ភ្នំពេញ៖ គម្រោងថ្មីស្រឡាងមួយផ្សេងទៀត ស្ថិតក្នុងតំបន់ដ៏មានសក្ដារនុពល របស់ក្រុមហ៊ុន OCIC បាន​ប្រកាស​សម្ពោធ និងដាក់លក់ជាផ្លូវការហើយ ក្រោមវត្តមានថ្នាក់ដឹកនាំ នៃក្រុមហ៊ុន OCIC, កាណាឌីយ៉ាគ្រុប និងក្រុមហ៊ុន មេហ្គាអាសិត មេនេចមេន ក៏ដូចជាការចូលរួមពីភ្ញៀវកិត្តិយសជាតិ និង​អន្តរជាតិ​យ៉ាងច្រើនកុះករ។

ក្រុមហ៊ុនអានិកជនវិនិយោគទុនកម្ពុជា ហៅកាត់ថា OCIC នៅព្រឹកថ្ងៃទី១១ ខែកុម្ភៈ ឆ្នាំ២០២៣នេះ បាន​រៀបចំ​ពិធីប្រកាសបើកសម្ពោធ និងដាក់លក់ជាលើកដំបូង សៀលវើ វីឡា (Silver Villa) នៃ​គម្រោង​ជ្រោយ​ចង្វារ​ហ្គាដិន ជាគម្រោងថ្មីស្រឡាង និងចុងក្រោយគេ ដែលប្រមូលផ្ដុំ​ដោយ​លំនៅ​ឋាន​ប្រភេទ​ផ្ទះ​វីឡា​ប្រណិតៗ ស្ថិតនៅតាមបណ្ដោយផ្លូវ OCIC នៃទីក្រុងរណបជ្រោយចង្វារ រាជធានីភ្នំពេញ ដែល​បច្ចុប្បន្ន​កំពុង​ទទួលបានការអភិវឌ្ឍន៍ និងរីកដុះដាលយ៉ាងឆាប់រហ័ស។

លោកស្រី តាំង ស៊ុយចាន់ ប្រធានផ្នែកលក់ នៃគំរោងជ្រោយចង្វារ ហ្គាដិន បានមានប្រសាសន៍ថា គម្រោង​ថ្មី​នេះ​បានរួមចំណែកយ៉ាងសំខាន់ក្នុងការអភិវឌ្ឍន៍ទីក្រុងរណបជ្រោយចង្វារ ឱ្យកាន់​តែ​ល្អ​ប្រសើរ​ឡើង​ថែម​មួយ​កម្រិតទៀត ក៏ដូចជាពង្រីកស្នាដៃអភិវឌ្ឍន៍លំនៅឋានរបស់ OCIC ដែល​មាន​បទ​ពិសោធន៍​ជា​ច្រើន​ឆ្នាំនៅក្នុងវិស័យអចលនទ្រព្យ។ លោកស្រី បន្តថា គម្រោងនេះដែរ ផ្ដល់​ជូន​អតិថិជន​ជា​មួយ​បទ​ពិសោធន៍​ដ៏​ល្អ នៃការរស់នៅប្រកបដោយភាពសុខដុម ជាទី​ប្រជុំ​ជន​ហ៊ុំព័ទ្ធ​ដោយ​ហេដ្ឋា​រចនា​សម្ព័ន្ធ​ខ្វាត់ខ្វែង ជាពិសេសបង្កភាពងាយស្រួល សម្រាប់ការធ្វើដំណើរទៅកាន់គោលដៅជិតឆ្ងាយក្នុងទីក្រុង។

សូមបញ្ជាក់ថា គម្រោងជ្រោយចង្វារ ហ្គាឌិន អភិវឌ្ឍន៍ឡើងលើផ្ទៃដីសរុប ១៣ហិកតា ស្ថិត​នៅ​ទីក្រុង​រណប​ជ្រោយ​ចង្វារ ដែលបច្ចុប្បន្នកំពុងមានការអភិវឌ្ឍន៍យ៉ាងឆាប់រហ័ស នៃសំណង់អគារជាច្រើនទាំងរដ្ឋ និង​ឯកជន ថែមទាំងតភ្ជាប់ទៅស្ពានឬស្សីកែវ ដែលគ្រោងនឹងសម្ពោធឆាប់ៗទៀតផង។ គម្រោងនេះ គឺជា​ស្នាដៃ​នៃ​ការអភិវឌ្ឍន៍ទីក្រុងរណបទី២ បន្ទាប់ពីទីក្រុងកោះពេជ្រ របស់ក្រុមហ៊ុន OCIC ដែល​ជា​ក្រុមហ៊ុន​អភិវឌ្ឍន៍​អចលន​ទ្រព្យធំជាងគេ និងឈានមុខគេក្នុងប្រទេសកម្ពុជា តាមរយៈទំហំវិនិយោគ និង​ចំនួន​គម្រោង​ដែល​បាន​អភិវឌ្ឍ។ សម្រាប់ប្រភេទផ្ទះវីឡារបស់គម្រោងនេះ មានចំនួន ៨ប្រភេទ ដូចជា វីឡាកូនកាត់, វីឡាអាជីវកម្ម, វីឡាភ្លោះ, ព្រីមៀម វីឡា (Premium Villas), ព្រីមៀម ហ្គូល វីឡា (Premium Gold Villa), អគារពាណិជ្ជកម្ម, ឡិចរី វីឡា(Luxury Villa) និងសៀលវើ វីឡា (Silver Villa) ដែលត្រូវបានគូសប្លង់ និងសាងសង់ឡើងស្របតាមបទដ្ឋានបច្ចេកទេស ដើម្បី​ធានា​ឱ្យ​បាន​នូវ​និរន្តរភាព នៃ​សំណង់អគារ៕ អត្ថបទ៖ ឈិត បូរ៉ាវី