ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ បានថ្លែងថា ក្នុងមួយឆ្នាំៗ ខេត្តកំពង់ធំ មានសមត្ថភពអាចផលិតស្រូវវស្សា និងស្រូវប្រាំងបានពី ៦០ ទៅ៧០ម៉ឺនតោន ហើយអាចនាំចេញទៅទីផ្សារខាងក្រៅបានប្រមាណ ៥០ម៉ឺនតោន ។

ក្នុងសន្និសីទសារព័ត៌មានស្តីពី លទ្ធផលសម្រេចបានជោគជ័យរយៈពេល ៥ឆ្នាំ របស់ ខេត្តកំពង់ធំ នៅថ្ងៃទី១៤ ខែកុម្ភៈ ឆ្នាំ២០២៣ ឯកឧត្តម ងួន រតនៈ បានមានប្រសាសន៍ថា ខេត្តកំពង់ធំ មានផ្ទៃដី​ដាំ​ស្រូវចំនួនជាង១៥ម៉ឺនហិកតា ទិន្នផលជាមធ្យមទទួលបាន ៤តោន ក្នុងមួយហិកតា ដោយការ​ផលិតស្រូវ អាចបំពេញតាមតម្រូវការស្បៀងបានគ្រប់គ្រាន់ ពុំមានការព្រួយបារម្ភនោះទេ សម្រាប់សន្តិសុខស្បៀង ។

ឯកឧត្តម បានបន្តថា ទោះកាលពីឆ្នាំ២០២២ ខេត្តកំពង់ធំ រងគ្រោះធ្ងន់ធ្ងរដោយសារគ្រោះទឹកជំនន់ គឺមានពលរដ្ឋជាង១ម៉ឺនគ្រួសារ បានរងគ្រោះ ប៉ុន្តែពួកគាត់ទទួលបានការយកចិត្តទុកដាក់​ពី​ប្រមុខរាជរដ្ឋាភិបាល ក្នុងការផ្ដល់ស្រូវពូជ ដើម្បីស្ដារការដាំដុះ ដោយពូជមានគុណភាពដុះល្អ ដែលឆ្នាំនេះ ស្រូវទទួលផលលើពីឆ្នាំកន្លងទៅគួរឲ្យកត់សម្គាល់ គឺមួយហិកតា បានដល់ ៧តោន ហើយតម្លៃស្រូវក៏ល្អ ។

ឯកឧត្តមអភិបាលខេត្ត ទន្ទឹមនឹងការកើនឡើង នៃការផលិតស្រូវនេះ ខេត្តក៏មានការអភិវឌ្ឍនូវហេដ្ឋា​រចនាសម្ព័ន្ធ ដើម្បីគាំទ្រដល់គុណភាពស្រូវ ក្នុងនោះមានការរៀបចំនូវឡសម្ងួត និងពង្រឹងសមត្ថភាព​នៃការសម្ងួតស្រូវ ។

អភិបាលខេត្តកំពង់ធំ ជាមួយនឹងការរីកកចម្រើន នៃវិស័យកសិកម្ម ខេត្តបានសាងសង់ និងជួសជុលប្រព័ន្ធធារាស្ត្រចំនួន ២៦១កន្លែង ក្នុងនោះប្រព័ន្ធធារាសាស្ត្រធំៗចំនួន ៣កន្លែង ដែលអាចស្រោចស្របស្រូវវស្សាជាង ១៣ម៉ឺនហិកតា ស្មើនឹង ៦២ភាគរយ និងស្រូវប្រាំងជាង ២៥ ០០០ហិកតា ស្មើនឹង៦៣ ។ លើសពីនេះ ខេត្តមានប្រភពទឹកសំខាន់ៗ ដូចជាស្ទឹងសែន ស្ទឹងស្ទោង ស្ទឹងតាំងក្រសាំង និងស្ទឹងជីនិត ដែលសរុបផ្ទៃដីរងទឹកភ្លៀងទំហំចំនួន ជាង ២លាន ៨៩ម៉ឺនហិកតា ៕ អត្ថបទ បាន សុខរិទ្ធិ