​កូរ៉េខាងជើង៖ ដោយ​ទទួលទាន​អាហារ ភេសជ្ជៈ ការមើល​ក្បួន​ព្យុហយាត្រា​មី​ស៊ី​ល​ជាមួយ​មេបញ្ជាការ​យោធា​ជាន់ខ្ពស់ កូនស្រី​របស់​មេដឹកនាំ​កូរ៉េខាងជើង​លោក Kim Jong Un ស្ថិតនៅ​កណ្តាល​វេទិកា​ជាមួយ​ឪពុក និង​ម្តាយ​របស់​នាង​នៅ​ក្នុង​ព្រឹត្តិការណ៍​យោធា​ធំ​ក្នុង​សប្តាហ៍​នេះ​។

វត្តមាន​របស់​កូនស្រី​លោក Kim បាន​បន្ថែម​ទៅលើ​ការ​រំពឹងទុក​ថា ​នាង​អាច​ស្ថិត​ក្នុង​ជួរ​សម្រាប់​តំណែង​ជា​អ្នកដឹកនាំ​ម្នាក់ ទំនងជា​តំណែង​ការងារ​កំពូល​នៅ​ក្នុង​របប​ផ្តាច់ការ​តាម​តំណ​ត្រកូល ​របស់​ប្រទេស​ដែល​មាន​អាវុធ​នុយក្លេអ៊ែរ​មួយ​នេះ​។ នាង​បាន​បង្ហាញខ្លួន​កាលពី​ថ្ងៃ​ពុធ​ជាមួយ​លោក Kim ក្នុង​ក្បួនព្យុហយាត្រា​យោធា​ដ៏​ធំ ដែល​ប្រព័ន្ធ​ផ្សព្វ​ផ្សាយ​រដ្ឋ​បង្ហាញ​ការ​ដើរ​ជាមួយ​លោក​ Kim និង​ម្តាយ​របស់​នាង Ri Sol Ju នៅមុខ​មេបញ្ជាការ​យោធា ដោយ​ទទួល​ទាន​ភេសជ្ជៈ​ទឹក​ផ្លែឈើ និង​និយាយ​ខ្សឹប​គ្នា​ទៅវិញទៅមក ខណៈ​មើល​ព្រឹត្តិការណ៍​។ វីដេអូ​ពី​ទូរទស្សន៍​រដ្ឋ KRT បាន​បង្ហាញ​កូនស្រី​របស់​មេដឹកនាំ​កូរ៉េខាងជើង​លោក Kim Jong Un អង្អែល​មុខ​លោក ​អំឡុង​ពេល​ព្យុហយាត្រា​យោធា​កាលពី​ថ្ងៃ​ពុធ​។​

​កូនស្រី​របស់​លោក Kim មិនត្រូវ​បានបង្ហាញ​ឈ្មោះ​នៅ​ក្នុង​ប្រព័ន្ធ​ផ្សព្វផ្សាយ​រដ្ឋ​នោះ​ទេ ចាប់​តាំង​ពី​នាង​បាន​បង្ហាញ​ខ្លួន​ជា​លើកដំបូង​ក្នុង​ពេល​ចូលរួម​ការបាញ់​មី​ស៊ី​ល​ជាមួយ​លោក Kim កាលពី​ឆ្នាំមុន ប៉ុន្តែ​ក្រុម​មន្ត្រី​ចារកម្ម​កូរ៉េខាងត្បូង​ជឿ​ថា ​នាង​គឺជា​កូនស្រី​ដែល​ត្រូវ​បាន​បញ្ជាក់​ឈ្មោះថា ជូ​អេ​ (Ju Ae) ដោយ​អតីត​កីឡាករ​បាល់បោះ​អាមេរិក​ម្នាក់​លោក Dennis Rodman ដែល​បាន​នៅ​ជាមួយ​គ្រួសារ​លោក Kim ក្នុង​ឆ្នាំ២០១៣៕​

អត្ថបទ៖ ប៊ុនថន