ភ្នំពេញ៖ ឯកឧត្តមសន្តិបណ្ឌិត ម៉ៅ ច័ន្ទតារា ប្រធានក្រុមការងារទទួលខុសត្រូវដឹកនាំ និង​ជំរុញ​ការផ្តល់​អត្តសញ្ញាណបណ្ណសញ្ញាតិខ្មែរទុតិយតា ​បានថ្លែងថា បច្ចុប្បន្នកម្ពុជា កំពុងប្រឈម​នឹងការផ្ដល់សេវាអត្តសញ្ញាណបណ្ណទុតិយតា ជូនពលរដ្ឋចំណាក់ស្រុកទាំងក្នុង និងក្រៅប្រទេស ដោយមន្ត្រីជំនាញ កំពុងខិតខំដោះស្រាយលើបញ្ហានេះ ។

ក្នុងកិច្ចប្រជុំពិនិត្យសេចក្តីព្រាងរបាយការណ៍ និងវឌ្ឍនភាព នៃការផ្ដល់អត្តសញ្ញាណ បណ្ណសញ្ជាតិ​ខ្មែរទុតិយតា នៅថ្ងៃទី៩ ខែកុម្ភៈ ឆ្នាំ២០២៣ ឯកឧត្តមសន្តិបណ្ឌិត ម៉ៅ ច័ន្ទតារា បានណែនាំ​ដល់​ក្រុមការងារ ឱ្យបន្តយកចិត្តទុកដាក់បន្ថែមទៀត និងខិតខំប្រឹងប្រែងជំរុញការផ្តល់សេវា​អត្តសញ្ញាណបណ្ណ​សញ្ជាតិខ្មែរទុតិយតាឱ្យអស់លទ្ធភាព ​តាមដែលអាចធ្វើបាន ។

ឯកឧត្តមបន្តថា បច្ចុប្បន្នបញ្ហាប្រឈម នៃការផ្តល់សេវាអត្តសញ្ញាណបណ្ណសញ្ជាតិខ្មែរទុតិយតា គឺនៅតែមានបញ្ហា​ ចំពោះប្រជាពលរដ្ឋធ្វើចំណាកស្រុក ​ទាំងក្នុងប្រទេស ​និងក្រៅប្រទេស ដោយ​ក្រុមការងារជំនាញ និងមន្ត្រីពាក់ព័ន្ធសិក្សាលើបច្ចេកទេសថ្មីបន្ថែមទៀត​ ដើម្បីជាទិសដៅបន្ត ដែល​អាចឱ្យការផ្តល់សេវាអត្តសញ្ញាណបណ្ណសញ្ជាតិខ្មែរទុតិយតានេះ មានលទ្ធភាពផ្តល់ជូន​ប្រជាពលរដ្ឋ​បាននៅទូទាំងប្រទេស ​គឺសម្រាប់បង្កភាពងាយស្រួលដល់ប្រជាពលរដ្ឋ ដែលធ្វើចំណាកស្រុក ។

ឯកឧត្តម ម៉ៅ ច័ន្ទតារា បានបញ្ជាក់ថា គឺផ្តល់តែសម្រាប់អត្តសញ្ញាណបណ្ណសញ្ជាតិខ្មែរ​ទុតិយតាប៉ុណ្ណោះ ​(អស់សុពលភាព ​តែស្ថិតនៅក្នុងទិន្នន័យចាស់) ដោយឡែកសម្រាប់ការផ្តល់​អត្តសញ្ញាណ​បណ្ណសញ្ជាតិខ្មែរថ្មី ត្រូវតែធ្វើនៅតាមមូលដ្ឋានរស់នៅ របស់ប្រជាពលរដ្ឋដដែល គឺដើម្បីជៀសវាងស្ទួនទិន្នន័យ ឬពិបាកក្នុងការគ្រប់គ្រងរបស់មូលដ្ឋាននីមួយៗ ។

ឧត្តមសេនីយ៍ឯក ប្រុក ម៉ៃឧត្តម អគ្គនាយករង នៃអគ្គនាយកដ្ឋានអត្តសញ្ញាណកម្ម បានលើកឡើង​ថា ការផ្តល់អត្ដសញ្ញាណបណ្ណសញ្ជាតិខ្មែរទុតិយតា​ ចាប់ពីខែមីនា ឆ្នាំ២០២២ រហូតដល់​ត្រឹមថ្ងៃទី៣១ ខែមករា ឆ្នាំ២០២៣ បានចំនួនជាង ៦២ម៉ឺននាក់ ស្នើនឹង៣៦ភាគរយ នៃនិន្នន័យ​អត្តសញ្ញាណបណ្ណសញ្ជាតិខ្មែរគំរូថ្មី ដែលត្រូវអស់សុពលភាព ​ក្នុងឆ្នាំ២០២២ រហូតដល់​ត្រឹមថ្ងៃទី២៣ ខែកក្តដា ឆ្នាំ២០២៣ ​មានចំនួនសរុបជាង ១លាន ៧២ម៉ឺននាក់ ហើយគិតត្រឹម​បំណាច់ខែមករា ឆ្នាំ២០២៣ មន្ត្រីជំនាញបានធ្វើអត្តសញ្ញាណបណ្ណជូនពលរដ្ឋ​ចាប់ពីអាយុ ១៥ឆ្នាំឡើង បានជាង១២លាននាក់ ។

លោកឧត្តមសេនីយ៍ឯក បានបន្តថា សម្រាប់ទិន្នន័យដែលនៅសេសសល់ ជាទិសដៅបន្ត អគ្គនាយកដ្ឋានអត្តសញ្ញាណកម្ម ក៏ដូចជាក្រុមការងារទទួលខុសត្រូវដឹកនាំ និងជំរុញការផ្ដល់​អត្តសញ្ញាណបណ្ណសញ្ជាតិខ្មែរទុតិយតា ​នឹងបង្កើនការផ្សព្វផ្សាយ តាមប្រព័ន្ធផ្សព្វផ្សាយនានា ជំរុញដល់អង្គភាពពាក់ព័ន្ធ ទាំងថ្នាក់ជាតិ និងក្រោមជាតិ​ និងបន្តសហការជាមួយក្រសួង ស្ថាប័ន​ពាក់ព័ន្ធ ទាំងវិស័យរដ្ឋ និងឯកជន ដើម្បីឱ្យមានការចូលរួមពីគ្រប់ភាគី និងប្រជាពលរដ្ឋ បានចូលរួមក្នុងយុទ្ធនាការផ្តល់អត្តសញ្ញាណបណ្ណនេះទទួលបានជោគជ័យ និងសម្រេចបានតាមផែនការ ៕ អត្ថបទ បាន សុខរិទ្ធិ