ឧត្តរមានជ័យ៖ មន្ដ្រីជាន់ខ្ពស់​ក្រសួងបរិស្ថាន ​បានជំរុញឱ្យរដ្ឋបាលខេត្តឧត្តរមានជ័យ ធ្វើយ៉ាងណា​ត្រូវពន្លឿន​ការដោះស្រាយបញ្ហាជំម្លោះដីធ្លីរបស់រដ្ឋ​ក្នុង​ភូមិសាស្រ្តខេត្តរបស់ខ្លួន​ឱ្យ​បានឆាប់រហ័ស​ ដើម្បី​បញ្ចប់​ជម្លោះ​នានា​ឱ្យ​អស់ក្នុងឆ្នាំ២០២៣នេះ​។

ថ្លែងក្នុងកិច្ចប្រជុំស្តីពីការផ្សព្វផ្សាយ​អនុក្រឹត្យ​លេខ ២៤៥ អ.ន.ក្រ ប.ក ចុះថ្ងៃទី៣០ ខែវិច្ឆិកា រឆ្នាំ២០២២ របស់រាជរដ្ឋាភិបាលកម្ពុជា ក្នុងការ​​សម្រួល​ព្រំ​តំបន់​ការពារធម្មជាតិ និង​របៀង​អភិរក្សជីវៈចម្រុះ ដែលមានផលប៉ះពាល់ ​នៅព្រឹកថ្ងៃទី១៦កុម្ភៈ ឆ្នាំ២០២៣នេះ​ ឯកឧត្តម សុខន រិទ្ធីគុណ រដ្ឋលេខាធិការក្រសួងបរិស្ថាន បានជំរុញបន្ថែមដល់​រដ្ឋបាលខេត្តឧត្តរមានជ័យ​ត្រូវធ្វើការ​ផ្សព្វផ្សាយ​តាម​អនុក្រឹត្យ​របស់រាជ​រដ្ឋាភិបាលឱ្យបាន​ទំលំទូលាយជូន​ដល់ពលរដ្ឋ និងស្ថាប័ន​ពាក់ព័ន្ធនានា ក្នុងការបញ្ឈប់​ការ​កាប់​រាលដាល​ទន្ទ្រាន​យក​ដីរដ្ឋធ្វើ​ជា​កម្មសិទ្ធរបស់ខ្លួនបន្តទៀត។

ក្នុងកិច្ចប្រជុំនោះដែរឯកឧត្តម ប៉ែន កុសល្យ ​អភិបាលខេត្តឧត្តរមានជ័យ បានលើកឡើងថា ក្នុង​ភូមិសាស្រ្តខេត្តឧត្តរមានជ័យមាន ដែនជម្រកសហគមន៍ធំៗ៤ទីតាំង គឺដែនជម្រក​សហគមន៍​ទេសភាព​បន្ទាយឆ្នារ​,ដែនជម្រកសហគមន៍សង្ឃរុក្ខាវ័ន្ត, ដែនជម្រកសហគមន៍កូលេនព្រហ្មទេព និងដែនរបៀងអភិរក្សជីវៈចម្រុះ ក្នុងដែនជម្រក​សហគមន៍ទាំង​អស់នោះ​គឺភាគ​ច្រើនតែងតែ​មាន​ផលប៉ះពាល់ជាមួយប្រជាពលរដ្ឋ ។

ឯកឧត្តម ស្នើឱ្យក្រសួងបរិស្ថាន​ត្រូវធ្វើការកំណត់​ព្រំតំបន់​ការពារធម្មជាតិជីវៈ​ចម្រុះ​និង​បែងចែកដែន​សហគមន៍អភិរក្សការពាររបស់ខ្លួនឱ្យ​បានច្បាស់លាស់​ក្នុង​ការ​កាត់​ឆ្វៀល​ដីជូន​ប្រជាពលរដ្ឋដែល​ពុំមានដីអាស្រ័យផលពិតប្រកដ ដើម្បីបញ្ចប់ជម្លោះផ្សេងៗប្រកបដោយកម្លាភាព ​និងប្រសិទ្ធភាព ងាយស្រួលក្នុងការ​ចេញប័ណ្ណកម្មសិទ្ធស្របច្បាស់ជូនដល់ពលដ្ឋផងដែរ។

ជាមួយគ្នានោះដែរ ឯកឧត្តម សុខន រិទ្ធីគុណ មានប្រសាសន៍បន្តថា ​ឆ្នាំ២០២៣​នេះ ​ជាគោលការ​របស់​រាជរដ្ឋាភិបាលកម្ពុជា​ធ្វើយ៉ាង​ណា​ត្រូវពន្លឿន​ការដោះបញ្ហាជម្លោះដីធ្លីរបស់​រដ្ឋ​ជាមួយ​ពលរដ្ឋឱ្យ​បាន​ច្បាស់លាស់​ក្នុង​ការកំណត់ដែន ដើម្បី​សម្រួល​ការ​កាត់​ឆ្វៀលដីជូនពលរដ្ឋក្នុង​ការចេញ​ប័ណ្ណកម្មសិទ្ធ​ស្របច្បាប់​ ឱ្យ​បានឆាប់ចប់​ក្នុងភូមិសាស្រ្តខេត្តឧត្តរមានជ័យ។ កត្តា​ទាំង​អស់នេះ​ហើយ​គឺជាការ​គិតគូរ​យកចិត្តទុកដាក់ខ្ពស់​របស់​រាជរដ្ឋាភិបាលកម្ពុជា​មកលើ​ប្រជាពលរដ្ឋគ្រប់ៗគ្នា ដែលមានបញ្ហាប្រឈម និងផលប៉ះពាល់វិវាទ​ដីធ្លីរបស់រដ្ឋនោះ៕