ឧត្តរមានជ័យ៖ មន្ទីរសុខាភិបាលខេត្តឧត្តរមានជ័យ អំពាវនាវដល់ប្រជាពលរដ្ឋទូទាំងខេត្ត ដែលមានបញ្ហាជំងឺភ្នែក ផ្នែកបកបាយ កន្ទុយថ្លែន ត្រូវរួសរាន់​មកពិនិត្យទទួលសេវា​ការ​ព្យាបាលឱ្យ​បានគ្រប់ៗគ្នា នៅមន្ទីរពេទ្យបង្អែកខេត្តឧត្តរមានជ័យ ដោយឥតគិតថ្លៃ ចាប់ពីថ្ងៃទី៦មិនា ដល់ថ្ងៃទី១០មិនា ឆ្នាំ២០២៣ ខាងមុខ ។

ជាមួយគ្នានោះដែរលោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បាន​ឱ្យដឹងថា ដោយមានការយកចិត្តទុកដាក់​គិតគូរ​ខ្ពស់ផ្នែកសុខភាព​លើបញ្ហា​ប្រឈមនានា​ពិសេស​នោះ​ជំងឺសុខភាពភ្នែកគឺជាជំងឺមួយ​យ៉ាងសំខាន់ ​សម្រាប់បងប្អូនប្រជាពលរដ្ឋ​គ្រប់​មជ្ឈដ្ឋាន​ដែលត្រូវ​តែគិតគូរ និងយកចិត្តទុកដាក់ខ្ពស់ពី​សុខភាពរបស់បងប្អូន ។

ក្នុងនោះ​ក្រុមការងារគ្រូពេទ្យកម្មវិធីជាតិសុខភាពភ្នែក​ របស់ក្រសួងសុខាភិបាល​បាន​សហការ​ជាមួយ​ក្រុមគ្រូពេទ្យសុខភាពភ្នែករបស់ខេត្ត និងមានគាំទ្រគម្រោងពីអង្កការEye care fundation​ដើម្បីរៀបចំការពិនិត្យ និង​វះកាត់ភ្នែក​នេះឡើង​ជូន​ដល់​ប្រជាពលរដ្ឋ​ទូទៅ​ដែល​មាន​បញ្ហាជំងឺទាំង​អស់នេះដោយឥតគិតថ្លៃ ដើម្បីជួយសង្រ្គោះដល់អាយុជីវិតរបស់បងប្អូន​ឲ្យមានភាពល្អប្រសើរ។

លោកវេជ្ជបណ្ឌិត បញ្ជាក់ថា ​បញ្ហាសុខភាព​ភ្នែក​គឺ​ជា​កត្ដា​មួយ​ដ៏សំខាន់​ដូច្នេះបងប្អូន​ប្រជាពលរដ្ឋ​ទាំងអស់​មិនត្រូវធ្វេសប្រហែស​មើលរំលង​ចំពោះ​បញ្ហា​សុខភាព​របស់​បងប្អូន​នោះទេ គឺ​ត្រូវមក​ទទួលការពិនិត្យព្យាបាលសុខភាពរបស់បងប្អូនឱ្យ​បានគ្រប់ៗគ្នា​ទៅ​តាមការកំណត់​ពេលវេលារបស់ក្រុមគ្រូពេទ្យ៕ អត្ថបទ៖ ឃិន សារិទ្ធ