ភ្នំពេញ៖ មន្រ្តីក្រសួងសង្គមកិច្ច និងក្រសួងអប់រំ ដោយមានការចូលរួមពី អង្គការសង្គមស៊ីវិល បានសហការគ្នា ​ចុះអប់រំណែនាំសិស្សតាមសាលារៀន ​នៅរាជធានីភ្នំពេញ ​ពីសីលធម៌សង្គម ក៏ដូចជាតម្លៃស្រ្តី និងគ្រួសារខ្មែរផ្សាភ្ជាប់នឹងទិវាក្ដីស្រលាញ់។

ខណៈទិវានៃក្ដីស្រលាញ់ខិតជិតមកដល់ មន្រ្តីនៃក្រសួងសង្គមកិច្ច ដោយមានកិច្ចសហការជា​មួយ​ក្រសួងអប់រំ យុវជន និងកីឡា ដោយមានការចូលរួមពីអង្គការមូលនិធិមនុស្សធម៌ឆឺជី បានចាប់​ផ្ដើម​ចុះអប់រំណែនាំសិស្សនៅតាមគ្រឹះស្ថានសាធារណៈមួយចំនួននៅរាជធានីភ្នំពេញ ។ ជាក់ស្តែងនៅថ្ងៃទី ៩ ខែកុម្ភៈ ឆ្នាំ ២០២៣ម្សិលមិញនេះមានការចុះទៅអប់រំសិស្សនៅវិទ្យាល័យ ទួលស្វាយព្រៃ និងវិទ្យាល័យទួលទំពូង។

ក្នុងឱកាសជួបជាមួយសិស្សនៅវិទ្យាល័យ​ទួលទំពូង ឯកឧត្តម ឈួរ សុបញ្ញា ប្រតិភូរាជរដ្ឋាភិបាល​ទទួល​បន្ទុកជា អគ្គនាយកមូលនិធិជាតិជំនួយសង្គម បានបញ្ជាក់ពីប្រវត្តិនៃទិវាក្ដីស្រលាញ់ជូន​ដល់​យុវសិស្ស អោយយល់ច្បាស់ពីទិវានៃក្ដីស្រលាញ់ ​ដែលហូរចូលមកកម្ពុជា។

ឯកឧត្តមបន្តថា ថ្ងៃ ១៤ កុម្ភៈ គឺយើងគ្រប់គ្នា អាចប្រើជាថ្ងៃបង្ហាញក្ដីស្រលាញ់ជូន ឪពុកម្ដាយ ជីដូនជីតា បងប្អូន សាច់ញាតិ រឺមិត្តភក្តិ និងមនុស្សជុំវិញខ្លួន។ ​ចំណុចហាមប្រាម គឺការគិតខុស ប្រព្រឹត្តិខុស ដែលឈានដល់ការលះបង់ខ្លួនប្រាណ​ ដោយសារតែកាដូ រឺបាច់ផ្កា។

ក្រោយពីអប់រំណែនាំដល់យុវជនជាសិស្ស ក៏មានការរៀបចំការគោរពដឹងគុណដល់លោកគ្រូ អ្នកគ្រូ ក៏ដូចជាការជួយដល់ក្រុមអ្នកធាក់ស៊ីក្លូដែលមានវ័យចំណាស់ ​ដែលបង្ហាញពីក្ដីស្រលាញ់ ក្ដីគោរព និងការជួយគ្នាទៅវិញទៅមក​។

ក្រសួងអប់រំ យុវជន និងកីឡា ក៏បានចេញសេចក្ដីណែនាំពីការទប់ស្កាត់សកម្មភាពមិនប្រក្រតីក្នុង​ទិវានៃក្តីស្រឡាញ់នៅតាមគ្រឹះស្ថានសិក្សាសាធារណៈ​ និងឯកជន។ សេចក្ដីណែនាំ​អោយមានការ​ទប់ស្កាត់នេះ ដោយសារតែក្រសួងអប់រំ បានសង្កេតឃើញថា សិស្សានុសិស្សមួយចំនួនតូច​យល់​ច្រឡំថា ថ្ងៃ១៤ កុម្ភៈជាថ្ងៃបុណ្យសង្សា ឬជាថ្ងៃណាត់ជួបគ្នារវាងគូស្នេហ៍៕អត្ថបទ៖ គឹមហុក