ចំនួនសរុបអ្នកស្លាប់ពីការរញ្ជួយដីនៅក្នុងប្រទេសទួគី និងប្រទេសស៊ីរីគិតចាប់ពីថ្ងៃច័ន្ទរហូតដល់ព្រឹកថ្ងៃអាទិត្យនេះ បានឡើងដល់ ២៨០០០នាក់។

យោងតាអនុប្រធានាធិបតីទួគី លោកហ្វូអាត អុកតៃ បានអោយដឹងថា ការរញ្ជួយដីនេះបានសំលាប់មនុស្ស ២៤ ៦១៧នាក់​នៅ ក្នុងប្រទេសទួគី។ រដ្ឋមន្រ្ដីក្រសួងសុខាភិបាលទួគី លោកហ្វារេទីន កូកាបាននិយាយថា មនុស្ស រង​របួស​មាន​ចំនួន ៨០ ២៧៨ នាក់។

យោងតាមក្រសួងសុខាភិបាលរបស់រដ្ឋាភិបាលបានអោយដឹងថា នៅក្នុងប្រទេសស៊ីរី អ្នកស្លាប់មានចំនួន ១ ៤០៨ នាក់ និងអ្នករបួសមាន ២ ៣៤១នាក់ នៅ​ក្នុងតំបន់ដែលគ្រប់គ្រងដោយរដ្ឋាភិបាល។

ដោយឡែក ក្រុមសង្រ្គោះនៅតំបន់ដែលគ្រប់គ្រងដោយកងទ័ពប្រឆាំងរដ្ឋាភិបាលបានរាយការណ៍ថា អ្នក​ស្លាប់​មាន​ចំនួន ២ ១៦៧នាក់ ហើយអ្នករបួសមានជាង ២ ៩៥០នាក់។ ប៉ុន្ដែ​ចំនួននេះ​ត្រូវ​គេរំពឹង​ថា​អាច​កើន​ឡើង​ថែម​ទៀត។

លោកម៉ាធីន គ្រីហ្វីត អគ្គលេធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជា​អ្នក​សម្រប​សម្រួល ជំនួយបន្ទាន់បាននិយាយថា ការរញ្ជួដីដ៏ខ្លាំងនេះ គឺជាព្រឹត្ដិការណ៍​ដ៏​អាក្រក់​បំផុត​ដែល​បាន​កើត​ឡើង​នៅ​ក្នុង​តំបន់​ក្នុង ១សតវត្សចុងក្រោយនេះ ហើយលោករំពឹងថា ចំនួន​អ្នក​ស្លាប់​អាច​កើន​ឡើង​ទ្វេរ​ដង​ខ្ពស់​ជាង​ទិន្នន័យ​ថ្មី​ៗ​នេះ។​

លោកគ្រីហ្វីតបានអំពាវនាវអោយផ្ដោតការយកចិត្ដទុកដាក់លើជនរងគ្រោះដែលខ្វះស្បៀង និងទីជម្រក​នៅ​ក្នុង​តំបន់​ដែល​ទទួលរងការរញ្ជួយដី៕ អត្ថបទ៖ មករា