ភ្នំពេញ៖ ឯកឧត្តម ទេសរដ្ឋមន្រី្ត អៀង មូលី ប្រធានអាជ្ញាធរជាតិប្រយុទ្ធ នឹងជំងឺអេដស៍ តាមរយៈBTV ព័ត៌មាន នាព្រឹកថ្ងៃទី១៤ ខែកុម្ភៈ បានបញ្ជាក់ថា ទិវា១៤កុម្ភៈ បង្ហាញសេចក្ដី​ស្រឡាញ់ដល់មនុស្សគ្រប់គ្នា តាមរយៈការបង្ការមេរោគអេដស៍​ ក្រោមពាក្យស្លោក "មានតែធ្វើតេស្តរកមេរោគអេដស៍ទេ ​ទើបដឹងពីស្ថានភាពផ្ទុកមេរោគអេដស៍"។

ឯកឧត្តម ទេសរដ្ឋមន្រី្ត អៀង មូលី បានបន្តទៀតថា ថ្ងៃទី១៤ កុម្ភៈ បណ្តាប្រទេសលើពិភពលោក ហៅថា ​ទិវានៃកី្តស្រលាញ់។ ប៉ុន្តែប្រទេសមួយចំនួន ​រៀបចំពិធីនេះ សម្រាប់បង្ហាញសេចកី្តស្រលាញ់​ចំពោះគូរសង្សារ។

ដោយឡែកប្រទេសកម្ពុជា ប្រារព្ធទិវានេះ ដើម្បីបង្ហាញនូវសេចកី្តសេ្នហា មិនមែនតែចំពោះ​សង្សារ​នោះទេ គឺតាំងពីឪពុក ម្តាយ គ្រូបាធ្យាយ បងប្អូនប្រជាពលរដ្ឋ ​រាជរដ្ឋាភិបាល អ្នកគ្រប់គ្រង ថ្នាក់​ដឹកនាំ គឺយើងត្រូវស្រលាញ់ទាំងអស់។ ប៉ុន្តែថ្ងៃនេះ យើងត្រូវបង្ហាញសេចកី្តស្រលាញ់ ចំពោះអ្នកផ្ទុក​មេរោគអេដស៍ ដែលពីដើមមកមានការរើសអើង ប្រកាន់។ ដូច្នេះយើងចង់​ឲ្យ​ប្រជាពលរដ្ឋទាំងអស់ ទទួលស្គាល់ថា អ្នកផ្ទុកមេរោគអេដស៍ ក៏ជាមនុស្សដូចយើងដែរ។

ជាមួយគ្នានោះឯកឧត្តម ទេសរដ្ឋមន្រី្ត អៀង មូលី ក៏បានសុំឲ្យអ្នកស្រលាញ់ភេទដូចគ្នា មានការប្រុង​ប្រយ័ត្ន ហើយយើងក៏មិនមានការរើសអើងនោះទេ។ ព្រោះថាសព្វថ្ងៃនេះ​ យើងមានការព្រួយបារម្ភ ចំពោះអ្នកស្រលាញ់ភេទដូចគ្នា ​ដោយសារអត្រាឆ្លង ​និងផ្ទុកមេរោគអេដស៍ថ្មី មានរហូតដល់​៤%ទៅ៥% នៅពេលដែលអត្រាជាទូទៅ មានតែ០.៥% ទៅ០.៦% នៃអ្នកផ្ទុកមេរោគអេដស៍។ ដូច្នេះអត្រាអ្នកឆ្លង និងផ្ទុកមេរោគអេដស៍ ខ្ពស់ណាស់។

ទន្ទឹមនឹងនោះឯកឧត្តម ទេសរដ្ឋមន្រី្ត សុំអំពាវនាវដល់អ្នកដែលមានដៃគូរច្រើន សុំប្រើស្រោម​អនាម័យ ​និងថ្នាំបង្ការដែលហៅថា​ ប្រឹព (PrEP) ​នាពេលអនាគត នឹងអាចមានថ្នាំចាក់​បង្ការ​មេរោគអេដស៍។

ដូច្នេះសុំឲ្យបងប្អូនប្រជាពលរដ្ឋ ​ដែលស្រលាញ់ភេទដូចគ្នា ចូលរួមបង្ការទប់ស្កាត់ការរីករាលដាល​មេរោគអេដស៍ ​ជំងឺអេដស៍ ​ដើម្បីឈានទៅសម្រេចគោលដៅ៩៥ទីមួយ​ របស់យើង ដែលមានតែ ៨៤%នេះ ឲ្យបាន៩០ ទៅ៩៥% នាឆ្នាំ២០២៥៕ អត្ថបទ រដ្ឋា