ភ្នំពេញ៖ មន្ដ្រីនាយកដ្ឋានមុខងារ និងធនធាននៃក្រសួង​មហាផ្ទៃ បានថ្លែងថា បច្ចុប្បន្ននេះ​ រាជរដ្ឋាភិបាលបានលើកលែងការយកកម្រៃ សម្រាប់ការផ្ដល់សេវាមួយចំនួនពាក់ព័ន្ធ​ទៅនឹងការងារ​អត្រានុកូលដ្ឋានដល់ប្រជាពលរដ្ឋ ​ពេលទៅទទួលសេវានៅការិយាល័យច្រកចេញចូលតែមួយ។

ឯកឧត្តម បួន ហេង អគ្គលេខាធិការរងនៃអគ្គលេខាធិការដ្ឋាន​នៃគណៈកម្មាធិការ​គ្រប់គ្រងសំរាម សំណល់រឹងទីប្រជុំជន ​និងជាប្រធាននាយកដ្ឋានមុខងារ និងធនធាននៃក្រសួង​មហាផ្ទៃ បានថ្លែងប្រាប់ BTV តាមរយៈកិច្ចសម្ភាសន៍ផ្ដាច់មុខក្នុងពេលថ្មីៗនេះថា ជាពលរដ្ឋ​ដែលមានតម្រូវការសេវាអត្រានុកូលដ្ឋានទាំងការស្នើចុះបញ្ជីថ្មី ​ឬការបញ្ជាក់លិខិត និង​ឯកសារអត្រានុកូលដ្ឋានគឺមិនមានការគិតប្រាក់កម្រៃឡើយ។

បើតាមឯកឧត្ដម បួន ហេង បានឱ្យដឹងថា រដ្ឋាភិបាលបានជំរុញឱ្យដាក់ដំណើការការផ្ដល់សេវាដល់​ប្រជាពលរដ្ឋ​តាមរយៈការិយាល័យច្រកចេញចូលតែមួយដល់គ្រប់ ឃុំ សង្កាត់នៅទូទាំងប្រទេស​តាំងពីពាក់​កណ្ដាលឆ្នាំ២០២២​ ដោយបច្ចុប្បន្នមានសេវាសំខាន់ចំនួន២៣​ សេវា ដែលកំពុង​បម្រើដល់ប្រជាពលរដ្ឋ។

គួរបញ្ជាក់ថា ការិយាល័យច្រកចេញចូលតែ ១ និងការិយាល័យប្រជាពលរដ្ឋត្រូវពង្រីកទៅដល់ ឃុំ សង្កាត់ នៅទូទាំងប្រទេស ​ក្នុងគោលដៅដើម្បីលើកកម្ពស់ប្រសិទ្ធភាពនៃការផ្តល់សេវា​រដ្ឋបាលជូន​ប្រជាពលរដ្ឋនៅថ្នាក់មូលដ្ឋានឱ្យបានឆាប់រហ័ស ​តាមនីតិវិធីសាមញ្ញ ​ប្រកបដោយតម្លាភាព គុណភាព ​គណនេយ្យភាព ​និងកាត់បន្ថយអំពើពុករលួយ។

ការិយាល័យទាំង២នេះ ត្រូវបានបង្កើតឡើង​ តាមរយៈប្រកាសរបស់ក្រសួងមហាផ្ទៃនៅក្នុងរចនា​សម្ព័ន្ធរបស់រដ្ឋបាលក្រុង ស្រុក ខណ្ឌ ​ដោយផ្អែកលើសេចក្តីសម្រេចរបស់រាជរដ្ឋាភិបាលលេខ ១២ សសរ ចុះថ្ងៃទី៣០ ខែមិថុនា ឆ្នាំ ២០០៨៕អត្ថបទ៖ វ៉ន ដារ៉ា