​អ៊ុយក្រែន៖ ខណៈ​ខួប​នៃ​ការវាយលុក​នៅ​អ៊ុយ​ក្រែ​ន​ជិត​មកដល់ កងកម្លាំង​រុស្ស៊ី​បាន​វាយលុក​ចូល​ទីក្រុង Bakhmut កាលពី​ថ្ងៃ​ចន្ទ ជា​អ្វីដែល​ប្រធាន​អង្គការ​ណា​តូ​លោក Jens Stoltenberg បាន​និយាយ​ថា គឺជា​ការចាប់ផ្តើម​ការ​វាយ​លុក​ថ្មី​ដ៏​សំខាន់ និង​គួរ​ឱ្យ​ព្រួយបារម្ភ​។

ការពិត​គឺ​យើង​បានឃើញ​ការ​ចាប់ផ្តើម​រួចហើយ ហើយ​យើង​អាច​មើលឃើញ​នាពេលនេះ​ជា​អ្វីដែល​រុស្ស៊ី​ធ្វើ ជា​អ្វីដែល​ប្រធានាធិបតី​លោក Putin ធ្វើ​នាពេលនេះ​គឺ​ការ​បញ្ជូនទាហាន​រាប់ពាន់នាក់​បន្ថែមទៀត ដោយ​ទទួល​យក​អត្រា​នៃ​អ្នកស្លាប់ និង​រងរបួស​ខ្ពស់​។ មន្ត្រី​យោធានិយាយថា អ្នកការពារ​អ៊ុយ​ក្រែ​នដែល​បាន​គ្រប់គ្រង​ជាច្រើន​ខែ​មកនេះ បាន​ត្រៀមខ្លួន​សម្រាប់​ការវាយប្រហារ​ថ្មី​មកលើទឹក​ដី​នេះ​។ ទីក្រុង Bakhmut គឺជា​គោលដៅ​ចម្បង​មួយ​សម្រាប់​ប្រធានាធិបតី​រុស្ស៊ីលោក Vladimir Putin ហើយ​ការ​ដណ្តើម​យក​របស់​រុស្ស៊ីនឹង​ផ្តល់​ឱ្យ​នូវ​ទីតាំង​ថ្មី​នៅ​ក្នុង​តំបន់ Donetsk និង​ជា​ជ័យជម្នះ​ដ៏​កម្រ បន្ទាប់ពី​មានការ​បរាជ័យ​ជាច្រើន​ខែ​មកនេះ​។ ការវាយប្រហារ​លើ​ទីក្រុង Bakhmut ត្រូវបាន​ដឹកនាំ​ដោយ​ទាហាន​ស៊ីឈ្នួល​របស់​ក្រុមហ៊ុន Wagner​។ ការ​ទម្លាក់​គ្រាប់បែក​របស់​រុស្ស៊ី​ជាថ្មីបានបណ្តាល​ឱ្យ​ស្ថានភាព​នៅ​ទីក្រុង Bakhmut កាន់តែ​ធ្ងន់ធ្ងរ​។

ការិយាល័យ​សិទ្ធិមនុស្ស​របស់​អង្គការសហប្រជាជាតិបាន​និយាយ​កាលពី​ថ្ងៃ​ចន្ទ​ថា ​ខ្លួន​បាន​កត់ត្រា​ការ​ស្លាប់​ជន​ស៊ីវិល​​ជាង ​៧​ពាន់​នាក់ និង​ជិត ១២,០០០​នាក់​បាន​រង​របួស​ចាប់​តាំងពី​ការ​វាយ​លុក​ថ្ងៃទី​២៤ ខែ​កុម្ភៈ​ឆ្នាំមុន ដែល​ភាគ​ច្រើន​បណ្តាល​មក​ពី​ការ​បាញ់​ផ្លោង និង​មី​ស៊ី​ល និង​ការវាយប្រហារ​តាម​អាកាស ​ប៉ុន្តែ​បាន​ជឿ​ថាតួលេខ​ពិតប្រាកដ​គឺ​ខ្ពស់​ច្រើន​ជាង​នេះ​។ លោក Stoltenberg និយាយ​ថា លោក​ពុំ​មើល​ឃើញ​មាន​សញ្ញា​ណាមួយ​ដែល​បង្ហាញ​ថា លោក Putin កំពុង​រៀបចំខ្លួន​សម្រាប់​សន្តិភាព ឬ​មាន​ឆន្ទៈ​គោរព​ដែន​អធិបតេយ្យភាព​របស់​អ៊ុយ​ក្រែ​ន​នោះ​ទេ​។ អ្វីដែល​យើង​ឃើញ​គឺប្រធានាធិបតី Putin និង​រុស្ស៊ីនៅតែ​ចង់​គ្រប់គ្រង​អ៊ុយ​ក្រែ​ន ដូច្នេះហើយមធ្យោបាយ​តែមួយគត់​ដើម្បី​ធានាបាន​ថា អ៊ុយ​ក្រែ​ន​ទទួល​ជ័យជំនះ​ជា​ប្រទេស​អធិបតេយ្យ គឺ​បន្ត​ផ្តល់​ការគាំទ្រ​ផ្នែក​យោធា​ដល់​អ៊ុយ​ក្រែ​ន​។ លោក Stoltenberg និយាយថា សម្ព័ន្ធ​យោធា​ណា​តូ​ពេលនេះ​កំពុង​ចាប់ផ្តើម​ពិចារណា​បញ្ជូន​យន្តហោះ ​ទៅ​ជួយ​ផ្នែក​ការពារជាតិ​របស់​អ៊ុយ​ក្រែ​ន ដោយ​និយាយថា ជំនួយ​គឺ​ត្រូវការ​ជាបន្ទាន់៕

អត្ថបទ៖ ប៊ុនថន