តាកែវ៖ បន្ទាប់ពីខេត្តតាកែវផ្ទុះរឿងក្រុមចោលួច ឆោឆក់ និងក្រុមក្មេងទំនើងដេញកាប់​សម្លាប់គ្នា​យ៉ាង​អានាធិបតេយ្យ​ ឯកឧត្តម អ៊ូច ភា អភិបាលខេត្តតាកែវ បាន​ដាក់បទបញ្ជាដល់ស្នងការ​នគបាលខេត្ត ​និងលោក​មេបញ្ជាការកងរាជអាវុធហត្ថ ត្រូវធ្វើយ៉ាងណា​បង្រ្កាប​ក្រុមក្មេងទំនើង និងក្រុមចោលួច ចោឆក់ ឱ្យបានជាដាច់ខាត ដើម្បីកាត់ទោសទៅតាមច្បាប់។

នៅក្នុងកិច្ចប្រជុំគណៈបញ្ជាការឯកភាពខេត្ត នៅរសៀលថ្ងៃទី៩ ខែមករាម្សិលមិញនេះ ក្រោយពី​មួយរយៈពេលកន្លងមកនេះ ខេត្តតាកែវ មានសកម្មភាពក្រុមចោលួច ចោឆក់​ និងក្រុមក្មេងទំនើង បានធ្វើសកម្មភាពនៅក្នុងខេត្តតាកែវ ដែលនាំឱ្យមានការផ្សព្វផ្សាយមិនល្អពីខេត្តតាកែវ នៅ​តាមបណ្ដាញសង្គមហ្វេសប៊ុក។

ឯកឧត្តម បានថ្លែងបន្តថា សមត្ថកិច្ចនគបាល​ និងកំលាំងកងរាជអាវុធហត្ថ ត្រូវពង្រឹងកំលាំង​ឡើងវិញ​ដើម្បីធ្វើយ៉ាងណារក្សាសន្តិសុខ ​សណ្ដាប់ធ្នាប់​សាធារណៈ ​ដោយត្រូវបង្រ្កាបអោយបាន​ចំពោះ​ក្រុមបងតូចបងធំ និងក្រោមចោលួច ចោឆក់ ក្រុមប្រើប្រាស់គ្រឿងញៀន អ្នកជួញដូរ​គ្រឿងញៀន ​និងត្រូវរួមសហការគ្នាទប់ស្កាត់ អោយបានចំពោះបញ្ហាទាំងអស់នេះ ហើយ​កំលាំងសមត្ថកិច្ចត្រូវល្បាតអោយបានជាប់ជាប្រចាំនៅពេលយប់។

ក្នុងឱកាសនោះផងដែរឯកឧត្តម អ៊ូច ភា ក៏បានធ្វើការណែនាំដល់អភិបាលក្រុងស្រុកត្រូវ​ដែល​ប្រធានគណៈបញ្ជាការឯកភាពក្រុង​ស្រុកត្រូវ​បញ្ជា​កំលាំងនៅក្នុងមូលដ្ឋាន របស់ខ្លួនអោយ​បាន​ល្អប្រសើរ​ដើម្បីធ្វើយ៉ាងណា​ឲ្យមូលដ្ឋាន​ដែលខ្លួន​គ្រប់គ្រង​គ្មាន​ក្រុម​បង​តូចបងធំ គ្មាន​អំពើលួចប្លន់​និងគ្មានការប្រើប្រាស់ ឬជួញដូរគ្រឿងញៀន នៅក្នុងមូលដ្ឋានរបស់ខ្លួន។

គួរបញ្ជាក់ថា ក្នុងមួយរយៈពេលកន្លងទៅនេះ នៅតាមបណ្ដាញសង្គមហ្វេសប៊ុក បាននាំគ្នាបង្ហោះ​ពី​សកម្មភាពក្រុម ចោលួច ឆោឆក់ និងក្រុមក្មេងទំនើងដេញកាប់គ្នា​នៅក្នុងខេត្តតាកែវ ដែល​ការ​បង្ហោះទាំងអស់នេះ បានប៉ះពាល់ដល់មុខមាត់ខេត្ត ជាពិសេសបាន​បង្កឲ្យ​មានការ​ភ័យខ្លាច ដល់​បងប្អូនប្រជាពលរដ្ឋ ឬភ្ញៀវទេសចរ ដែលមាន​បំណងចង់​មក​លេងកម្សាន្ដ នៅក្នុងខេត្តតាកែវ៕