ភ្នំពេញ៖ ឯកឧត្ដម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានកោតសរសើរ និង​ វាយតម្លៃខ្ពស់ ចំពោះក្រសួងសាធារណការ និង ដឹកជញ្ជូនដែលបាន​បញ្ចប់​ការសិក្សាផ្លូវរថភ្លើងក្រោមដីក្នុងភូមិសាស្រ្តរាជធានីភ្នំពេញ និងគម្រោងលើកកម្រិតខ្សែផ្លូវដែក​ល្បឿនលឿនភាគខាងជើងភ្នំពេញ-ប៉ោយប៉ែត គម្រោងផ្លូវនាវាចរណ៍ រួមនឹងផែនការមេអន្តរកាល​ស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ ​ព្រមទាំងសមិទ្ធផលជាច្រើនទៀត ក្នុងវិស័យ​ហេដ្ឋារចនាសម្ព័ន្ធដឹកជញ្ជូន ។

ឯកឧត្ដម អូន ព័ន្ធមុនីរ័ត្ន បានមានប្រសាសន៍ណែនាំបែបនេះ ក្នុងឱកាស តំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុង ពិធីបិទសន្និបាតបូកសរុបការងារសាធារណការ និងដឹកជញ្ជូន ឆ្នាំ២០២២ និង ទិសដៅការងារ ឆ្នាំ ២០២៣ ទីស្ដីការក្រសួងសាធារណការ និងដឹកជញ្ជូន នៅថ្ងៃទី ១៦ ខែ កុម្ភៈ ឆ្នាំ ២០២៣។

ឯកឧត្ដម ថ្លែងថា ការគ្រប់គ្រងបានយ៉ាងល្អប្រសើរនូវស្ថានការណ៍នៃជំងឺកូវីដ-១៩ ក្នុងរយៈពេល​ជាង ៣ ឆ្នាំកន្លងទៅ គឺជាបទពិសោធដ៏មានតម្លៃមិនអាចកាត់ថ្លៃបាន របស់រាជ​រដ្ឋាភិបាលកម្ពុជា ​ក្រោមការដឹកនាំប្រកបដោយភាពឈ្លាសវៃ, ភាពប្រាកដនិយមខ្ពស់ និងចក្ខុវិស័យវែងឆ្ងាយ​របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី​នៃព្រះរាជាណាចក្រកម្ពុជា ដែលបានយល់ច្បាស់អំពីសភាពការណ៍ និង ​បានត្រៀមខ្លួនជាស្រេច​យ៉ាងល្អប្រសើរ ដើម្បីឆ្លើយ​តប​ទៅនឹងវិបត្តិនៃសុខមាលភាពសាធារណៈជាសាកលនេះប្រកបដោយប្រសិទ្ធភាពខ្ពស់, ជាពិសេស​បានប្រែក្លាយ​គ្រាលំបាកនៃវិបត្តិកូវីដ-១៩ ទៅជាកាលានុវត្តភាពសម្រាប់ការអភិវឌ្ឍវិស័យ​សាធារណការ និងដឹកជញ្ជូន ទាំងផ្នែករឹង និង ផ្នែកទន់។

ឯកឧត្តមបានបញ្ជាក់ថា កត្តាសុខសន្តិភាពពេញលេញ, ស្ថិរភាពម៉ាក្រូសេដ្ឋកិច្ចរឹងមាំ និង ភាព សុខដុម​ក្នុងសង្គម​ ក្រោមគោលនយោបាយ និង យុទ្ធសាស្រ្តច្បាស់លាស់ ​និង មោះមុត របស់​រាជរដ្ឋាភិបាលកម្ពុជា, ពិសេស ជោគជ័យដ៏ត្រចះត្រចង់នៃការរៀបចំ និង ​ភាពជាប្រធាន​នៃ​កិច្ច​ប្រជុំកំពូល​អាស៊ាន និង កិច្ចប្រជុំកំពូល​ពាក់ព័ន្ធ កាលពីឆ្នាំ ២០២២ កន្លងទៅ បាននិងកំពុង ធ្វើ​ឱ្យកម្ពុជា ​កាន់តែមានកិត្តិនាមល្បីរន្ទឺ ​និងទទួលបាននូវការកោតសរសើរលើឆាកអន្តរជាតិ៕អត្ថបទ៖ វ៉ន ដារ៉ា