សៀមរាប៖ ក្នុងរយៈ៤ឆ្នាំមកនេះ ក្រុមហ៊ុន Ecobatt-Energy Cambodia ប្រមូលបានសំណល់អេឡិចត្រូនិកប្រមាណជាង ៧តោន រួមមាន៖ ថ្មពិល អាគុយ និងកុំព្យូទ័រជាដើម ដែលជាប្រភេទសំណល់គ្រោះថ្នាក់ សម្រាប់នាំចេញទៅកែច្នៃនៅក្រៅប្រទេស ខណៈនៅកម្ពុជាពុំទាន់មានក្រុមហ៊ុនកែច្នៃសំណល់ទាំងនេះនៅឡើយ។

ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បានថ្លែងថា សំណល់គ្រោះថ្នាក់ទាំងនេះ មិនអាចព្រងើយកន្តើយទៀតបានទេ ដូច្នេះទើបក្រសួងបរិស្ថានបានខិតខំសហការជាមួយដៃគូ ក្នុងការប្រមូលចេញពីតំបន់ផ្សេងៗ ដើម្បីរក្សាទុកនិងនាំចេញ ដែលក្នុងនោះបានចាប់ផ្តើមដំបូងគេនៅរាជធានីភ្នំពេញ តាមរយៈធុងនៅតាមស្ថានីយប្រេងឥន្ធនៈ ផ្សារទំនើប និងបុរីមួយចំនួន ហើយបានពង្រីកដល់ខេត្តសៀមរាប និងខេត្តព្រះសីហនុហើយ។ឯកឧត្ដមបន្ដថា នឹងខិតខំជំរុញការប្រមូលសំណល់ទាំងនេះ ឱ្យបានទូលំទូលាយថែមទៀតទូទាំង​ប្រទេស ព្រោះកន្លងទៅ ថ្មពិលដែលប្រើប្រាស់រួចមិនធ្លាប់ត្រូវបានយកចិត្តទុកដាក់ខ្ពស់ទេ ហើយបងប្អូនប្រជាពលរដ្ឋ ក៏បានបោះចោលពាសវាលពាសកាល ឬដាក់ក្នុងធុងសំរាម និងក្នុងទឹកប៉ុណ្ណោះ ប៉ុន្តែចាប់ពីពេលនេះទៅ គឺត្រូវជំរុញលើការគ្រប់គ្រង ឬញែកសំណល់ទាំងនេះ ឱ្យបានច្បាស់លាស់។ជាមួយគ្នានេះ ឯកឧត្តម បានស្នើឱ្យប្រជាពលរដ្ឋរស់នៅតាមផ្ទះ គ្រប់គ្រងសំណល់ថ្មពិលឱ្យបានល្អ ហើយអាចយកមកដាក់នៅទីតាំងដែលបានដាក់ជាធុង​សម្រាប់សំណល់ថ្មពិល នៅតាមស្ថានីយឬទីតាំងជិតផ្ទះ។ ចំពោះបងប្អូនប្រជានេសាទ ឬអ្នករស់នៅតាមដងទន្លេ សូមកុំបោះចោលសំណល់ថ្មពិលចូលទៅក្នុងទឹក ពីព្រោះវាធ្វើឱ្យប៉ះពាល់ធ្ងន់ធ្ងរដល់សុខភាព និងជីវចម្រុះ ខណៈក្រសួងបរិស្ថាន និងដៃគូ ជាពិសេសក្រុមហ៊ុន Ecobatt កំពុងខិតខំប្រមូល និងជំរុញឱ្យផុលផុសទូទាំងប្រទេស។

អ្នកតំណាងក្រុមហ៊ុនអេកូបាត បាននិយាយថា សំណល់អេឡិចត្រូនិកជាង៧តោននោះ ត្រូវបានប្រមូលយកមកទុកដាក់ និងវេចខ្ចប់ត្រឹមត្រូវសម្រាប់តែការនាំចេញប៉ុណ្ណោះ ព្រោះរហូត​មកដល់បច្ចុប្បន្ន កម្ពុជាយើងពុំទាន់មានក្រុមហ៊ុនវិនិយោគទៅលើការកែច្នៃ​សំណល់ទាំង​នេះនៅឡើយ។ ក្រុមហ៊ុនបញ្ជាក់ថា សម្រាប់ថ្មពិលតូចៗ នឹងនាំចេញទៅអេស្ប៉ាញ និងអាគុយធំៗនឹងយកទៅប្រទេសកូរ៉េខាងត្បូង ដែលជាប្រទេសដៃគូសហការ, រីឯសំណល់​គ្រឿងអេឡិចត្រូវនិកផ្សេងទៀត មិទទាន់រកដៃគូសហការកែច្នៃបាននៅឡើយទេ ប៉ុន្តែត្រូវបានទុកដាក់ត្រឹមត្រូវ។ក្រុមហ៊ុនអេកូបាតបានបង្កើតឡើងនៅឆ្នាំ២០១៩ ផ្តោតទៅ​លើតែ​សេវាកម្មជួសជុលអាគុយប៉ុណ្ណោះ ប៉ុន្តែក្រោយមក ក្រោមកិច្ចសហការជាមួយក្រសួងបរិស្ថាន ក្រុមហ៊ុនបានប្រមូលសំណល់អេឡិចត្រូចនិក បានប្រមាណជាង៧តោនសម្រាប់នាំចេញ តាមរយៈការដាក់ធុងសំណល់ថ្មពិលនៅតាមស្ថានីយ ផ្សារទំនើប និងនៅតាមបុរីមួយចំនួន។ បច្ចុប្បន្នធុងទាំងនេះ មានប្រមាណជាង១២០ធុង ក្នុងនោះ ធុងក្រសួងបរិស្ថានមានជាង៩០ និងធុងក្រុមហ៊ុនមានជាង៣០ ដែលបានដាក់នៅរាជធានីភ្នំពេញ ខេត្តសៀមរាប និងខេត្តព្រះសីហនុ៕