​ភ្នំពេញ ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល នាល្ងាចថ្ងៃទី១៥ ខែកុម្ភះ ឆ្នាំ២០២៣នេះ បានបើកកិច្ចប្រជុំ ដើម្បីរៀបចំដំណើរការព្យាបាលជំងឺជូនក្រុមកីឡាករ កីឡាការិនី ដោយឥតគិតថ្លៃ ដែល​ត្រូវ​រៀបចំ​តម្លើង​គ្រែចំនួនពី១០០ ទៅ២០០គ្រែ នៅមនី្ទរពេទ្យជាតិ តេជោសន្តិភាព។

​ជាដំបូងឯកឧត្តមសាស្រាចារ្យ ម៉ម ប៊ុនហេង និងលោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការ និងជា​ប្រធាន​ក្រុមប្រឹក្សាភិបាលនៃមនី្ទរពេទ្យជាតិ តេជោសន្តិភាព រួមនឹង​ថ្នាក់​ដឹកនាំ​ជាន់ខ្ពស់លើវិស័យសុខាភិបាល បាន​ពិនិត្យ​លទ្ធភាព និងរៀបចំ​កន្លែងវះកាត់​ផ្នែកបាក់បែកឆ្អឹង ឲ្យបានឆាប់រហ័ស។ ឥលូវនេះយើងបានចាត់តាំងក្រុមការងារគ្រូពេទ្យជំនាញ ដែលមាន​គ្រូពេទ្យ​មកពីមនី្ទរពេទ្យកាល់ម៉ែត មនី្ទរពេទ្យមិត្តភាពខ្មែរ-សូវៀត មនី្ទរពេទ្យមិត្តភាពកម្ពុជា-ចិន ព្រះកុសុមៈ រួមនិងក្រុមការងារ​គ្រូពេទ្យ​ក្នុងមនី្ទរ​ពេទ្យជាតិ តេជោសន្តិភាព ដើម្បីឲ្យក្លាយជាក្រុម នៅពេល​មាន​ហេតុការណ៍អ្វីកើត គឺយើងមាន​ក្រុមគ្រូពេទ្យ​ជំនាញរួចជាស្រេច ដើម្បីជួយសង្រ្គោះ ហើយផ្នែក​វះកាត់បាក់បែកនេះ នឹងតម្លើងសម្ភារៈបរិក្ខារវេជ្ជសាស្រ្តឲ្យរួចរាល់​ជាស្ថាពរ​ក្នុងរយៈ​ពេល៣សប្តាហ៍​ទៀត។ ទន្ទឹមនឹងនោះឯកឧត្តម សាស្រ្តាចារ្យ ម៉ម ប៊ុនហេង និងរៀបចំ​បញ្ជូន​រថយន្តគ្លីនិកចល័ត សង្រ្គោះ​បន្ទាន់ ដែលជាជំនួយឥតសំណងរបស់សាធារណរដ្ឋប្រជាមានិត ចិន ផ្តល់ជូន​ក្រសួងសុខាភិបាល នៃព្រះរាជាណាចក្រកម្ពុជា នាពេលកន្លងមក(រថយន្តគ្លីនិកចល័តនេះ ត្រូវបាន​បំពាក់ដោយ​សម្ភារៈបរិក្ខារពេទ្យ មានដូចជា៖ ម៉ាស៊ីនកាំរស្មីអ៊ិចឌីជីថល អេកូឌីជីថល ឧបករណ៍វិភាគទឹកនោម ឧបករណ៍​វិភាគឈាម ម៉ូនីទ័រតាមដានគភ៌ទារក និងម្តាយ ជញ្ជីងថ្លឹងទម្ងន់ និងវាស់កម្ពស់ ឧបករណ៍ឆែកមុខងារសួត ឧបករណ៍វិភាគជីវគីមីដោយស្វ័យប្រវត្តិ (Electrocardiograph, Binocular Handheld Slit Lamp Microscope, General type hanging diagnosis System, Digital Electronic Colposcope) ឧបករណ៍ពិនិត្យសុដន់អ៊ីនហ្រ្វារ៉េដ កញ្ចប់​ឧបករណ៍ផ្នែករោគស្រ្តី កញ្ចប់ឧបករណ៍ផ្នែកវះកាត់ទូទៅ ត្រចៀក ច្រមុះ បំពង់ក កៅអីព្យាបាលធ្មញ ម៉ាស៊ីនខ្យល់កំចាត់មេរោគ មីក្រូទស្សន៍ជីវសាស្រ្ត ឧបករណ៍កំចាត់មេរោគ ទូទឹកកកវេជ្ជសាស្រ្ត) យកមកដាក់ដំណើរការនៅក្នុងមនី្ទរពេទ្យជាតិ តេជោ សន្តិភាព។

​សូមបញ្ជាក់ផងដែរថា នៅថ្ងៃទី១៥ ខែកុម្ភៈ ឆ្នាំ២០២៣នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា បានប្រកាសនៅលើបណ្តាញសង្គមហ្វេសប៊ុក និងតេឡេក្រាមផ្លូវការ ថា ដោយកន្លងមកបងប្អូនកីឡាករ កីឡាការិនីមួយចំនួនបានរងរបួស​ដោយការប្រកួតជាពិសេសកីឡាបាល់ទាត់ និងប្រដាល់។ ក្រោយត្រូវរបួសបងប្អូនជួបការលំបាក ក្នុងការព្យាបាលនៅតាមមន្ទីរពេទ្យរដ្ឋ និងឯកជន ដោយរាប់ទាំងការលំបាកលើថវិកា លើការព្យាបាលផង ដែលជាញឹកញាប់សម្តេចកិត្តិព្រឹទ្ធបណ្ឌិត និងសម្ដេចតេជោ ផ្ទាល់ បានផ្តល់នូវការឧបត្ថម្ភសម្រាប់ការព្យាបាល ជូនចំពោះកីឡាករប្រដាល់មួយចំនួនផងដែរ។ សម្ដេចតេជោ បានថ្លែងថា ដោយមើលឃើញនូវការលំបាកបែបនេះ នៅព្រឹកនេះ សម្ដេចតេជោ បានពិភាក្សាជាមួយ​ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្ដីក្រសួងសុខាភិបាល និង​លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជាប្រធានក្រុមប្រឹក្សា​ភិបាល​នៃមនី្ទរពេទ្យជាតិ តេជោសន្តិភាព ដើម្បីរៀបចំទីកន្លែង​សម្រាប់​ព្យាបាលកីឡាករ កីឡាការិនី នៅមន្ទីរពេទ្យជាតិ តេជោសន្តិភាព ដែលសម្ដេចបានបញ្ជាឱ្យរៀបចំ គ្រែពី១០០ ទៅ២០០គ្រែ។

សម្ដេចតេជោ បានថ្លែងបញ្ជាក់ទៀតថា ការព្យាបាលមិនតម្រូវឱ្យមានការបង់ប្រាក់ និងត្រូវមានឯកទេស​គ្រប់គ្រាន់ស្របតាមស្ថានភាពរបួសរបស់ កីឡាករ កីឡាការិនី។

សម្ដេចតេជោបានបញ្ជាឱ្យ ក្រសួងសុខាភិបាលរៀបចំឱ្យបានឆាប់រហ័ស ដែលនិងអាច​ចូលរួមផងដែរ ដល់ការ​ប្រកួតស៊ីហ្គេមនាពេលខាងមុខ។ សម្ដេចតេជោ ក៏សូមឲ្យកីឡាករ កីឡាការិនីទទួល​យកនូវសេវាព្យាបាល​នៅមន្ទីរពេទ្យនេះដោយការពេញចិត្ត៕ អត្ថបទ ៖ រដ្ឋា​