បន្ទាយមានជ័យ៖ ថ្ងៃទី១៥ ខែកុម្ភៈ ឆ្នាំ២០២៣ ឧត្តមសេនីយ៍ត្រី សឹង្ហ ទុំ  មេបញ្ជាការកងពលតូចថ្មើរជើងលេខ៥១ បានចាត់តាំងកម្លាំងអន្តរាគមន៍ ចំនួន៥០នាក់ ដឹកនាំដោយលោកវរសេនីយ៍ត្រី ទូច ណាន មេបញ្ជាការរងវរសេនា​តូច​ថ្មើរជើងលេខ៥១៤ នាំយកអំណោយជាស័ង្កសីរបស់លោក ហ៊ុន ម៉ាណែត និងលោកជំទាវ ចំនួន៤៤៨សន្លឹក ជួយរុះរើជួសជុលផ្ទះជូនប្រជាពលរដ្ឋដែលរងគ្រោះដោយខ្យល់កន្រ្តាក់ ស្ថិតនៅភូមិចំនួន៦ ក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ។

សូមបញ្ជាក់ថា នៅល្ងាចថ្ងៃទី១៤ ខែកុម្ភ: ឆ្នាំ២០២៣ អំឡុងមានភ្លៀងធ្លាក់ និងលាយឡំដោយខ្យល់កន្រ្តាក់ បបានបណ្តាលឲ្យខូចខាតផ្ទះសរុបចំនួន ៣០ខ្នងផ្ទះ និងសម្ភារៈមួយចំនួន។

ដោយមានការយកចិត្តទុកដាក់ពីសំណាក់ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង​នៃ​កងយោធពលខេមរភូមិន្ទ និងជាមេបញ្ជាការកងទ័ពជើងគោក បានផ្តល់អំណោយស័ង្កសី សម្រាប់កងកម្លាំង​កងពលតូចថ្មើរជើងលេខ៥១ ដើម្បីជួយសម្រួលនូវទុក្ខលំបាកនេះ ដោយសហការជាមួយ​អាជ្ញាធរមូលដ្ឋានជួសជុល​ឡើងវិញជូនប្រជាពលរដ្ឋបានស្នាក់នៅឡើងវិញ។

អាជ្ញាធរមូលដ្ឋាន និងប្រជាពលរដ្ឋ បានគោរពថ្លែងអំណរគុណជូនចំពោះ លោកហ៊ុន ម៉ាណែត ដែលតែងតែយកចិត្តទុកដាក់ចំពោះប្រជាពលរដ្ឋជួបការលំបាកគ្រប់ទីកន្លែង៕ អត្ថបទ ៖ ឧត្ដម