ភ្នំពេញ៖ ឯកឧត្ដមឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ បានជំរុញដល់ក្រសួងសាធារណការ និងដឹកជញ្ជូន យកចិត្តទុកដាក់ពន្លឿននីតិវិធី ក្នុងការអនុវត្តគម្រោងហេដ្ឋារចនាសម្ព័ន្ធរូបវន្តសំខាន់ៗ ដែលត្រូវបានចុះហត្ថលេខាជាផ្លូវការរួចហើយ លើកម្ចីសម្បទានជាមួយភាគីមិត្ត, ជាពិសេស គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ, ជ្រោយចង្វារ-អរិយក្សត្រ) ដែលត្រូវបានចុះហត្ថលេខា កាលពីថ្ងៃទី ៩ ខែធ្នូ ឆ្នាំ ២០២២ ក្រោមអធិបតីភាពដ៏ខ្ពង់ខ្ពស់ របស់ សម្តេចតេជោ នាយករដ្ឋមន្រ្តី ។

ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ថ្លែងនាព្រឹកថ្ងៃទី១៦ ខែកុម្ភៈ ឆ្នាំ២០២៣ ក្នុងឱកាសអញ្ជើញជាអធិបតីក្នុងពិធីបិទសន្និបាតបូកសរុបលទ្ធផល​ការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់ក្រសួងសាធារណការ និងដឹកជញ្ជូន ។

ក្នុងឱកាសនោះដែរ ឯកឧត្ដមឧបនាយករដ្ឋមន្រ្តី បានសម្ដែងការអបអរសាទរ និងបង្ហាញការមោទកភាព ចំពោះវឌ្ឍនភាព និងសមិទ្ធផលនានា ក្នុងវិស័យសាធារណការ និង ដឹកជញ្ជូន និង សូមសម្តែងនូវការកោតសរសើរ និង វាយតម្លៃខ្ពស់ ចំពោះកិច្ចខិតខំប្រឹងប្រែង របស់ ឯកឧត្ដមទេសរដ្ឋមន្ត្រី ស៊ុន ចាន់ថុល, ព្រមទាំងឯកឧត្តម, លោកជំទាវ ជាថ្នាក់ដឹកនាំ និង មន្រ្តីរាជការគ្រប់លំដាប់ថ្នាក់នៃក្រសួងសាធារណការ និង ដឹកជញ្ជូន ដែលបានខិតខំបំពេញ តួនាទី និង ភារកិច្ចរបស់ខ្លួន ប្រកបដោយប្រសិទ្ធភាព និង ការទទួលខុសត្រូវខ្ពស់ ។

ឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ បានថ្លែងថា ការគ្រប់គ្រងបានយ៉ាងល្អប្រសើរនូវស្ថានការណ៍នៃជំងឺកូវីដ-១៩ ក្នុងរយៈពេលជាងបីឆ្នាំកន្លងទៅ គឺជាបទពិសោធដ៏មានតម្លៃមិនអាចកាត់ថ្លៃបាន របស់រាជរដ្ឋាភិបាលកម្ពុជា ក្រោម ការដឹកនាំប្រកបដោយភាពឈ្លាសវៃ, ភាពប្រាកដនិយមខ្ពស់ និង ចក្ខុវិស័យវែងឆ្ងាយ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានយល់ច្បាស់អំពីសភាពការណ៍ និង បានត្រៀមខ្លួនជាស្រេចយ៉ាងល្អប្រសើរ ដើម្បីឆ្លើយតបទៅនឹងវិបត្តិនៃសុខមាលភាពសាធារណៈជាសាកលនេះ ប្រកបដោយប្រសិទ្ធភាពខ្ពស់, ជាពិសេស បានប្រែក្លាយគ្រាលំបាកនៃវិបត្តិកូវីដ-១៩ ទៅជាកាលានុវត្តភាពសម្រាប់ការអភិវឌ្ឍវិស័យសាធារណការ និង ដឹកជញ្ជូន, ទាំងផ្នែករឹង និង ផ្នែកទន់ ។

ឯកឧត្ដមឧបនាយករដ្ឋមន្រ្តី បានបន្ថែមថា នៅលើការអភិវឌ្ឍហេដ្ឋារចនាសម្ព័ន្ធផ្នែករឹង, រាជរដ្ឋាភិបាលបានបញ្ចប់ការសាងសង់ និង សម្ពោធដាក់ឱ្យប្រើប្រាស់ជាផ្លូវការ នូវហេដ្ឋារចនា​សម្ព័ន្ធរូបវន្ត​សំខាន់ៗជាច្រើន ជាអាទិ៍៖ ហេដ្ឋារចនាសម្ព័ន្ធក្នុងក្រុងព្រះសីហនុ និង ក្រុងសៀមរាប; ផ្លូវល្បឿនលឿនភ្នំពេញ-ក្រុងព្រះសីហនុ; ផ្លូវជាតិលេខ ២១; ស្ពានឆ្លងទន្លេមេគង្គក្រូចឆ្មារ-ស្ទឹងត្រង់; ព្រមទាំងស្ពាន និង ច្រកព្រំដែន ជាដើម ។ ទន្ទឹមនេះដែរ, គម្រោងធំៗជាច្រើន ដែលនឹងក្លាយជាកត្តាលីករ ក្នុងការ-ជំរុញការធ្វើពាណិជ្ជកម្ម និង កំណើនសេដ្ឋកិច្ចជារួម ក៏ត្រូវបានបើកការដ្ឋាន និង ចាប់ផ្តើមដំណើការសាងសង់ដោយរលូន រួមមាន៖ ព្រលានយន្តហោះអន្តរជាតិតេជោក្រុងតាខ្មៅ; ព្រលាន យន្តហោះអន្តរជាតិសៀមរាប-អង្គរ; ផ្លូវជាតិលេខ ៤១; ផ្លូវជាតិលេខ ៣១; ផ្លូវជាតិលេខ ៣៣; ផ្លូវជាតិលេខ ៧ (ស្គន់-កំពង់ចាម) និង ស្ពានឆ្លងកាត់ទន្លេមេគង្គខេត្តក្រចេះ ។

ឯកឧត្ដមឧបនាយករដ្ឋមន្រ្តី បានថ្លែងកោតសរសើរ និង វាយតម្លៃខ្ពស់ ចំពោះក្រសួងសារធារណការ និងដឹកជញ្ជូន ដែលលើការបញ្ចប់ការសិក្សាផ្លូវរថភ្លើងក្រោមដីក្នុងភូមិសាស្រ្តរាជធានីភ្នំពេញ; គម្រោងលើកកម្រិតខ្សែផ្លូវដែកល្បឿនលឿនភាគខាងជើង ភ្នំពេញ-ប៉ោយប៉ែត; គម្រោងផ្លូវនាវា​ចរណ៍ និង ប្រព័ន្ធភ័ស្តុភារកម្មទន្លេបាសាក់; ផែនការមេអន្តរកាលស្តីពីការតភ្ជាប់​ប្រព័ន្ធដឹកជញ្ជូន​ពហុមធ្យោ- បាយ និង ភ័ស្តុភារកម្ម; ព្រមទាំងសមិទ្ធផលជាច្រើនទៀត ក្នុងវិស័យហេដ្ឋារចនាសម្ព័ន្ធ​ដឹកជញ្ជូន ។

ឯកឧត្ដមឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ បានថ្លែងថា កត្តាសុខសន្តិភាពពេញលេញ, ស្ថិរភាពម៉ាក្រូសេដ្ឋកិច្ចរឹងមាំ និង ភាព សុខដុមក្នុងសង្គម ក្រោមគោលនយោបាយ និង យុទ្ធសាស្រ្តច្បាស់លាស់ និង មោះមុត របស់រាជរដ្ឋាភិបាលកម្ពុជា, ពិសេស ជោគជ័យដ៏ត្រចះត្រចង់នៃការរៀបចំ និង ភាពជាប្រធាននៃកិច្ចប្រជុំកំពូលអាស៊ាន និង កិច្ចប្រជុំកំពូលពាក់ព័ន្ធ កាលពីឆ្នាំ ២០២២ កន្លងទៅ បាននិងកំពុងធ្វើឱ្យកម្ពុជា កាន់តែមាន​កិត្តិនាមល្បីរន្ទឺ និង ទទួលបាននូវការកោតសរសើរលើឆាកអន្តរជាតិ ៕