កោះកុង៖ ឯកឧត្តម ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី បានបង្ហាញការជឿជាក់ថា សិស្ស និស្សិត និងយុវជននៅខេត្តកោះកុង នឹងបន្តពង្រីកចំណេះដឹងផ្នែកបច្ចេកទេសបន្ថែមទៀត ខណៈទីផ្សារការងារព្រមទាំងប្រព័ន្ធបច្ចេកវិទ្យវឌ្ឍនលឿនឆាប់រហ័ស។
ការបង្ហាញក្តីសង្ឃឹមរបស់ឯកឧត្តម ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ នៅពេលនេះ បានធ្វើឡើងក្នុងពិធីសម្ពោធវិទ្យាស្ថានពហុបច្ចេកទេសសាខាខេត្តកោះកុង និងប្រគល់សញ្ញាបត្រជូនដល់និស្សិតប្រមាណ ៥០០នាក់។
ឯកឧត្តម ពេជ សោភ័ន គូសបញ្ជាក់នៅថ្ងៃទី៩ ខែកុម្ភៈ ឆ្នាំ២០២៣ថា ការដែលសិស្ស និស្សិត និងយុវជន បានប្រឹងអភិវឌ្ឍន៍សមត្ថភាពជំនាញរបស់ខ្លួនបន្ថែម ហើយច្បាស់ណាស់ថា នឹងចាប់យកឱកាសទីផ្សារការងារទទួលបានប្រាក់ចំណូលច្រើន ចៀសជាងការងារប្រើកម្លាំងពលកម្ម ទន្ទឹមនឹងប្រព័ន្ធបច្ចេកវិទ្យាកំពុងផ្លាស់ប្តូរឆាប់រហ័សខ្លាំងណាស់។
ឯកឧត្តម រដ្ឋមន្ត្រីប្រតិភូអមនាយករដ្ឋមន្ត្រី សង្កត់ធ្ងន់ទៀតថា ទៅថ្ងៃអនាគការងារប្រើប្រាស់កម្លាំងពលកម្មនឹងជួបហានិភ័យពិបាករកការងារធ្វើ ខណៈទីផ្សារការងារពិភពលោកកំពុងប្រែក្លាយពីទីផ្សារការងារផ្អែកលើកម្លាំងបាយទៅជាទីផ្សារការងារផ្អែកលើចំណេះដឹង។ ដូច្នេះ ធានាបាននិរន្តរភាព មុខរបរការងារ ឯកឧត្តមសូមយុវជនខេត្តកោះកុង ប្រឹងប្រែងពង្រឹងអភិវឌ្ឍន៍សមត្ថភាពចំណេះដឹងបច្ចេកទេសឱ្យបានគ្រប់ៗគ្នា។
ឯកឧត្តម ក៏កោតសរសើរ និងវាយតម្លៃខ្ពស់ចំពោះកិច្ចប្រឹងប្រែងចំណាយពេលវេលាសិក្សាក្រេបយកចំណេះដឹងរបស់ពេល៤ឆ្នាំទំរាំមានថ្ងៃនេះរបស់សិស្ស និងនិស្សិតនៅខេត្តកោះកុង ព្រមទាំងឆ្លើយតបសេចក្តីត្រូវការការងារនៅក្នុងខេត្តផង និងក្នុងប្រទេសផង គ្រាប្រទេសជាតិម្លប់សុខសន្តិភាពដឹកនាំដោយសម្តេចតេជោនាយករដ្ឋមន្ត្រី។
លោកជំទាវ មិថុនា ភូថង អភិបាលខេត្ត ថ្លែងថា ខេត្តកោះកុងសព្វថ្ងៃនេះ មានតំបន់សេដ្ឋកិច្ចពិសេសដែលកំពុងផ្តល់ការងារដល់យុវជនក្នុងខេត្ត ឬក្រៅខេត្តប្រមាណជាង១ម៉ឺននាក់ និងទទួលប្រាក់ចំណូល៥លានដុល្លារក្នុង ១ខែៗ។ ក្រៅពីការពឹងលើវិស័យទេសចរណ៍ និងវិស័យកសិកម្ម។
អ្នកអង្គម្ចាស់បណ្ឌិត ស៊ីសុវត្ថិ ឬទ្ធីរ៉ាវង្ស នាយកវិទ្យាស្ថានពហុបច្ចេកទេសខេត្តកោះកុង បានឱ្យដឹងនៅថា រាជរដ្ឋាភិបាលកម្ពុជា បានចាត់ទុកវិស័យTVET ជាវិស័យអាទិភាពមួយក្នុងចំណោមវិស័យអាទិភាពដ៏ទៃទៀតក្នុងការរួមចំណែកកាត់បន្ថយភាពក្រីក្រ និងការលើកកម្ពស់ជីវភាពរស់នៅរបស់ប្រជាពលរដ្ឋតាមរយៈការបង្កើនចំណេះដឹង ជំនាញ ឥរិយាបថការងារ សីលធម៌វិជ្ជាជីវៈ ផលិតការងារ និងសមត្ថភាព សម្រាប់បង្កើតមុខរបរ ព្រមទាំងទទួលបានឱកាសការងារ។
បើតាមអ្នកអង្គម្ចាស់បណ្ឌិត ស៊ីសុវត្ថិ ឬទ្ធីរ៉ាវង្ស អត្រាសិស្ស និស្សិត មានការងារធ្វើ បន្ទាប់ពីបញ្ចប់ការសិក្សារយៈពេល៣ខែ មានការងារធ្វើ៨៥ភាគរយ ដោយមានដៃគូសហប្រតិបត្តិការជាមួយក្រុមហ៊ុន និងសហគ្រាសរង់ចាំទទួលចូលធ្វើការ។
មុននឹងក្លាយជាវិទ្យាស្ថាន គឺមជ្ឈមណ្ឌលវិជ្ជាជីវៈខេត្តកោះកុង បានផ្តល់បណ្តុះបណ្តាលជំនាញអគ្គិសនី អេឡិចត្រូនិច សំណង់ និងកំព្យូទ័រ បានផ្តល់ចំណេះដឹងកម្រិតបរិញ្ញាបត្រ បរិញ្ញាបត្ររងជូនដល់សិស្សនិស្សិតសរុបជាង២ម៉ឺននាក់/ស្ត្រី ១ម៉ឺននាក់៕ អត្តបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
