ភ្នំពេញ ៖ ឯកឧត្តមបណ្ឌិត ហ្វ្រាំង វ៉ាល់ធ័រ ឆ្តែនម៉ៃយ័រ (Frank-Walter Steinmeier) ប្រធានាធិបតី នៃ​សាធារណរដ្ឋសហព័ន្ធអាល្លឺម៉ង បានអញ្ជើញទស្សនៈកិច្ចនៅ​សារមន្ទីរ​ឧក្រិដ្ឋកម្ម​ប្រល័យ​ពូជសាសន៍​ទួលស្លែង, នារសៀលថ្ងៃទី១៥ ខែកុម្ភៈ ឆ្នាំ២០២៣នេះ។

​ក្នុងដំណើរទស្សនកិច្ចនេះ លោក សុង ភក្ត្រា ប្រធានផ្នែកបណ្ណសារដ្ឋាន នៃសារមន្ទីរឧក្រិដ្ឋកម្ម​ប្រល័យ​ពូជសាសន៍​ទួលស្លែង (មន្ទីរ ស ២១) បានជម្រាបជូនប្រធានាធិបតី នៃ​សាធារណរដ្ឋ​សហព័ន្ធអាល្លឺម៉ង អំពីប្រវត្តិនៃការ​កើតឡើង​ក្នុងសារមន្ទីរ នាសម័យ ខ្មែរក្រហម ចន្លោះពីឆ្នាំ១៩៧៥ ដល់ឆ្នាំ១៩៧៩ ដែលមានអ្នកជាប់ឃុំឃាំង ចំនួន​ជាង១៨០០០នាក់ នៅក្នុងបរិវេណនេះ ព្រមទាំងរចនាសម្ព័ន្ធ និងបរិវេណនៅជុំវិញទីតាំងនេះ ដែលរហូតមកដល់សព្វថ្ងៃ បានបន្សល់ទុកនូវភស្តុតាង ដូចជានៅអគារ "ក" ជាកន្លែងឃុំឃាំង មាន៣ជាន់ ចែកជា២០បន្ទប់ នៅជាន់ក្រោម មាន១០បន្ទប់ សម្រាប់ឃុំឃាំង និងធ្វើទារុណកម្ម សួររកចម្លើយជនរងគ្រោះពិសេសៗ, ជាន់ទី២ និងទី៣ មាន៥បន្ទប់ធំៗ ក្នុងជាន់នីមួយៗ សម្រាប់អនុវត្តក៍ដូចជាន់ខាងក្រោមដែរ, សព្វថ្ងៃមានភស្តុតាងជាច្រើន ដែលស្ថិតនៅក្នុង​គ្រប់បន្ទប់​ទាំងនេះ បញ្ជាក់ពីអំពើព្រៃផ្សៃ ឃោរឃៅ របស់ ប៉ុល ពត (រួមមានគ្រែ កេសគ្រាប់ ខ្នោះឃ្នាង និងរូបថតជនរងគ្រោះ) និងអគារ "ខ" ដែលមានតាំងជារូបថត របស់ជនរងគ្រោះដែលបានស្លាប់បាត់បង់ជីវិត ជាជនជាតិខ្មែរ និងបរទេស (ក្មេង ចាស់ ប្រុស ស្រី) និងអគារ "គ" ដែលជារចនាសម្ព័ន្ធ បន្ទប់ឃុំឃាំង ដែលមានអ្នកជាប់ឃុំឃាំង រយៈពេលប៉ុន្មានថ្ងៃ ប៉ុន្មានខែ ប៉ុន្មានឆ្នាំ? ជាពិសេសដូចជាករណី លោកអ៊ុ ជុំ ម៉ី ដែលជាអតីតអ្នកជាប់គុក ក្នុងបន្ទប់ឃុំឃាំង នៃមន្ទីរ ស ២១ និងអគារ "ឃ" បង្ហាញពីផ្ទាំងគំនូរពីអតីតភាពរបស់អ្នកជាប់ឃុំ។

ចុងក្រោយឯកឧត្តមបណ្ឌិត ហ្វ្រាំង វ៉ាល់ធ័រ ឆ្តែនម៉ៃយ័រ បន្តមកទស្សនៈកិច្ច​នៅបន្ទប់​តម្កល់អដ្ឋិធាតុ​ជនរងគ្រោះ ដែលស្លាប់ក្នុងរបបខ្មែរក្រហម តាមបែបសាសនា ដើម្បីរក្សាទុកជាភស្តុតាង និងបន្តមក​ស្តូប ​ដែលបង្ហាញ និងចារពីការចងចាំរបស់ប្រជាពលរដ្ឋ រដ្ឋាភិបាល ចំពោះព្រឹត្តិការណ៍​ក្នុងសម័យ​ខ្មែរក្រហម ដែលរៀបចំឡើងនៅទិវា២០ ឧសភា និងការចារដាក់ឈ្មោះនៅលើស្កូបនេះ ដើម្បីឲ្យសាធារណជនទូទៅបានទស្សនា និងអាចស្វែងរក​ឈ្មោះបងប្អូនខ្លួន ដែលជាប់ឃុំឃាំង ក្នុងមន្ទីរ ស ២១នេះ៕ ៖ អត្ថបទ រដ្ឋា