ភ្នំពេញ៖ ប្រទេសកម្ពុជាបានសម្រេចត្រៀមកងកម្លាំងចំនួនប្រមាណជាង ១៥ ០០០នាក់ ដើម្បី ការពារសន្តិសុខសណ្ដាប់ធ្នាប់ នៅក្នុងពិធីប្រកួតកីឡាអាស៊ីអាគ្នេយ៍ (SEA Games) លើកទី២៣ និងកីឡាជនពិការ (ASEAN Para Games) លើកទី១២ ឆ្នាំ២០២៣ ដែលនៅសល់ត្រឹមតែ ៨៤ថ្ងៃទៀតនោះ ។

ក្នុងកិច្ចប្រជុំបង្ហាញរបាយការណ៍សង្ខេបស្តីពី ផែនការការពារសន្តិសុខ សណ្ដាប់ធ្នាប់ ក្នុងព្រឹត្តិការណ៍​ស៊ីហ្គេម ជូនសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី១០ ខែកុម្ភៈ ឆ្នាំ២០២៣ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ មានប្រសាសន៍ថា ក្នុងពិធីប្រកួតកីឡាអាស៊ីអាគ្នេយ៍ SEA Games លើកទី២៣ និងកីឡាជនពិការ ASEAN Para Games លើកទី១២ ត្រូវធានាដាច់ខាតសុវត្ថិភាព និងសណ្ដាប់ធ្នាប់សន្ដិសុខ សម្រាប់ព្រឹត្តិការណ៍កីឡា ដើម្បីលើកកិត្យានុភាពរបស់កម្ពុជា នៅ​លើឆាកអន្ដរជាតិ ។

នាយឧត្តមសេនីយ៍ បានបន្ដថា ចំពោះកងកម្លាំងការពារវិញ មានផែនដូចជា ផែនសន្ដិសុខ ផែន​បង្ក្រាបបទល្មើស ផែនសណ្ដាប់ធ្នាប់ និងចរាចរណ៍ ដោយប្រើប្រាស់កម្លាំងសរុបចំនួន ១៥ ៧០០នាក់ ​ស្មើនឹង១៥អង្គភាព ​ដោយកងកម្លាំងអន្ដរាគមន៍ជាង៤ពាន់នាក់ផងដែរ ។

ក្នុងឱកាសនោះសម្ដេចក្រឡាហោម ស ខេង មានប្រសាសន៍ថា ព្រឹត្តិការណ៍ប្រកួតកីឡា​អាស៊ីអាគ្នេយ៍​ និងកីឡាជនពិការ ​គឺជាព្រឹត្តិការណ៍ដ៏មានសារៈសំខាន់​ បន្ទាប់ពីកម្ពុជា រៀបចំ​ធ្វើជាម្ចាស់ នៃកិច្ចប្រជុំអាស៊ាន ​និងកិច្ចប្រជុំពាក់ព័ន្ធ ​បានបញ្ចប់ដោយរលូន និងទទួលបាន​ជោគជ័យ​យ៉ាងត្រចះត្រចង់កាលពីចុងឆ្នាំ២០២២ ។

សម្ដេច បានណែនាំអាជ្ញាធរគ្រប់ប្រភេទ ​ត្រូវខិតខំប្រឹងប្រែងការពារ ​ឱ្យបានដាច់ខាត់នូវសុវត្ថិភាព សម្រាប់​ការប្រកួតទាំងមូល ដូចជា ការពារកីឡាករ-កីឡាការិនី ​ព្រមទាំងពលរដ្ឋជាដើម ដើម្បីធ្វើ​យ៉ាងណាឱ្យព្រឹត្តិការណ៍កីឡានេះ ទទួលបានជោគជ័យ ។

លើសពីនេះ សម្ដេចក្រឡាហោម ក៏បានផ្ដាំផ្ញើដល់កងកម្លាំងទាំងអស់ ត្រូវធ្វើការពង្រឹងច្រកចេញ-ចូល ​ទាំងផ្លូវអាកាស និងផ្លូវគោក ឱ្យបានម៉តចត់ និងត្រឹមត្រូវបំផុត ​ព្រោះមានភ្ញៀវទេសចរណ៍ និង​អ្នកវិនិយោគចេញ-ចូលច្រើនមកកាន់កម្ពុជា ​ដោយគោលដៅសំខាន់ គឺការពារព្រឹត្តិការណ៍នេះ ឱ្យបានល្អ ​និងទទួលបានជោគជ័យ ​ដើម្បីលើកមុខមាត់ប្រទេសកម្ពុជា ព្រមទាំងទាក់ទាញ​ភ្ញៀវទេសចរណ៍​បន្ថែមទៀតមកកាន់កម្ពុជា ៕អត្ថបទ បាន សុខរិទ្ធិ