ភ្នំពេញ៖ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទ បានថ្លែងថា ក្នុងពេលចុះបេសកកម្មនៅតាមបណ្ដាខេត្ត នារយៈពេលប៉ុន្មានខែមកនេះ គឺមាន​រោង​ម៉ាស៊ីន​កិនស្រូវចំនួន ៤១កន្លែង ចង់មានកិច្ចសន្យាជាមួយកសិករ ដើម្បីទិញស្រូវក្នុងតម្លៃសមរម្យ ដែលមានប្រភពពូជច្បាស់លាស់ ។

ឯកឧត្តម យ៉ង សាំងកុមារ បានប្រាប់ BTV នៅថ្ងៃទី១៣ ខែកុម្ភៈ ឆ្នាំ២០២៣នេះថា បច្ចុប្បន្ន​ក្រុម​ការងារ​របស់​ក្រសួង​កសិកម្ម កំពុងស្រង់ចំនួនឲ្យបានច្បាស់លាស់ នៃសហគមន៍ ដែលមាន​ការ​ផលិតពូជស្រូវ ដោយសហគមន៍មានស្រាប់ ត្រូវពង្រឹងពួកគាត់ និងធ្វើការពង្រីកបន្ថែម ។

ឯកឧត្តមបានបន្តថា នៅខែកុម្ភៈ ឆ្នាំ២០២៣នេះ រំពឹងថា នឹងអាចក្ដាប់​បាននូវ​ចំនួន​សហគមន៍​ស្រូវ​ពូជ​ដែលក្រសួង​បាន​គាំទ្រកន្លងមក ហើយមន្ទីរកសិកម្មនៅ​តាមបណ្ដា​ខេត្ត​ធ្វើការ​ប្រមូល​ចំនួន​កសិករ ​ដែលនឹងត្រូវ​ចុះកិច្ច​សន្យា​ជា​មួយ​ខាង​រោងម៉ាស៊ីនកិនស្រូវ ។

ឯកឧត្តមបណ្ឌិត យ៉ង សាំងកុមារ បានបញ្ជាក់ថា ក្នុងពេលចុះតាមសហគមន៍កសិកម្មនីមួយៗ ក្រុម​កាងារ​ក្រសួង​បាន​ពន្យល់កសិករ ពីប្រព័ន្ធដែលតភ្ជាប់គ្នា រវាងអ្នកផលិតស្រូវពូជ អ្នកផលិត​ស្រូវ​ចំណី ​និងរោងម៉ាស៊ីន ដែលជួយឲ្យ​ទាំង​អ្នកផលិតពូជ និងអ្នកផលិតស្រូវចំណី ទទួល​បាន​ការ​ធានា​ទីផ្សារ និងរោងម៉ាស៊ីនទទួលបានស្រូវសុទ្ធល្អ សម្រាប់​កែច្នៃ​អង្ករ ដើម្បីលក់មកកាន់ទីផ្សារ ។

ឯកឧត្តមរដ្ឋលេខាធិការ បានបញ្ជាក់ថា ការកសាងប្រព័ន្ធផលិត និងបែង​ចែក​ពូជស្រូវ​កំពុង​ធ្វើ​ដំណើរ​ទៅមុខ ដើម្បីធានា ចំពោះអ្នកផលិតពូជស្រូវល្អ មានទីផ្សារសម្រាប់លក់ពូជ របស់កសិករ ដែលជា​ផ្នែកសំខាន់ នៃប្រព័ន្ធច្រវ៉ាកផលិតកម្ម និងទីផ្សារស្រូវអង្ករ ៕ អត្ថបទ ៖ បាន សុខរិទ្ធិ