ភ្នំពេញ ៖ នាព្រឹកថ្ងៃទី១៦ ខែកុម្ភៈ ឆ្នាំ២០២៣ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផល​ការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹងជញ្ជូន។

ពិធីបិទសន្និបាត របស់ក្រសួងសាធារណការ នាពេលនេះ ប្រារព្ធ​ធ្វើឡើងនៅទីស្ដីការក្រសួង ហើយអង្គសន្និបាតត្រូវបានប្រាព្ធឡើងក្នុងគោលបំណងចម្បងដើម្បីត្រួតពិនិត្យ និងវាយតម្លៃលើ​ស្នាដៃ និងលទ្ធផលការងារ ដែលថ្នាក់ដឹកនាំ មន្ត្រីរាជការ និងបុគ្គលិកគ្រប់លំដាប់ថ្នាក់ ក្រោមឱវាទ​ក្រសួង បានអនុវត្តរយៈពេលមួយឆ្នាំ២០២២ កន្លងទៅ និងលើកទិសដៅការងារសម្រាប់​អនុវត្តបន្ត​ក្នុង​ឆ្នាំ២០២៣ នេះ ជាមួយនឹងទិសស្លោក «បន្តលើកកម្ពស់គុណភាព នៃការកសាងហេដ្ឋា​រចនាសម្ព័ន្ធ និងប្រព័ន្ធដឹកជញ្ជូន ប្រកបដោយប្រសិទ្ធភាព ចីរភាព បរិយាប័ន្ន និងការអភិវឌ្ឍធនធានមនុស្ស»។