អន្ដរជាតិ៖ ប្រធានគណកម្មការអឺរ៉ុបលោកស្រី Ursula von der Leyen និយាយនៅថ្ងៃសុក្រនេះថា ក្រុមមេដឹកនាំសហភាព​អឺរ៉ុប បានឯកភាពគ្នាថា ពួកគេនឹងរឹតបន្តឹងព្រំដែន ដើម្បីទប់ស្កាត់លំហូរចូលជនអន្តោប្រវេសន៍។

បញ្ហាអន្តោប្រវេសន៍​ បានក្លាយជាប្រធានបទដ៏រសើបមួយ​នៅសហភាពអឺរ៉ុប ចាប់តាំងពីឆ្នាំ២០១៥ ពេលដែលជន​អន្តោប្រវេសន៍ជាង ១លាននាក់ ដែលភាគច្រើនរត់ភៀសខ្លួនចេញពីសង្រ្គាមនៅស៊ីរី បានឆ្លងកាត់សមុទ្រមេឌីទែរ៉ាណេ ចូល​ទៅកាន់​អឺរ៉ុប ហើយរដ្ឋនៅក្នុងប្លុកមួយនេះ មានការខែ្វងគំនិតគ្នាចំពោះការទទួលចំនួនជនអន្តោប្រវេសន៍។

ដោយសារតែមិនឯកភាពគ្នាលើបញ្ហាមួយនេះ សហភាពអឺរ៉ុបដែលមានពលរដ្ឋប្រហែល ៤៥០លាននាក់ បានងាក​មក​រកការរឹតបន្តឹងព្រំដែនរបស់ខ្លួន ដើម្បីការារាំងជនភៀសខ្លួនមកពីតំបន់មជ្ឈិមបូព៌ា អាហ្វ្រិក និងអាស៊ី ពីការចូលក្នុងប្រទេស​របស់​​ពួកគេ ថ្វីត្បិតតែរងការរិះគន់លើគោលនយោបាអសមនុស្សធម៌បែបនេះក៏ដោយ៕