ព្រះសីហនុ៖ នាវាកងទ័ពជើងទឹកចក្រភពអង់គ្លេសមួយគ្រឿង ឈ្មោះ HMS SPEY-(P234) គ្រោងនឹងចូលចតកំពង់ផែស្វយ័តក្រុងព្រះសីហនុ នៅថ្ងៃទី១៣ ខែកុម្ភៈ ឆ្នាំ២០២៣ ដើម្បីទស្សនកិច្ចពង្រឹងចំណងមិត្តភាព និងធ្វើលំហាត់រួមគ្នារវាងកងទ័ពជើងទឹកប្រទេសទាំងពីរ (លំហាត់ពន្លត់អគ្គីភ័យ លំហាត់ទប់ទឹកលើនាវាពេលមានអាសន្ន និងលេងកីឡា) រយៈពេល ៥ថ្ងៃ ពីថ្ងៃទី១៣ ដល់ ថ្ងៃទី១៧ ខែកុម្ភៈ ឆ្នាំ២០២៣។

ឧត្តមនាវីទោ ស្វាយ សុន្ធី មេបញ្ជាការរង ទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ បានឱ្យដឹងថា បន្ទាប់ពីទទួលបដិសណ្ឋារកិច្ចស្វាគមន៍ដោយនាយនាវីមូលដ្ឋានសមុទ្រ និងនារី រួចហើយ ភាគីអង់គ្លេស ចូលជួបសម្តែងការគួរសមជាមួយ ឯកឧត្តម ឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋាន។ កម្មវិធីបន្ទាប់ គឺក្រុមនាវិកកម្ពុជា ទៅចូលរួមហ្វឹកហាត់ នូវលំហាត់អគ្គីភ័យ និងទប់ទឹកលើនាវាពេលមានអាសន្ន និងកម្មវិធីប្រកួតកីឡាជាមិត្តភាព រវាងកងទ័ពជើងទឹកកម្ពុជា និងនាវិកអង់គ្លេសមានបាល់ទាត់ និងបាល់ទះ។ បន្ទាប់មកទៀត ភាគីអង់គ្លេស គោរពអញ្ជើញសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ចូលទស្សនកិច្ច និងពិសារអាហារថ្ងៃត្រង់នៅលើនាវា ព្រមទាំងផ្លាស់ប្ដូរវត្ថុអនុសាវរីយ៍ ហើយនៅថ្ងៃបញ្ចប់ នាយនាវីកងទ័ពជើងទឹកកម្ពុជា រៀបចំពិធីបដិសណ្ឋារកិច្ចលាគ្នាជូនដំណើរ នាវាចេញដំណើរត្រឡប់ទៅវិញ។

សូមបញ្ជាក់ថា នាវាកងទ័ពជើងទឹកចក្រភពអង់គ្លេស ឈ្មោះ HMS SPEY-(P234) នេះ មានលក្ខណៈបច្ចេកទេស៖ -បណ្ដោយជាង ៩០ម៉ែត្រ -ទទឹងជាង ១៣ម៉ែត្រ -ជម្រៅទឹកជាង ៤ម៉ែត្រ -ទំងន់ផ្ទុក ២.០០០តោន និង-ចំនួនមនុស្ស ៦៧នាក់ ដែលមានមេបញ្ជាការនាវា លោក វរនាវីទោ ម៉ែក ប្រោកមែន ។