ភ្នំពេញ ៖ សាលាដំបូងរាជធានីភ្នំពេញបានសម្រេចផ្តន្ទាទោសក្រុមឧក្រិដ្ឋជនគ្រឿងញៀនចំនួន៨នាក់ ដោយម្នាក់ៗដាក់ពន្ធនាគារពី១២ ទៅ៣០ឆ្នាំ និងមានមនុស្ស៣នាក់ទៀតរួចផុតពីពីការចោទប្រកាន់។

លោក ហុក ពៅ ប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០២៣ បានលើកយកសំណុំរឿងឧក្រិដ្ឋគ្រឿងញៀន ដែលមានជនជាប់ចោទជនជាតិវៀតណាម ថៃ ខ្មែរ ចំនួន១១នាក់ ពាក់ព័ន្ធនឹងការជួញដូរគ្រឿងញៀនជិត៤៥គីឡូក្រាម មកសម្រេចផ្តន្ទាទោសចំនួន៨នាក់ ដោយឱ្យ​ជាប់ពន្ធនាគារក្នុងម្នាក់ៗពី១២ ទៅ ៣០ឆ្នាំ។ ចំណែកឯជនជាប់ចោទចំនួន៣នាក់ទៀត ត្រូវបាន​តុលាការ​សម្រេច​ទម្លាក់ចោលបទចោទប្រកាន់ និងបង្គាប់ឱ្យនៅក្រៅឃុំ ដោយសារតែពុំមានពិរុទ្ធ​ភាពដូច​ការចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀន តាមបញ្ញត្តិមាត្រា៤០ ច្បាប់ស្ដីពីការ​ត្រួតពិនិត្យ​គ្រឿងញៀន។

ក្នុងសំណរឿងនេះចៅក្រមជំនុំជម្រះបានសម្រេចផ្ដន្ទាទោសឈ្មោះ សុខ ទឹង ឈ្មោះ សុខ គន្ធា និងឈ្មោះ យឿន សារ៉ុម ជាជនជាតិខ្មែរ ដាក់ពន្ធនាគារ១២ឆ្នាំ និងពិន័យជាប្រាក់ម្នាក់ៗចំនួន៤០លានរៀល។ ក្រៅពីជនជាប់ចោទទាំង៣ ចៅក្រមជំនុំជម្រះបានសម្រេចផ្ដន្ទាទោស ឈ្មោះ ម៉ុត សុផុន និងឈ្មោះ សេង ឡាទី ជាជនជាតិខ្មែរដាក់ពន្ធនាគារ២៥ឆ្នាំ និងពិន័យជាប្រាក់ ៦០លានរៀល។ ចំពោះជនជាតិថៃ២នាក់ ចៅក្រមជំនុំ​ជម្រះសម្រេចផ្ដន្ទាទោសដាក់ពន្ធនាគារ៣០ឆ្នាំ ពិន័យជាប្រាក់ចំនួន ៨០លានរៀលលើឈ្មោះ WEERAPHAT HUN-GRATHANAPONGSORN និងឈ្មោះ SONGWAT BAU-SRI។ ចៅក្រមជំនុំជម្រះក៏បានសម្រេចផ្ដន្ទាទោសឈ្មោះ LAM HONG PHUNG ជនជាតិវៀតណាម ដាក់ពន្ធនាគារ១២ឆ្នាំ និងពិន័យជាប្រាក់ ចំនួន៤០លានរៀលផងដែរ។ ក្នុងសំណរឿងដដែលនេះមានជនជាតិខ្មែរចំនួន៣នាក់បានរួចផុតពីការចោទប្រកាន់មាន ឈ្មោះ ឆេង ឡាយ ឈ្មោះ ហេង សុគុណ និងឈ្មោះ សិត វិសាល។

គួររំលឹកថា កាលពីថ្ងៃទី១៣ ដល់ថ្ងៃទី១៥ ខែកក្កដា ឆ្នាំ២០២២កន្លងទៅ កម្លាំងជំនាញ.ក១ នៃមន្ទីរប្រឆាំង​គ្រឿង​ញៀន​សហការជាមួយនគរបាលរាជាធានីភ្នំពេញ និងបន្ទាយមានជ័យបានធ្វើការស៊ើបអង្កេត ស្រាវជ្រាវ និងបង្ក្រាបករណីរក្សាទុក ជួញដូរដោយខុសច្បាប់នូវសារធាតុញៀននេះ ដោយឃាត់ខ្លួនជនសង្ស័យ​ប្រុសស្រីជន​ជាតិវៀតណាម ថៃ ខ្មែរ ចំនួន១១នាក់ និងដកហូតសារធាតុញៀនជិត៤៥គីឡូក្រាម នៅទីតាំងចំនួន៥កន្លែងពីគ្នា៕អត្ថបទ៖ កុម្ភៈ