ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ បានថ្លែងថា ក្នុងភូមិសាស្ត្រខេត្តមួយនេះ បានបញ្ចប់ការកាត់ឆ្វៀលដីតំបន់៣ ស្ថិតនៅជាប់បឹងទន្លេសាប ជូនប្រជាពលរដ្ឋរួចរាល់ ដែលស្មើនឹងជាង ៣ម៉ឺនហិកតា ​ខណៈអាជ្ញាធរខេត្ត កំពុងរៀបចំស្នើរាជរដ្ឋាភិបាល កាត់ឆ្វៀលតំបន់​ការពារផ្សេងទៀត ជូនប្រជាពលរដ្ឋជាង ៤៦ ០០០គ្រួសារ ។

ក្នុងសន្និសីទសារព័ត៌មានស្តីពី ការសម្រេចបាននូវជោគជ័យរយៈពេល ៥ឆ្នាំ នៃខេត្តកំពង់ធំ នៅថ្ងៃទី១៤ ខែកុម្ភៈ ឆ្នាំ២០២៣ ឯកឧត្តម ងួន រតនៈ មានប្រសាសន៍ថា អន្តរក្រសួង និង​អាជ្ញាធរខេត្ត​បានធ្វើការសម្រួលព្រំប្រទល់ដីតំបន់២ មកតំបន់១ ​ជូនប្រជាពលរដ្ឋចំនួនជាង ១ម៉ឺនគ្រួសារ​ ស្មើនឹងផ្ទៃដីជាង ១៧ ៣០០ហិកតា ។

ឯកឧត្តម បន្តថា បានធ្វើការសម្រួលផ្ទៃដីតំបន់៣ មកជាតំបន់២ ជូនប្រជាពលរដ្ឋចំនួនជាង ៨ពាន់​គ្រួសារ ដែលស្មើនឹងផ្ទៃដីជាង ៣៤ ០០០ហិកតា ​ហើយបានកំណត់តំបន់ព្រំប្រទល់ នៃដែនព្រៃ​លិចទឹក (តំបន់២) នៃបឹងទន្លេសាបក្នុងខេត្តកំពង់ធំ ទំហំជាង ១២ម៉ឺនហិកតា ហើយការងារ​កាត់ឆ្វៀល​ដីតំបន់៣នេះ មិនមែនជាការចែកដីជូនពលរដ្ឋនោះទេ ជាការផ្ដល់សិទ្ធិកាន់កាប់ជាក់ស្ដែង លើដីដែលកំពុងអាស្រ័យផល សម្រាប់ពលរដ្ឋមូលដ្ឋាន ។

អភិបាលខេត្តកំពង់ធំ បានបន្ថែមថា រដ្ឋបាលខេត្តបានស្នើសុំរាជរដ្ឋាភិបាលកាត់ឆ្វៀលដីចេញពី​គម្រប​ព្រៃឈើ២០០២ ​និងដីសហគមន៍ ផ្ទៃដីទំហំជាង​ ១៦ម៉ឺនហិកតា ជូនពលរដ្ឋស្មើនឹងជាង ៤៦ ៥០០គ្រួសារផងដែរ ។

ឯកឧត្តម ងួន រតនៈ បានបញ្ជាក់ថា ដោយឡែកពាក់ព័ន្ធនឹងការបង្ក្រាបបទល្មើសជលផល រដ្ឋបាលខេត្ត​បានរៀបចំទីបញ្ជាការស្រាល និងដាក់ក្រុមការងារប្រចាំការ ដោយសហការជាមួយ​ក្រសួងកសិកម្ម រុក្ខាប្រមាញ់ និងនេសាទ​ ដើម្បីបង្ក្រាបបទល្មើសជលផលនៅលើបឹងទន្លេសាប ក្នុងភូមិសាស្ត្រឃុំផាត់សណ្ដាយ​ ស្រុកកំពង់ស្វាយ ​និងឃុំពាមបាង ស្រុកស្ទោង ៕អត្ថបទ បាន សុខរិទ្ធិ