ភ្នំពេញ៖ ធនាគារសហគ្រាសធុនតូច និងមធ្យមកម្ពុជា កែសម្រួលផ្តល់ឥណទានថ្មី ដោយអាច​កម្ចីបានចំនួន ១ លានដុល្លារសហរដ្ឋអាមេរិក ​ដោយមានការប្រាក់ទាបបំផុត ដោយផ្តល់អទិភាព​សហគ្រិនជាស្រ្តី ​ដើម្បីជួយទ្រទ្រង់ដល់​សហគ្រាសក្នុងស្រុក ​ពង្រឹងនិងការពង្រីកខ្លួន ក្នុង​អាជីវកម្មរបស់ពួកគាត់។

លោក នៀវ សុគន្ធ នាយកប្រតិបត្តិ ប្រតិបត្តិការនៃធនាគារសហគ្រាសធុនតូច និងមធ្យមកម្ពុជា លើកឡើងនៅក្នុងបទបង្ហាញ នៅក្នុងសន្និបាតបូកសរុបលទ្ធផលការងារឆ្នាំ ២០២២ និងការងារឆ្នាំ ២០២៣ របស់សម្ព័ន្ធសមាគមសហគ្រាសធុនតូច និងមធ្យម កម្ពុជា (FASMEC) នៅចុងសប្តាហ៍ នេះថា ធនាគារសហគ្រាសធុនតូច ​និងមធ្យមកម្ពុជា គឺជាធនាគារគោលនយោបាយរបស់​រាជ​រដ្ឋាភិបាលកម្ពុជា ដែលមានបេសកម្មផ្តល់សេវាកម្មហិរញ្ញវត្ថុ ដោយមានល័ក្ខខណ្ឌអនុគ្រោះ ជាពិសេស​ហិរញ្ញប្បទាន ជូនដល់សហគ្រាសធុនតូច និងមធ្យម ក្នុងនោះចំពោះសហគ្រាស​ដែលផ្តល់​ការលើកទឹកចិត្តខ្ពស់ ​គឺសហគ្រាសធុនតូច​ និងមធ្យមកែច្នៃម្ហូបអាហារ និងផលិតកម្ម ឬហៅថា ​កម្មាន្តសាល ក្នុងនោះចំពោះផ្នែកផ្សេងៗ ផ្តល់ក្នុងល័ក្ខខណ្ឌមួយសមស្រប។

លោក បន្តថា ទាក់ទងនិងល័ក្ខខណ្ឌអនុគ្រោះលើការប្រាក់នេះ រាជរដ្ឋាភិបាលបានផ្តល់លទ្ធភាព​ខ្ពស់ ដោយមិនរំពឹងនៃការស្វែង​ រកប្រាក់ចំណេញពីការផ្តល់ឥណទាននេះឡើយ ជាក់ស្តែងជុំវិញ​ការផ្តល់ឥណទាននេះ ត្រូវបានបែងចែកចេញជាង ៤គម្រោង ក្នុងនោះ ការផ្តល់ឥណទានដល់​សហគ្រាសទូទៅ គឺមានការប្រាក់ ៥.៨៨ ភាគរយ ក្នុងមួយឆ្នាំ, ការផ្តល់ដល់សហគ្រិនជាស្រ្តី មានការប្រាក់ចាប់ពី ៥.៥ ភាគរយ, ផ្នែកឌីជីថល ការប្រាក់ចាប់ពី ៥. ៨៨ ភាគរយ និងការផ្តល់ប្រាក់កម្ចីដោយមិនមានទ្រព្យធានា តែមានអត្រាការប្រាក់ចាប់ពី ៧.៥ ទៅ ៨.៥ ភាគរយ​ក្នុងមួយឆ្នាំ ក្នុងនោះសម្រាប់គម្រោងទី១ ដល់ទី៣ ថ្មីៗនេះ ធនាគារសហគ្រាសធុនតូច និង​មធ្យមកម្ពុជា បានធ្វើការកែសម្រួល​ គឺម្ចាស់សហគ្រាសអាចកម្ចីរហូតដល់ ១ លានដុល្លារ ដោយ​ផ្តល់កា​រ​ប្រាក់ពិសេសប្រមាណ ៥ ភាគរយ ឬក្រោមនេះ ចំពោះសហគ្រិនជាស្រ្តី ដែលការផ្តល់​អត្រាការ​ប្រាក់ទាបបំផុតនេះ គឺជាការចូលរួមទ្រទ្រង់ដល់សហគ្រាសក្នុងស្រុក ដើម្បីពង្រឹង និងការ​ពង្រីកខ្លួនក្នុងខ្សែច្រវ៉ាក់ផលិតកម្ម, អាជីវកម្មបន្ថែម ។

សូមបញ្ជាក់ថា នៅក្នុងឆ្នាំ ២០២៣ នេះ រាជរដ្ឋាភិបាលគ្រោងចំណាយថវិកា ដើម្បីគាំទ្រដល់​វិស័យ​សំខាន់ៗចំនួន ៤ និងមានគម្រោង​ ផ្តល់ថវិកាអន្តរាគមន៍ជាច្រើន ដើម្បីទប់ស្កាត់ពីការប៉ះពាល់​ដោយ​ជំងឺកូវីដ ១៩ និងសម្ពោធអតិផរណា ក្នុងនោះសម្រាប់សហគ្រាសធុនតូច និងមធ្យម រាជរដ្ឋាភិបាលផ្តល់​ហិរញ្ញប្បទានបន្ថែម ជាង ៤០៦ ប៊ីលានរៀល សមមូលប្រមាណជា ១០០ លានដុល្លារអាមេរិក៕អត្ថបទ៖ សុន រ៉ាឌី