ភ្នំពេញ៖ នៅថ្ងៃនេះមនី្ទរពេទ្យជាតិ តេជោសន្តិភាព ប្រកាសផ្តល់សេវាថែទាំសុខភាពជូន​ក្រុម​កីឡាករ កីឡាការិនី និងប្រជាពលរដ្ឋទូទៅ។

បើតាមលោកវេជ្ជបណ្ឌិត សួន សាមិត្ត នាយកមនី្ទរពេទ្យជាតិតេជោសន្តិភាព ប្រាប់BTV ព័ត៌មាន នាព្រឹកថ្ងៃទី១៦ ខែកុម្ភៈ ឆ្នាំ២០២៣នេះថា ដោយយោងតាមការណែនាំដ៏ខ្ពង់ខ្ពស់ជាទីបំផុត​របស់​សម្តេចតេជោ ហ៊ុន សែន នាយករដ្ឋមន្រី្ត ក៏ដូចជាមានការដឹកនាំផ្ទាល់របស់ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល រួមនឹងថ្នាក់ដឹកនាំ បានចុះមករៀបចំកន្លែងសម្រាក​ព្យាបាល​ជំងឺជូនដល់កីឡាករ កីឡាការិនី ​ចំនួន២០០គ្រែ មកដល់ព្រឹកនេះ ក្រុមការងារ​បានរៀបចំ​រួចរាល់ហើយ។ ដោយឡែកសម្រាប់បន្ទប់វះកាត់ មិនទាន់រៀបចំរួចរាល់ជាស្ថាពរ។

ដូច្នេះឯកឧត្តម រដ្ឋមន្រី្តក្រសួងសុខាភិបាល សម្រេចឲ្យយករថយន្តគ្លីនិកចល័ត មកដាក់ក្នុងមនី្ទរ​ពេទ្យជាតិ តេជោសន្តិភាព ចំនួន០៤គ្រឿង ​សម្រាប់ព្យាបាលជំងឺជូនកីឡាករ កីឡាការិនី​បណ្តោះអាសន្ន។ នៅចំពោះមុខនេះ យើងមានធនធានមនុស្ស​ ដែលក្រុមការងារគ្រូពេទ្យជំនាញ ជាង១៥០នាក់ និងមន្រី្តជាប់កិច្ចសន្យាចំនួន៣០០នាក់ទៀត ​ដែលយើងកំពុងជ្រើសរើស។

ជាចុងក្រោយលោកវេជ្ជបណ្ឌិត សួន សាមិត្ត សូមសម្តែងអំណរគុណជូនចំពោះសម្តេចតេជោ នាយករដ្ឋមន្រី្ត ​ដែលជានិច្ចកាលសម្តេចតែងតែ​គិតគូរ​រាល់ការលំបាក ជាពិសេសបញ្ហាសុខភាព​របស់ប្រជាពលរដ្ឋទូទៅ។ ​ដូច្នេះដូចជាថ្ងៃនេះស្រាប់ សម្តេចតេជោ ​បានគិតគូរពីជំងឺឆ្លង ដែល​សម្រេចឲ្យបំពាក់សម្ភារៈបរិក្ខារវេជ្ជសាស្រ្តទំនើប​ និងអ្នកបចេ្ចកទេស ដែលមាន​ឯកឧត្តមរដ្ឋមន្រី្ត​ក្រសួងសុខាភិបាល រួមនឹងក្រុមការងារបច្ចេកទេស ដែលលោកគៀងគរមក ដើម្បីធ្វើយ៉ាងណា​សម្រួលដល់ការព្យាបាលជំងឺជូនប្រជាពលរដ្ឋឲ្យរលូន ​និងកាន់តែប្រសើរ៕អត្ថបទ រដ្ឋា