ភ្នំពេញ ៖ អង្ករចំនួន ២០០តោន ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និង​សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈក្រុមហ៊ុនOCIC ត្រូវបាននាំយកមក​ប្រគល់ជូន​រដ្ឋបាលរាជ​ធានីភ្នំពេញ​ ដើម្បីបន្តចែកជូនប្រជាពលរដ្ឋខ្វះខាត និងងាយរងគ្រោះ។

អង្ករចំនួន ២០០តោន ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និង​សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបាននាំយកមកប្រគល់ជូនរដ្ឋបាលរាជធានីភ្នំពេញ សម្រាប់​បន្តចែក​ជូនប្រជាពលរដ្ឋខ្វះខាត និងងាយរងគ្រោះ ដែលពិធីប្រគល់ និងទទួលអង្ករ​នេះបានធ្វើឡើងនារសៀលថ្ងៃទី១៣ ខែកុម្ភៈ ឆ្នាំ២០២៣ តាមរយៈលោក ទូច សំណាង អគ្គនាយករង ក្រុមហ៊ុនOCIC តំណាងអ្នកឧកញ៉ា ពុង ឃាវសែ និងឯកឧត្ដម ឃួង ស្រេង អភិបាលរាជធានីភ្នំពេញ។

ក្នុងឱកាសនោះ ឯកឧត្តម ឃួង ស្រេង បានថ្លែងអំណរគុណចំពោះក្រុមហ៊ុនOCIC ដែលបានផ្តល់នូវ​អង្ករចំនួន​២០០តោន​នេះ ដើម្បីជាការរួមចំណែកជាមួយរដ្ឋបាលរាជធានីភ្នំពេញ ក្នុងការជួយ​ឧបត្ថម្ភជូនដល់​ប្រជាពលរដ្ឋក្រីក្រ ខ្វះខាត និងងាយរងគ្រោះក្នុងរាជធានីភ្នំពេញ។

ឯកឧត្តម ឃួង ស្រេង បានបន្តថា ទឹកចិត្តសប្បុរសធម៌ដ៏ថ្លៃថ្លានេះ គឺពិតជាស្តែងឱ្យឃើញអំពីការគិតគូ និង​ក្ដីអាណិតស្រលាញ់ចំពោះបងប្អូនប្រជាពលរដ្ឋខ្វះខាត និងងាយរងគ្រោះទាំងអស់ក្នុងរាជធានីភ្នំពេញ ដោយឈរលើស្មារតីសាមគ្គី និងជួយទំនុកបម្រុងគ្នាក្នុងគ្រាលំបាក តាមរយៈការឧបត្ថម្ភគ្រឿងបរិភោគជាអង្ករនេះ។ កាយវិការដ៏ប្រពៃនេះ នឹងត្រូវបានចងចាំទុកដោយរដ្ឋបាលរាជធានីភ្នំពេញ និងអាជ្ញាធរមូលដ្ឋានគ្រប់លំដាប់ថ្នាក់ ក៏ដូចជាបងប្អូនប្រជាពលរដ្ឋទាំងអស់នៅទូទាំងរាជធានីភ្នំពេញផងដែរ៕ អត្ថបទ ៖ ប្រាក់ វ៉ាន់ដា​