កណ្តាល៖ ប្រជាពលរដ្ឋដែលភាគច្រើនជាចាស់ជរានៅស្រុកកោះធំ ខេត្តកណ្តាល សម្តែងការស្វាគមន៍ និងសប្បាយចិត្តយ៉ាងក្រៃលែង បន្ទាប់ពីក្រុមគ្រូពេទ្យស្ម័គ្រចិត្តសម្តេចអគ្គមហាសេនាបតីតេជោ ហ៊ុន សែន ក្រោមការដឹកនាំផ្ទាល់ពីឯកឧត្តមសាស្ត្រាចារ្យ ឈាង រ៉ា អនុប្រធានទី៣ គណៈអចិន្ត្រៃយ៍គណៈពង្រឹងមូលដ្ឋានស្រុកកោះធំ បានចុះពិនិត្យ និងព្យាបាលជំងឺជូនពួកគាត់ដល់មូលដ្ឋានដោយមិនគិតថ្លៃ នៅថ្ងៃទី១១ ខែកុម្ភៈ ឆ្នាំ២០២៣នេះ។
លោកតា លោកយាយ បានឱ្យដឹងថា ពួកគាត់ពិតជាសប្បាយចិត្តយ៉ាងខ្លាំង ដោយមិនចាំបាច់ចំណាយពេលវេលា និងថវិកាសម្រាប់ព្យាបាលជំងឺពួកគាត់ទេ ដោយសារតែសកម្មភាពមនុស្សធម៌របស់ក្រុមគ្រូពេទ្យស្ម័គ្រចិត្តក្រុមគ្រូពេទ្យស្ម័គ្រចិត្តសម្តេចអគ្គមហាសេនាបតីតេជោ ហ៊ុន សែន បានចុះមកព្យាពាលពួកគាត់ដល់ផ្ទះជាញឹកញាប់។
ឯកឧត្តមសាស្ត្រាចារ្យ ឈាង រ៉ា បានថ្លែងថា ក្រុមគ្រូពេទ្យស្ម័គ្រចិត្តរតែងចុះពិនិត្យ និងព្យាបាលជំងឺជូនដល់បងប្អូនប្រជាពលរដ្ឋមិនថាជិតឬឆ្ងាយ មកពីសាសនា ឬគណបក្សណានោះទេ គឺគ្រូពេទ្យនឹងធ្វើការព្យាបាលដល់ពួកគាត់ទាំងអស់ដោយមិនគិតថ្លៃនោះឡើយ។
ជាងនេះទៅទៀតប្រសិនបើស្ថានភាពជំងឺរបស់បងប្អូនណា ដែលព្យាបាលនៅមូលដ្ឋានដែលក្រុមការងារចុះផ្ទាល់នេះ មិនបាន ឬមិនទាន់ពេលវេលា(ធ្ងន់ធ្ងរ) ក្រុមគ្រូពេទ្យ នឹងដឹកគាត់មកព្យាលពេទ្យធំគឺនៅមន្ទីរពេទ្យកាល់ម៉ែតតែម្តង ដោយមិនគិតថ្លៃសេវាសូម្បីតែបន្តិច។
ឯកឧត្តម ឈាង រ៉ា ក៏បានឲ្យដឹងផងដែរថា ការពិនិត្យព្យាបាលដល់បងប្អូនប្រជាពលរដ្ឋ មានជិតពីរពាន់នាក់ មកពីប្រាំពីរឃុំ នៅស្រុកកោះធំ ដោយមានប្រភេទជំងឺជាច្រើនដូចជាប្រចៀក ច្រមុះ បំពង់ក ជំងឺភ្នែក រោគស្ត្រី ជំងឺបេះដូង សុខភាពមាត់ធ្មេញ ពិនិត្យផ្ទៃពោះ ឆ្លុះអេកូផ្ទៃពោះ រួមទាំងធ្វើការវះកាត់ខ្នាតតូចនៅនឹងកន្លែងផងដែរ។
ឯកឧត្តមក៏បាន បញ្ជាក់ផងដែរថា ក្រុមគ្រូពេទ្យស្ម័គ្រចិត្តសម្តេចតេជោ ដែលតែងតែចុះព្យាលជំងឺដល់ប្រជាពលរដ្ឋមិនគិត ថ្លៃនេះ គឺមានរហូតដល់ជាងបួនរយនាក់ ដោយក្រុមគ្រូពេទ្យទាំងនោះភាគច្រើនគឺសុទ្ធតែជាគ្រូពេទ្យមាន ជំនាញ និងបទពិសោធន៍យូរឆ្នាំ ដោយកំពុងបំរើការងារនៅមន្ទីរពេទ្យកាល់ម៉ែតនេះតែម្តង៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
