ចិន៖ ប្រទេសចិនបានលើកឡើងកាលពីថ្ងៃចន្ទថា បាឡុងហោះក្នុងរយៈកម្ពស់ដ៏ខ្ពស់របស់សហរដ្ឋអាមេរិក បានហោះហើរលើដែនអាកាសរបស់ខ្លួនដោយគ្មានការអនុញ្ញាតជាង ១០ដងចាប់តាំងពីដើមឆ្នាំ២០២២ តែទីក្រុងវ៉ាស៊ីនតោនបានច្រានចោលភ្លាមៗ។
ការចោទប្រកាន់របស់ប្រទេសចិនបានធ្វើឲ្យជម្លោះផ្នែកការទូតតានតឹងកាន់តែខ្លាំង ក្រោយយោធាអាមេរិកបានបាញ់ទម្លាក់នូវអ្វីដែលខ្លួនហៅថា ជាបាឡុងចារកម្មរបស់ចិន។ អ្នកនាំពាក្យក្រសួងការបរទេសចិនលោក Wang Wenbin បាននិយាយនៅក្នុងសន្និសីទសារព័ត៌មានប្រចាំថ្ងៃមួយ ក្នុងទីក្រុងប៉េកាំងឆ្លើយតបទៅនឹងសំណួរមួយថា ចាប់តាំងពីឆ្នាំមុន បាឡុងហោះលើរយៈកម្ពស់ដ៏ខ្ពស់ជាច្រើនគ្រឿងរបស់សហរដ្ឋអាមេរិក បានហោះហើរដោយខុសច្បាប់ជាង ១០ដងចូលក្នុងដែនអាកាសរបស់ចិន ដោយគ្មានការអនុញ្ញាតពីមន្ទីរពាក់ព័ន្ធរបស់ចិនឡើយ។
លោក Wang ពុំបានបញ្ជាក់ច្បាស់ពីចេតនារបស់បាឡុងនោះថា តើជាការហោះហើរសម្រាប់សកម្មភាព ឬគោលបំណងចារកម្មឡើយ ហើយក៏ពុំបានផ្ដល់ព័ត៌មានលម្អិតដែរ។ ពេលត្រូវបានសួរថា តើចិនបានឆ្លើយតបបែបណា ចំពោះការលុកលុយចូលដែនអាកាសរបស់ខ្លួន លោក Wang បាននិយាយថា ការឆ្លើយតបរបស់ខ្លួនប្រកបដោយការទទួលខុសត្រូវ និងវិជ្ជាជីវៈ៕ អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
