ភ្នំពេញ៖ កម្ពុជា នឹងចាប់ផ្ដើមការសម្ភាសន៍ប្រមូលទិន្នន័យជំរឿនកសិកម្ម ​នៅខែមេសា ឆ្នាំ២០២៣ ខណៈដែលជំរឿនកសិកម្មនេះ ​ជាលើកទី២ ​ដែលត្រូវរៀបចំឡើងដោយប្រើប្រាស់ថវិកា​របស់​រាជរដ្ឋាភិបាលកម្ពុជា។

ក្រសួងផែនការ ក៏ដូចជាក្រសួងកសិកម្ម និងអង្គការស្បៀង ​និងកសិកម្មនៃអង្គការសហប្រជាជាតិ​ប្រចាំ​កម្ពុជា ​បានរៀបចំសិក្ខាសាលាពិភាក្សា ​ពាក់ព័ន្ធនឹងការធ្វើជំរឿនកសិកម្មលើកទីពីរនៅកម្ពុជា។ តាមកាលបរិច្ឆេទកំណត់ ជំរឿនកសិកម្មនេះ​ នឹងចាប់ផ្ដើមសម្ភាសន៍​ប្រមូលទិន្នន័យក្នុងរយៈពេល​ពេញមួយខែ ​គឺចាប់ពីថ្ងៃទី ១ខែមេសា ដល់ថ្ងៃទី៣០ខែមេសា ឆ្នាំ ២០២៣។

ជំរឿនកសិកម្មនេះ គឺមានការកំណត់សម្ភាសន៍តែអង្គភាពក្នុងវិស័យកសិកម្មប៉ុណ្ណោះ ពុំរាប់​បញ្ចូល​អង្គភាពសេដ្ឋកិច្ចក្នុងវិស័យឧស្សាហកម្ម សំណង់ ពាណិជ្ជកម្ម និងសេវាកម្មនោះទេ។

ក្នុងឱកាសបើកសិក្ខាសាលានាព្រឹកនេះ ​ឯកឧត្តម ទេសរដ្ឋមន្រ្តី ឆាយ ថន រដ្ឋមន្រ្តីក្រសួងផែនការ បាន​បញ្ជាក់ថា ការធ្វើជំរឿនកសិកម្ម ​ពិតជាមានសារៈសំខាន់មិនអាចខ្វះបាន ដើម្បីឆ្លើយតប​សេចក្តី​ត្រូវការប្រើប្រាស់ទិន្នន័យ សម្រាប់ជាធាតុចូលក្នុងការរៀបចំធ្វើគោល​នយោបាយអភិវឌ្ឍន៍​វិស័យ​កសិកម្ម សេដ្ឋកិច្ច បរិស្ថាន សង្គម ​ការប្រែប្រួលអាកាសធាតុ និងសុខុមាលភាពរបស់​ប្រជាជន​កម្ពុជា ហើយនិងជាសូចនាករយ៉ាងសំខាន់សម្រាប់ត្រួតពិនិត្យ តាមដានវាយតម្លៃលើកម្មវិធីគោល​នយោបាយអភិវឌ្ឍន៍សេដ្ឋកិច្ច សង្គមកិច្ចរបស់រាជរដ្ឋាភិបាលកម្ពុជាផែនការយុទ្ធសាស្ត្រ​អភិវឌ្ឍន៍​ជាតិ យុទ្ធសាស្ត្រនៃការលុបបំបាត់ភាពក្រីក្រ និងគោលដៅអភិវឌ្ឍន៍ប្រកបដោយចីរភាព​កម្ពុជា(CSDGs)ឆ្នាំ២០១៦-២០៣០។

ដោយសារភាពសំខាន់នៃជំរឿនកសិកម្មនេះ គឺទាមទារការអនុវត្តការងារប្រកបដោយការ​ប្រុង​ប្រយ័ត្ន និងពិនិត្យភាពច្បាស់លាស់គ្រប់ដំណាក់កាល។ នេះជាការលើកឡើងបន្ថែមរបស់​លោកជំទាវ ហង់ លីណា ប្រតិភូរាជរដ្ឋាភិបាលកម្ពុជា​ ទទួលបន្ទុកអគ្គនាយកវិទ្យាស្ថានជាតិស្ថិតិ។ លោកជំទាវ លើកឡើងថា ជាក់ស្ដែងនៅថ្ងៃនេះ គឺក្រុមការងារជំនាញពិនិត្យផ្ទៀងផ្ទាត់​លើ​កម្រងសំណួរ ដើម្បីធានាសំណួរទាំងនេះអាចប្រមូលបាននូវគ្រប់ទិន្នន័យដែលចង់បាន។

ជំរឿនកសិកម្មនៅឆ្នាំ២០២៣នេះអនុវត្តតាមវិធីសាស្ត្រ “ឃើញ រាប់ជាក់ស្ដែង (De Facto) ដោយ​មន្ត្រីសម្ភាសន៍ និងមន្ត្រីត្រួតពិនិត្យការសម្ភាសត្រូវចុះជំរឿន និងសម្ភាសន៍ដោយផ្ទាល់​ចំពោះ​សមាជិក​គ្រួសារកសិកម្ម ​និងម្ចាស់ ឬតំណាងកសិដ្ឋាននៅមូលដ្ឋានទីតាំងជាក់ស្តែងទូទាំងប្រទេស៕អត្ថបទ៖ គឹមហុក