ភ្នំពេញ៖ ក្រុមប្រឹក្សារាជធានីភ្នំពេញ ថ្លែងនូវការកោតសរសើរ ចំពោះរដ្ឋបាលរាជធានីភ្នំពេញ ដែលបានបំពេញការងារបានយ៉ាងល្អក្នុងខែមករាកកន្លងមក ពិសេសគឺការផ្ដល់បណ្ណកម្មសិទ្ធិដល់​ប្រជាពលរដ្ឋជិត ១.៣០០គ្រួសារនៅបុរីកីឡា របស់ឯកឧត្តម ឃួង ស្រេង អភិបាល​នៃគណៈអភិបាលរាជធានីភ្នំពេញ ដែលនេះ គឺជាការទទួលខុសត្រូវខ្ពស់របស់អាជ្ញាធរ ហើយក៏ជាការវាយបក ចំពោះការឃោសនាភូតកុហករបស់ក្រុមអគតិមួយចំនួនផងដែរ។

ការថ្លែងនូវកោតសរសើរបែបនេះ របស់ក្រុមប្រឹក្សារាជធានីភ្នំពេញបានធ្វើឡើង ក្នុងកិច្ច ប្រជុំ សាមញ្ញ លើកទី ៤៥របស់ក្រុមប្រឹក្សារាជធានីភ្នំពេញអាណត្តិទី៣ក្រោមអធិបតីភាពឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្តម កើត ឆែ អភិបាលរងរាជធានី ភ្នំពេញ នាព្រឹកថ្ងៃទី១០ កុម្ភៈឆ្នាំ២០២៣ នេះ។

ប្រជាពលរដ្ឋជិត ១.៣០០គ្រួសាររស់នៅក្នុងអគារបុរីកីឡាទាំង០៨ អគារនេះ មិនត្រឹមតែ​ទទួលបានបណ្ណកម្មសិទ្ធិលើចំណែកឯកជនប៉ុណ្ណោះទេ សម្តេចតេជោ ហ៊ុន សែន នាយករដ្ឋមន្ត្រី នូវបានសម្រេចផ្តល់ការលើកលែងការបង់ពន្ធប្រថាប់ត្រា ​ពន្ធអចលនទ្រព្យ និងពន្ធអាករ​ផ្សេងៗថែ​ម​ទៀតផង ដោយពន្ធអាករទាំងនេះជាបន្ទុករបស់រដ្ឋ។

ឯកឧត្តម ម៉ប់ សារិន ប្រធានក្រុមប្រឹក្សា រាជធានីភ្នំពេញ បានសរសើរផងដែរ ចំពោះការខិតខំ​របស់មន្ទីរសាធារណការនិងដឹកជញ្ជូនរាជធានីភ្នំពេញ ដែលបាន​ជំរុញ​គ្រប់​មុខសញ្ញា​សាធារណការបានល្អ ប្រសើរ ធ្វើឱ្យរាជធានីភ្នំពេញមានសោភ័ណភាពស្រស់បំព្រង ពិសេស​ក្នុងការត្រៀមចូលរួម ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី ១២ខាងមុខនេះ។

ឯកឧត្តម បានលើកឡើងទៀតថា កម្លាំងមានសមត្ថកិច្ច បានខិតខំប្រឹងប្រែងលើការបង្ការ ទប់ស្កាត់ និងបង្ក្រាបក្មេងទំនើង បាន ៧៨ ករណី ឃាត់ខ្លួនបាន១៣៦នាក់នៅក្នុងខែមករានេះ ។ ប៉ុន្តែទោះបីជាយ៉ាងណាក្តី លោកសំណូមពរអោយសមត្ថកិច្ច លើកកម្ពស់ទប់ស្កាត់​ រក្សាសន្តិសុខ សណ្តាប់ធ្នាប់ ​និងរក្សាប្រពៃណី ក្នុងទិវានៃក្តីស្រឡាញ់១៤កុម្ភៈ ឆ្នាំ២០២៣ខាងមុខនេះអោយបាន​ខ្លាំងខ្លាបន្ថែមទៀត។

ឯកឧត្តម បន្តថា ចំពោះគ្រោះថ្នាក់អគ្គិភ័យក្នុងខែមករា ឆ្នាំ២០២៣នេះបានកើតមាន១៩លើ៦ករណី កើន១៣លើក ។ លើករណីនេះ លោកសំណូមពរ អោយសមត្ថកិច្ចមូលដ្ឋានធ្វើការ ផ្សព្វផ្សាយអប់រំ បង្ការប្រុងប្រយ័ត្នអោយបានខ្ពស់នៅរដូវប្រាំងនេះ។

ចំពោះគ្រោះអគ្គីភ័យនេះ ឯកឧត្តម កើត ឆែ ​បានមានប្រសាសន៍បញ្ជាក់ផងដែរថា ឯកឧត្តម ឃួង ស្រេង អភិបាលរាជធានីភ្នំពេញ ​បានណែនាំអោយសមត្ថកិច្ចអគ្គីភ័យ នាំយករថយន្តពន្លត់អគ្គីភ័យ​មួយ​ចំនួន នៅការិយាល័យនគរបាលបង្ការពន្លត់អគ្គីភ័យ​ និង​សង្រ្គោះនៃស្នងការដ្ឋាន​នគរបាល​រាជធានីភ្នំពេញ ដែលមានទីតាំងនៅខណ្ឌឬស្សីកែវ ​មកដាក់នៅទីតាំងក្បែរវត្តបទុមវតី​ខណ្ឌដូនពេញ ដើម្បីងាយស្រួលក្នុងការជួយអន្តរាគមន៍គ្រោះអគ្គីភ័យនេះ​ និងបានជម្រុញអោយ​ អាជ្ញាធរខណ្ឌ សមត្ថកិច្ចមូលដ្ឋានធ្វើការ ​ផ្សព្វផ្សាយអប់រំ ​ដើម្បីរួមគ្នា បង្ការប្រុងប្រយ័ត្នអោយបានខ្ពស់​ចំពោះអគ្គីភ័យ​នៅរដូវប្រាំងនេះ៕អត្ថបទ ៖ ប្រាក់ វ៉ាន់ដា