ភ្នំពេញ៖ អភិបាលរាជធានីភ្នំពេញ បានថ្លែងថា ជប៉ុនជាប្រទេសដែលបានរួមចំណែក​នាំ​សន្តិភាពមកឱ្យកម្ពុជា ជាមួយនឹងការផ្ដល់ជំនួយឥតសំណងយ៉ាងច្រើនសន្ធឹកសន្ធាប់។

នេះបើតាមការបញ្ជាក់របស់ ឯកឧត្តម ឃួង ស្រេង អភិបាលរាជធានីភ្នំពេញ ក្នុងជំនួបសម្ដែងការគួរសមជាមួយនឹងឯកឧត្តម អូអ៊ិណូ អាត់ស៊ូហ្ស៊ី ឯកអគ្គរាជទូតវិសាមញ្ញា និងពេញសមត្ថភាពរបស់ប្រទេសជប៉ុនប្រចាំកម្ពុជា នាព្រឹកថ្ងៃទី១៤ ខែកុម្ភៈ ឆ្នាំ២០២៣ នៅសាលារាជធានីភ្នំពេញ។

ឯកឧត្តម ឃួង ស្រេង បានមានប្រសាសន៍ថា ក្នុងនាមប្រជាពលរដ្ឋកម្ពុជា ពិតជាអរគុណចំពោះ​ប្រទេសជប៉ុន ដែលបានផ្ដល់ជំនួយនានាដល់កម្ពុជា តាមរយៈការមិនឱ្យកម្ពុជាសងបំណុល​ដែលជំពាក់ដោយសង្គ្រាម ជាមួយនឹងការរួមចំណែកស្វែងរកសន្តិភាពឱ្យប្រទេសកម្ពុជាថែមទៀត ទាំងនេះ វាពិតជាបានធ្វើឱ្យទំនាក់ទំនងការទូតនៃប្រទេសទាំងពីរកម្ពុជា-ជប៉ុន កាន់តែមានភាព​រឹងមាំ និងស្អិតរមួតទ្វេឡើង។

ឯកឧត្តម ឃួង ស្រេង បន្តថា ក្រោមជំនួយរបស់ប្រទេសជប៉ុន តាមរយៈចៃកា បានធ្វើឱ្យរាជធានី​ភ្នំពេញអាចកាត់បន្ថយបាននូវការលិចលង់មួយចំណែក។ ប្រជាពលរដ្ឋកម្ពុជាពិតជាពេញចិត្តពេញ​ថ្លើមចំពោះការអភិវឌ្ឍរាជធានីភ្នំពេញ។

បន្ថែមពីនេះទៀត ឯកឧត្តម ឃួង ស្រេង ក៏បានលើកឡើងពីប្រវត្តិសាស្រ្តរបស់កម្ពុជាពិសេសក្នុង​ដំណាក់កាលដែលកម្ពុជាបានធ្លាក់ក្នុងរបប ប៉ុល ពត ដែលធ្វើឱ្យសេដ្ឋកិច្ចប្រទេសកម្ពុជាធ្លាក់​ចុះដល់​ចំណុចសូន្យ។ ប៉ុន្តែក្រោយពី រំដោះប្រទេសជាតិចេញពីរបបនេះ ដោយសម្ដេចតេជោ ហ៊ុន សែន បានធ្វើឱ្យប្រទេសដ៏កំសត់មួយនេះ មានការអភិវឌ្ឍជាបន្តបន្ទាប់ និងបន្តរីកចំរើនមកដល់សព្វថ្ងៃនេះ និងបានធ្វើឱ្យប្រទេសកម្ពុជា មានមុខមានមាត់នៅលើឆាកអន្តរជាតិថែមទៀតផង។

ក្នុងឱកាសនោះ ឯកឧត្តម អូអ៊ិណូ បានមានប្រសាសន៍ថា ប្រទេសជប៉ុន និងកម្ពុជាមានទំនាក់ទំនង​ការទូត​ជាមួយគ្នាប្រមាណ ៧០ ឆ្នាំហើយ។ ​ក្រៅពីទំនាក់ទំនងការទូតល្អជាមួយគ្នា ប្រទេសជប៉ុន​ក៏ជាប្រទេសមួយដែលបានរួមចំណែកនាំមកនូវសន្តិភាពជូនកម្ពុជាផងដែរ។

ឯកឧត្តម អូអ៊ិណូ អាត់ស៊ូហ្ស៊ី បញ្ជាក់ថា ជប៉ុនពិតជារីករាយចំពោះការអភិវឌ្ឍរីកចំរើន​យ៉ាងឆាប់​រហ័ស​របស់រាជធានីភ្នំពេញ បើទោះបីប្រទេសកម្ពុជាធ្លាប់បានធ្លាក់ក្នុងរបបខ្មែរក្រហម​ដល់ចំណុច​សូន្យ​យ៉ាងណាក្តី។ ក្នុងដំណាក់កាលនៃការរីករាលដាលជំងឺកូវីដ-១៩ មិនថានៅកម្ពុជា ឬនៅប្រទេសជប៉ុននោះទេ សេដ្ឋកិច្ចប្រទេសសុទ្ធតែបានធ្លាក់ចុះ។ តែពេលនេះនៅប្រទេសកម្ពុជា ក្រោយពីបើកសេដ្ឋកិច្ចឱ្យដំណើរការជាប្រក្រតីឡើងវិញ សេដ្ឋកិច្ចកម្ពុជាបានងើបឡើងវិញ ក្នុងនោះការវិនិយោគរបស់ជប៉ុននៅកម្ពុជាក៏មានការងើបឡើងវិញជាមួយគ្នានេះផងដែរ។

ឯកឧត្តម បន្តទៀតថា ប្រទេសជប៉ុនបានជួយរាជធានីភ្នំពេញលើការដោះស្រាយបញ្ហាទឹកជំនន់ ដែលគម្រោងនេះទទួលបានជោគជ័យ។ ដោយឡែកសម្រាប់ ​បញ្ហាចរាចរណ៍ ជប៉ុនសន្យាថា នឹងរួមចំណែកដោះស្រាយជាមួយនិងរាជធានីភ្នំពេញធ្វើយ៉ាងណាឱ្យបញ្ហាចរាចរណ៍​អាចដោះ​ស្រាយបាន ហើយស្ថានទូតជប៉ុនប្រចាំនៅកម្ពុជា ចង់បន្តកិច្ចសហការជាមួយ​រាជធានីភ្នំពេញ​ឱ្យកាន់តែល្អប្រសើរថែមទៀត៕ អត្ថបទ ៖ ប្រាក់ វ៉ាន់ដា