​អាមេរិក៖ សេត​វិមាន​បាន​ឆ្លើយតប​កាលពី​ថ្ងៃ​ចន្ទ​ចំពោះ​ការ​កើន​ឡើង និង​ស្របពេល​មាន​មន្ទិល​កាន់​តែ​ខ្លាំង​ជុំវិញ​ការ​បាញ់​ទម្លាក់​វត្ថុ​ហោះ​ ដែល​គេ​មិន​ស្គាល់​អត្តសញ្ញាណ​ដោយ​និយាយ​ថា គោល​ដៅ​នានា​អាច​ជា​អ្វី​ផ្សេង​ក្រៅពី​យាន​ពាណិជ្ជកម្មចំពោះ​ឧបករណ៍​ចារកម្ម​នានា ខណៈ​ច្រានចោល​ការ​ចោទ​ប្រកាន់​ដែល​ថា ​បា​ឡុង​ចារកម្ម​របស់​សហរដ្ឋ​អាមេរិក​បាន​ហោះ​លើ​ប្រទេស​ចិន​។

​បន្ទាប់ពី​ការ​កើន​ឡើង​សម្ពាធ​លើ​រដ្ឋបាល​របស់​ប្រធានាធិបតី​អាមេរិក​លោក Joe Biden ឲ្យ​បកស្រាយ​ពី​ស្ថាន​ភាព​មិន​ធ្លាប់​ដែល​បាន​មើល​ឃើញ បា​ឡុង​ដែល​ចោទ​ប្រកាន់​ថា​ជា​បា​ឡុង​ចារកម្ម​របស់​ចិន និង​វត្ថុ​ហោះ​អាថ៌កំបាំង​ចំនួន​៣ ដែល​ត្រូវ​បាន​បាញ់​ទម្លាក់​នៅ​ក្នុង​អាមេរិក​ខាងជើង​កាលពី​មួយ​សប្ដាហ៍​មុន ក្រុម​មន្ត្រី​អាមេរិក​ទំនង​ប្រាកដ​ថា​វា​មិន​មែនជា​វត្ថុ​មកពី​ភព​ផ្សេង​នោះ​ទេ​។ អ្នក​នាំ​ពាក្យ​របស់​លោក​ប្រធានាធិបតី Biden លោកស្រី Karine Jean-Pierre បាន​និយាយ​ក្នុង​សន្និសីទ​សារ​ព័ត៌មាន​លម្អិត​ជា​លើកដំបូង​ ចាប់​តាំងពី​ការ​បាញ់​ទម្លាក់​វត្ថុ​មិន​ស្គាល់​អត្តសញ្ញាណ​ចុង​ក្រោយ​កាល​ពី​ថ្ងៃអាទិត្យ​ថា ខ្ញុំ​គ្រាន់តែ​ចង់​ធ្វើ​ឲ្យ​ប្រាកដ​ថា​ យើង​នឹង​ដោះស្រាយ​បញ្ហា​នេះ​ពី​សេត​វិមាន​។

មាន​សំនួរ ​និង​ក្ដីបារម្ភ​ជាច្រើន​អំពី​រឿង​នេះ ប៉ុន្តែ​គ្មាន​ការ​បញ្ជាក់​ណាមួយ​ថា​ វត្ថុ​នោះ​មក​ពី​ភព​ផ្សេង ​ឬ​សកម្មភាព​ក្រៅ​ភព​ទេ​។ ​ទោះ​យ៉ាង​ណា​ក៏ដោយ យើង​នៅតែ​មិនទាន់​ច្បាស់​នៅឡើយ​។ ​យោង​តាម​រដ្ឋាភិបាល​អាមេរិក វត្ថុ​ដំបូង​ក្នុងចំណោម​វត្ថុ​ទាំង​៤ ជា​បា​ឡុង​ទំនើប​ហោះ​ក្នុង​រយៈកម្ពស់​ដ៏​ខ្ពស់ ​ដែល​ត្រូវ​បាន​បាញ់​ទម្លាក់​កាលពី​ថ្ងៃ​ទី​៤ ​ខែ​កុម្ភៈ​នៅ​ក្បែរ​ឆ្នេរសមុទ្រ​នៃ​រដ្ឋ South Carolina គឺជា​ផ្នែក​នៃ​កង​បា​ឡុង​ហោះហើរ​ជា​លក្ខណៈ​សកល ​នៃ​បណ្ដុំ​បា​ឡុង​ចារកម្ម​របស់​ចិន​៕ អត្ថបទ៖ សុខមាន