​បាល់ទាត់៖ ការប្រកួត​​ក្របខណ្ឌ​លី​គ​កំពូល​អេ​ស្ប៉ា​ញ La Liga ​កាន់តែ​តានតឹង​នៅ​ពេល​ឈាន​ដល់​សប្តាហ៍​ទី​៣៣ នេះ​ដោយ​ក្រុម​កំពូល​តារាង​ដល់​ក្រុម​លេខ៣ គំលាត​គ្នា​តែ ២ពិន្ទុ​។ ​ក្រុម​កំពូល​តារាង Atletico Madrid បាន​បាត់បង់ ​៣​ពិន្ទុ​ក្នុង​សប្តាហ៍​ទី៣៣ នេះ​បន្ទាប់ពី​បរាជ័យ​នៅ​ទឹកដី Athletic Bilbao ២-១​។

​​Alex Berenguer​ បើក​ការ​នាំមុខ​អោយ​ម្ចាស់ផ្ទះ Bilbao មុនពេល Stefan Savic​ តាម​ស្មើ​វិញ​នៅ​នាទី​ទី៧៧​។ ​Inigo Martinez ជា​អ្នក​ស៊ុត​សំរេច​គ្រាប់​បាល់​ជ័យជំនះ​អោយ Bilbao នៅ​នាទី​ទី៨៦ សម្លាប់​ទឹកចិត្ត​លោក Diego Simeone​។ ​បរាជ័យ​នេះ​ធ្វើអោយ Atletico Madrid ដាច់​គេ​ជាង ១០ពិន្ទុ​កាលពី​ខែមករា​ធ្លា​ក់មក​នាំមុខគេ​ត្រឹម ២ពិន្ទុ​នៅសប្តាហ៍​ទី៣៣ នេះ​។ ​Barcelona រកបាន​ ៣ពិន្ទុ​ដ៏​មាន​សារៈសំខាន់​ក្រោយ​ជ័យជំនះ​នៅ​ទឹកដី Villarreal ២-១​។ ​ក្រុម​ម្ចាស់ផ្ទះ​នាំមុខ​មុន​នៅ​នាទី​ទី២៦ ដោយ Samuel Chukwueze ​តែ​បានតែ ២នាទី Barcelona តាម​ស្មើ​វិញ ដោយ Antoine Griezmann ​ហើយ​ក្នុង​វគ្គ​ទី១ ដដែល​ខ្សែប្រយុទ្ធ​បារាំង​រូប​នេះ​រក​បាន​គ្រាប់​ជ័យជំនះ​នៅ​នាទី​ទី៣៥ ឲ្យ Barcelona មុន​ពេល​ដែល Villarreal សល់​គ្នា​តែ ១០នាក់​វគ្គ​ទី២ បន្ទាប់ពី Manu Trigueros​ ត្រូវ​បាន​បណ្តេញ​ចេញ​។​

​​៣ពិន្ទុ​នេះ​ថ្វីត្បិតតែ Barcelona នៅតែ​ឈរ​លេខ៣ ដដែល តែ​កំពុង​ស្មើ​ពិន្ទុ​ជាមួយ​ក្រុម​លេខ​២ Real Madrid មាន ៧១​ពិន្ទុ​ដូចគ្នា​តែ​ដេញ​ពីក្រោយ Atletico Madrid តែ ២​ពិន្ទុ​ប៉ុណ្ណោះ ហើយ​ក្រុម​របស់​លោក Ronald Koeman​ នៅសល់ ១​ប្រកួត​ក្នុង​ដៃ​មានន័យថា ​ជ័យជំនះ​នឹង​ធ្វើ​ឲ្យ Barcelona ឡើង​កំពូល​តារាង​វិញ​។ ​Real Madrid កាលពី​ថ្ងៃ​សៅរ៍​បាន​ខកខាន ​៣ពិន្ទុ​ក្នុង​ទឹកដី​ខ្លួនឯង​ក្រោយ​ស្មើ ០-០ ទល់នឹង Real Betis៕

​អត្ថបទ​៖​នាង សុភា​វុ​ធ