ភ្នំពេញ៖ ឯកឧត្ដមទេសរដ្ឋមន្រ្ដី ស៊ុន ចាន់ថុល បានឱ្យដឹងថា ឆ្នាំ២០២២នេះ កំពង់ផែស្វយ័តក្រុងព្រះសីហនុ បាននិងកំពុងអភិវឌ្ឍ និងធ្វើទំនើបកម្មចំណត កុងតឺន័រថ្មី តាមរយៈការសិក្សាជាមួយ JICA ដើម្បីប្រែក្លាយជាកំពង់ផែក្នុងតំបន់ដ៏មានសក្តានុពល ក្នុងការគាំទ្រដល់កំណើនសេដ្ឋកិច្ចជាតិ និងកាត់បន្ថយភាពក្រីក្រ ដែលបច្ចុប្បន្នបាន។

ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹងជញ្ជូន ថ្លែងនាព្រឹក​ថ្ងៃទី១៦ ខែកុម្ភៈ ឆ្នាំ២០២៣ ក្នុងពិធីបិទសន្និបាតបូកសរុបលទ្ធផល​ការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់ក្រសួងសាធារណការ និងដឹកជញ្ជូន ក្រោមអធិបតីភាព​ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ។

ទេសរដ្ឋមន្ដ្រី ស៊ុន ចាន់ថុល បានឱ្យដឹងទៀតថា កំពុងស្ថិតក្នុងនីតិវិធីដេញថ្លៃជ្រើសរើសក្រុមហ៊ុន​សាងសង់ និង បាននិងកំពុងសិក្សា សមិទ្ធលទ្ធភាពសាងសង់ផែកុងតឺន័រ ជំហានទី២ និងជំហានទី៣ ក្នុងនោះ ជំហានទី២ ប្រវែង ៤១០ ម៉ែត្រ ជម្រៅទឹក ១៦,៥ម៉ែត្រ (២០២៥-២០២៨) និងជំហានទី៣ ប្រវែង ៤៤០ម ជម្រៅទឹក ១៧,៥ម (២០២៦-២០២៩។

ឯកឧត្ដមទេសរដ្ឋមន្រ្ដី ស៊ុន ចាន់ថុល បានឱ្យដឹងបន្ដថា នៅក្នុងឆ្នាំ២០២២កន្លងទៅ ប្រព័ន្ធនេះ​បានជួយ​ជំរុញ​ការ​ចុះបញ្ជីធ្វើប្រតិបត្តិការរបស់នាវា ដែលមានការកើនឡើងរហូតដល់​ចំនួន ៣.៩៤៦គ្រឿង បានបញ្ចប់ការសាងសង់ និងសម្ពោធបើកឱ្យប្រើប្រាស់ជាផ្លូវការកំពង់ផែ​ទេសចរណ៍កែប- កោះទន្សាយ ខេត្តកែប បានបញ្ចប់ការសាងសង់កំពង់ផែទេសចរណ៍ខេត្តកំពត ដោយបច្ចុប្បន្នក្រសួង​សេដ្ឋកិច្ច និងហិរញ្ញវត្ថុ ក្រសួងទេសចរណ៍ និងក្រសួងសាធារណការ​និងដឹកជញ្ជូន កំពុងរៀបចំឯកសារ ជ្រើសរើសក្រុមហ៊ុនឯកជនឱ្យដាក់​ឱ្យដំណើរការ គ្រប់គ្រង និងថែទាំកំពង់ផែ ឱ្យក្លាយជា កំពង់ផែទេសចរណ៍អន្តរជាតិ បាននិងកំពុងរៀបចំ​សេចក្តីព្រាងច្បាប់​ស្តីពីការដឹកជញ្ជូនផ្លូវទឹក និងកំពង់ផែ រួមនឹងសេចក្តីព្រាង ឯកសារគតិយុត្តសំខាន់ៗផ្សេងទៀត ហើយគ្រោងដាក់ស្នើសុំការអនុម័តពីរាជរដ្ឋាភិបាល នាពេលខាងមុខនេះ៕