ភ្នំពេញ៖ ខណៈព្រឹត្តិការកីឡាស៊ីហ្គេម និងអាស៊ានប៉ារ៉ាហ្គេម នៅសល់តែ ៨៤ថ្ងៃទៀតនឹងចាប់ផ្តើមហើយនោះ ឧត្តម​សេនីយ៍ឯក លន់ សុផាត អគ្គស្នងការរងនគរបាលជាតិ នៅរសៀលថ្ងៃទី១០ ខែកុម្ភៈ ឆ្នាំ២០២៣នេះ បាន​ណែនាំ​បន្ថែមដល់កងកម្លាំងនៅអង្គភាពតម្រួតបទបញ្ជាទាំងអស់ ត្រូវត្រៀមទទួលបទបញ្ជាក្នុងព្រឹត្តិការណ៍កីឡាស៊ីហ្គេម និង​អាស៊ា​ន ប៉ារ៉ាហ្គេម ដែលកម្ពុជាធ្វើជាម្ចាស់ផ្ទះនេះ​ឲ្យបាន​ម៉ត់ចត់​បំផុត ។

ថ្លែងនៅក្នុងឱកាសអញ្ជើញជាតំណាងរបស់នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ជួបសំណេះសំណាលសាកសួរសុខទុក្ខកងកម្លាំង និងផ្ដាំផ្ញើការងារចាំបាច់មួយចំនួន ដល់កងកម្លាំងនៅអង្គភាព​តម្រួត​បទបញ្ជា នៃអគ្គស្នងការដ្ឋាននគរបាលជាតិឧត្តមសេនីយ៍ឯក លន់ សុផាតបានលើកឡើងថា នៅមានកិច្ចការ​ចំពោះ​មុខច្រើនទៀត ដែលកងកម្លាំងទាំងអស់ត្រូវតែរួមគ្នាអនុវត្តតាមអ្វីដែលថ្នាក់ដឹកនាំប្រគល់ជូន។

ជាក់ស្ដែងនៅពេលខាង​មុខ កម្ពុជាត្រូវធ្វើជាម្ចាស់ផ្ទះក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ព្រមទាំងព្រឹត្តិការណ៍ នៃការ​បោះឆ្នោត​ជ្រើស​រើសតំណាងរាស្ដ្រ ដែលនឹងប្រព្រឹត្តទៅនៅខែកក្កដា ឆ្នាំ២០២៣​ខាងមុខផងដែរ។

ឧត្តមសេនីយ៍ឯក លន់ សុផាត ក៏បានណែនាំប្រធានអង្គភាព និងមន្ដ្រីត្រូវពង្រឹងសមត្ថភាពបន្ដទៀត ដោយត្រូវធ្វើ​ការ​ហ្វឹកហ្វឺន​ជាប្រចាំ ប្រមូលផ្ដុំកម្លាំងនៅអង្គភាព ព្រមទាំងរក្សាសាមគ្គីភាពផ្ទៃក្នុង ព្រោះជោគជ័យ​កន្លងមក គឺកើត​ចេញពី​ការសាមគ្គីភាពរបស់ប្រធានអង្គភាព និងមន្ដ្រីទាំងអស់ នៃអង្គភាពតម្រួតបទបញ្ជា។

ថ្លែងនៅក្នុងពិធីនោះដែរ លោកឧត្តមសេនីយ៍ទោ ឆឹង កុមារ ប្រធានអង្គភាពតម្រួតបទបញ្ជា បានសម្ដែង​នូវក្ដី​សោមន​ស្ស​រីករាយ និងស្វាគមន៍យ៉ាងកក់ក្ដៅជូន ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ ដែលបានឆ្លៀតពេលវេលាដ៏មានតម្លៃ និងជាតំណាងរបស់នាយឧត្តមសេនីយ៍ សន្ដិបណ្ឌិត នេត សាវឿន ចុះសំណេះ​សំណាល និងសួរសុខទុក្ខកងកម្លាំងតម្រួតបទបញ្ជាដោយផ្ទាល់។

លោកឧត្តមសេនីយ៍ បានថ្លែងថា បើទោះបីទទួលបានជោគជ័យនូវការងារកន្លងមកក្ដី ក៏នៅមានចន្លោះ​ប្រហោងមួយ​ចំនួនកើតមានផងដែរ ប៉ុន្ដែ ភាពអវិជ្ជាមានទាំងអស់នោះ ត្រូវបានលុបបំបាត់ទៅដោយ តាមរយៈកិច្ចខិតខំ​ប្រឹងប្រែងរបស់ប្រធានអង្គភាព និងមន្ដ្រីទាំងអស់ ព្រមទាំងទទួលបានការសាទរពីថ្នាក់ដឹកនាំ នៃអគ្គស្នងការដ្ឋាននគរ​បាល​ជាតិផងដែរ៕ អត្ថបទ៖ បាន ចក់​