ភ្នំពេញ៖ ក្នុងគោលដៅដោះស្រាយវិវាទការងាររួម កូដកម្ម បាតុកម្ម ដែលកើតឡើងតាមសហគ្រាស គ្រឹះស្ថាននៅតាមបណ្តាខេត្តឲ្យកាន់តែល្អប្រសើរ និងមានប្រសិទ្ធិភាពខ្ពស់បន្ថែមទៀតនោះ ឯកឧត្តមរដ្ឋមន្រ្តីក្រសួងការងារ ​និងបណ្តុះបណ្តាលវិជ្ជាជីវៈ បានណែនាំ និងផ្តល់ជាអនុសាសន៍​សំខាន់ៗ៧​ចំណុច ដល់មន្រ្តីក្រោមឱវាទ ដើម្បីដឹកនាំសម្រាប់ដោះស្រាយករណីទាំងនេះ។

នៅក្នុងពិធីបើកសិក្ខាសាលាស្តីពី គោលការណ៍ណែនាំអំពីដែនកំណត់នៃការដោះស្រាយវិវាទ​ការងារ​រួម នៅព្រឹកថ្ងៃទី១៥ កុម្ភៈ ឆ្នាំ២០២៣នេះ ឯកឧត្តមបណ្ឌិត​ អ៊ិត សំហេង រដ្ឋមន្រ្តីក្រសួង​ការងារ និងបណ្តុះបណ្តាលវិជ្ជាជីវៈ ​បានមានប្រសាសន៍ថា ខណៈពេលដែលបញ្ជាការឯកភាពក្រុម​អធិការកិច្ចការងារសម្រេចបាននូវលទ្ធផលការងារជាច្រើន ឃើញថា នូវបញ្ហាប្រឈមមួយ​ចំនួនដែល​ចាំបាច់​ត្រូវតែយកចិត្តទុកដាក់ ​និងដោះស្រាយឱ្យបានល្អប្រសើរ ជាពិសេសការកំណត់​អំពី​ដែនសមត្ថកិច្ចក្នុងការដោះស្រាយវិវាទការងាររួម កូដកម្ម បាតុកម្ម ដែលកើតឡើងតាម​សហគ្រាស គ្រឹះស្ថាននៅតាមបណ្តាខេត្ត ក៏ដូចជានៅក្នុងរាជធានីភ្នំពេញដែលជាទីប្រជុំជន។ ឯកឧត្តម បានបញ្ជាក់ ចំពោះអនុសាសន៍ទាំង ៧ចំណុចសម្រាប់ឲ្យក្រុមមន្រ្តីបន្តដឹកនាំក្នុងការ​ដោះស្រាយវិវាទការងាររួម មានដូចជា៖ ១.ត្រូវអនុវត្តតាមគោលការណ៍ណែនាំស្តីពី នីតិវិធីនៃការ​ដោះស្រាយ​វិវាទការងាររួម កូដកម្ម និងបាតុកម្ម ឱ្យបានត្រឹមត្រូវប្រកប​ដោយប្រសិទ្ធភាព ប្រសិទ្ធផល និងការទទួលខុសត្រូវ។ ២.ត្រូវមានភាពបុរេសកម្មក្នុងការដោះស្រាយនូវរាល់បញ្ហានៅក្នុងទំនាក់ទំនងវិជ្ជាជីវៈ។ ៣.ត្រូវបន្តអនុវត្តយុទ្ធនាការ “រោងចក្រ សហគ្រាសមួយ ជាសហគមន៍សុខសាន្តមួយ”។ ៤.ត្រូវបន្តដោះស្រាយវិវាទការងារតាមនីតិវិធីដោយឈរលើមូលដ្ឋានច្បាប់ ភាពស្មោះត្រង់ តម្លាភាព មិនលំអៀង និងប្រកបដោយវិជ្ជាជីវៈ។ ៥.ត្រូវអនុវត្តឱ្យបានតឹងរឹងនិងម៉ឺងម៉ាត់នូវរាល់ច្បាប់ និងបទប្បញ្ញត្តិពាក់ព័ន្ធប្រកបដោយយុទ្ធសាស្រ្ត។ ៦. ត្រូវធានាថា រាល់ការអនុវត្តវិធានការនានាត្រូវបានធ្វើការពិចារណាហ្មត់ចត់ដោយផ្អែកលើមូលដ្ឋានគតិយុត្តជាធរមានដើម្បីបម្រើផលប្រយោជន៍រួម សំដៅធានាបានសុខដុមរមនីយកម្មនៃទំនាក់ទំនងវិជ្ជាជីវៈ ដែលជាកត្តាស្នូលក្នុងការទាក់ទាញការវិនិយោគ និងរក្សាការងារជូនបងប្អូនកម្មករនិយោជិត។ និង៧.ត្រូវបន្តចូលរួមអនុវត្តនូវអនុសាសន៍ទាំង១០ចំណុច របស់សម្តេចតេជោ នាយករដ្ឋមន្ត្រី។

នៅក្នុងឱកាសនោះ ឯកឧត្តមរដ្ឋមន្រ្តីសង្កត់ធ្ងន់ថា​ ការអភិវឌ្ឍលក្ខខណ្ឌការងារ និងសុខដុមនីយកម្ម​នៃទំនាក់​ទំនងវិជ្ជាជីវៈ គឺជាអាទិភាពការងារ ​ដែលក្រសួងការងារ ​ត្រូវរួមកម្លាំងគ្នាសម្រេចឱ្យបាន ស្របពេល​ដែលរាជរដ្ឋាភិបាលកាន់តែផ្តោតការយកចិត្តទុកដាក់ តាមរយៈការអនុវត្តគោល​នយោបាយ​ពាណិជ្ជកម្មអន្តរជាតិផ្សាភ្ជាប់នឹងលក្ខខណ្ឌការងារ។

តាមរបាយការណ៍ការងារ​ របស់ឯកឧត្តម ប្រាក់ ​ចាន់ធឿន រដ្ឋលេខាធិការ និងជាប្រធានបញ្ជាការ​ឯកភាពអធិការកិច្ចការងារ បានឲ្យដឹងថា គិតត្រឹមឆ្នាំ២០២២ ក្រសួងការងារ ទទួលបាន​បណ្តឹងពាក់ព័ន្ធ​នឹងវិវាទការងារចំនួនជាង ៩០០ករណី ​ដោយក្នុងនោះ ការ​ដោះស្រាយ​សះជា​មានចំនួនជាង ៥៤០ករណី ស្មើនឹងជិត ៦០%៕អត្ថបទ ឈិត បូរ៉ាវី