ត្បូងឃ្មុំ ៖ ឯកឧត្តមបណ្ឌិត ហ៊ុន ម៉ាណែត បានថ្លែងថា សាសនាបានដើរតួនាទីយ៉ាងសំខាន់​ក្នុងការចូល​រួម​បណ្តុះបណ្តាល​អប់រំចិត្តគំនិត និងអាកប្បកិរិយាប្រកបដោយគុណធម៌ សីលធម៌និងសេចក្តីថ្លៃថ្នូរ​ដែលអាច​ផ្តល់ផលដល់បុគ្គលជាអ្នកប្រតិបត្តិផ្ទាល់ ក៏ដូចជាសង្គមជាតិទាំងមូល ដោយនេះគឺជាការចូល​រួមចំណែក​មួយយ៉ាងសំខាន់ក្នុងការកសាងនូវធនធានមនុស្សប្រកបដោយគុណភាព និងគតិបណ្ឌិត​ដើម្បីចូល​រួមក្នុង​ដំណើរការអភិវឌ្ឍប្រទេសឱ្យកាន់តែរីកចម្រើនបន្ថែមទៀតនោះ។ 

 ក្នុងឱកាសអញ្ជើញសម្ពោធឧបដ្ឋានសាលា និងសមិទ្ធផលនានា ក្នុងវត្តគិរីឧត្តមអាដោលនៅខេត្តត្បូងឃ្មុំនៅថ្ងៃទី១៤ ខែកុម្ភៈ ឆ្នាំ២០២៣នេះ ឯកឧត្តម ហ៊ុន ម៉ាណែត បានលើកឡើងទៀតថា សាសនា គឺបានបណ្តុះបណ្តាលមនុស្សឲ្យមានការអប់រំចិត្ត ប្រកបដោយភាពថ្លៃថ្នូ និងសីលធម៌ខ្ពស់។

ក្នុងពិធីនោះដែរ ឯកឧត្តមហ៊ុន ម៉ាណែត ក៏បានអបអរសាទរចំពោះសមិទ្ធផលជាច្រើនដែលកើតមានក្នុងទីអារាម ដែលមានអាយុកាលជាង ១៤០ ឆ្នាំមួយនេះ ហើយក៏បានអរគុណចំពោះពុទ្ធបរិស័ទ្ធជិតឆ្ងាយដែលមាន​សទ្ធាជ្រះ​ថ្លាចូលរួមបន្តកសាងកេរដំណែលពីបុព្វបុរសយើង ជាប្រយោជន៍បន្សល់ទុកឱ្យកូនចៅជំនាន់ក្រោយៗទៀត។ ទាំងនេះពិតជាបានបង្ហាញច្បាស់អំពីការប្រតិបត្តិយ៉ាងខ្ជាប់ខ្ជួននូវវប្បធម៌ចែករំលែក ដែលដូនតារបស់​យើងបានប្រៀនប្រដៅតាំងពីដើមរៀងមក ក្រោមបរិយាកាសនៃកត្តាសុខសន្តិភាព និងសេរីភាពពេញលេញ ព្រមទាំងការបង្កលក្ខណៈគ្រប់បែបយ៉ាងពីសំណាក់អាជ្ញាធរគ្រប់លំដាប់ថ្នាក់ ក្នុងធ្លុងសាមគ្គីភាពជាតិខ្មែរ។ 

ជាមួយគ្នានោះដែរ ឯកឧត្តមបានលើកឡើងទៀតថា ក្នុងចំណោមសមិទ្ធផលជាច្រើនរបស់ សម្តេចតេជោ ហ៊ុន សែន នាយករដ្ឋមន្រ្តី ដែលបានកសាងក្នុងរយៈពេលជាង៤០ឆ្នាំកន្លងមកនេះ កេរដំណែលចម្បងបំផុត គឺការសម្រេចបាននូវសុខសន្តិភាព និងការអភិវឌ្ឍជូនជាតិ និងប្រជាជន ហើយសម្រាប់ពេលបច្ចុប្បន្ន និងបន្តទៅអនាគត សម្តេតេជោ មានមហិច្ឆតា ក្នុងការប្រែក្លាយប្រទេសកម្ពុជា ដែលបច្ចុប្បន្នជាប្រទេស​មានចំណូលមធ្យមកម្រិតទាប ឱ្យក្លាយទៅជាប្រទេសមានចំណូលខ្ពស់នៅឆ្នាំ២០៥០ ដូចទៅនឹងបំណង​ប្រាថ្នារួមរបស់ប្រជាជនកម្ពុជាទាំងអស់ផងដែរ។ ដូច្នេះដរាបណាប្រជាជនកម្ពុជានៅតែគោរពស្រឡាញ់ និងផ្តល់ការទុកចិត្តមកលើគណបក្សប្រជាជនកម្ពុជានោះ សម្តេចតេជោ ព្រមទាំងថ្នាក់ដឹកនាំ និងមន្ត្រីគណបក្ស​គ្រប់ជាន់ថ្នាក់ នឹងនៅតែស្មោះត្រង់ បន្តបម្រើ និងការពារប្រជាពលរដ្ឋ និងប្រទេសជាតិឱ្យបានសុខសាន្ត និងមានការអភិវឌ្ឍរីកចម្រើនទៅមុខជានិច្ចនិរន្តន៍៕ អត្ថបទ ៖ បាន ចក់​