្លែផ្កា​លើគ្រប់វិស័យធានាបាន នូវសន្តិសុខសណ្តាប់ធ្នាប់សាធារណៈជូន​ប្រជាពលរដ្ឋ៕ អត្ថបទ៖ទូច សោភ័ណ