អឺរ៉ុប៖ តំណាងប្រទេសចំនួន២៧ របស់សហភាពអឺរ៉ុបបានជួបប្រជុំគ្នានៅទីក្រុងព្រុចសែលកាលពីថ្ងៃពុធ ទី១៥ ខែកុម្ភៈ ដើម្បីពិភាក្សាអំពីការដាក់ទណ្ឌកម្មថ្មីលើប្រទេសរុស្ស៊ី ដែលប្រធានប្រតិបត្តិរបស់ប្លុកនេះបាននិយាយថា អាចធ្វើឱ្យខាតបង់ពាណិជ្ជកម្មចំនួន ១១ពាន់លានអឺរ៉ូ ឬ ១១,៨ពាន់លានដុល្លារ។
ប្លុកនេះត្រូវបានគេរំពឹងថានឹងព្រមព្រៀងលើការដាក់ទណ្ឌកម្មថ្មី ដើម្បីកំណត់ខួបមួយឆ្នាំនៃការឈ្លានពានរបស់រុស្ស៊ីលើអ៊ុយក្រែននៅថ្ងៃទី២៤ ខែកុម្ភៈ ប៉ុន្តែសំណើជាក់លាក់នៅពុំទាន់ទទួលបានការគាំទ្រជាឯកច្ឆន្ទ ពីរដ្ឋសមាជិកសហភាពអឺរ៉ុបទាំងអស់នៅឡើយ។ លោកស្រី Ursula von der Leyen ប្រធានគណៈកម្មការអឺរ៉ុបបាននិយាយថា យើងកំពុងធ្វើឱ្យសមត្ថភាពរបស់រុស្ស៊ីចុះខ្សោយ ដើម្បីទប់ស្កាត់ម៉ាស៊ីនសង្គ្រាមរបស់ប្រទេសនេះ។ យើងបានអនុម័តកញ្ចប់ទណ្ឌកម្មចំនួន៩ រួចហើយដែលកំពុងធ្វើឲ្យសេដ្ឋកិច្ចរុស្ស៊ីធ្លាក់ចុះ។ លោកស្រីបានថ្លែងប្រាប់សភាអឺរ៉ុបមុនកិច្ចពិភាក្សា ក្នុងចំណោមបេសកជនប្រទេសទាំង ២៧ នៅទីក្រុងព្រុចសែលថា យើងត្រូវរក្សាសម្ពាធនេះ។
លោកស្រីនិយាយថា យើងកំពុងស្នើឱ្យមានការរឹតត្បិតលើការប្រើប្រាស់ ដូចជាគ្រឿងអេឡិចត្រូនិចមួយចំនួនដែលប្រើប្រាស់ក្នុងប្រព័ន្ធប្រដាប់អាវុធរុស្ស៊ី ដូចជាយានដ្រូន មីស៊ីល និងឧទ្ធម្ភាគចក្រ ដែលកំពុងផ្តោតលើកញ្ចប់ទណ្ឌកម្មទី១០ នៅពេលខាងមុខដែលអាចជាគោលដៅលើប្រទេសអ៊ីរ៉ង់ សម្រាប់ការជួយរុស្ស៊ីនៅក្នុងសង្គ្រាម។ លោកស្រី Von der Leyen បានស្នើដាក់ទណ្ឌកម្មដែលអាចគ្របដណ្តប់លើឆ្មាំបដិវត្តន៍អ៊ីរ៉ង់។ មានយានដ្រូនរាប់រយគ្រឿងផលិតនៅក្នុងប្រទេសអ៊ីរ៉ង់ ដែលរុស្ស៊ីប្រើប្រាស់ក្នុងសមរភូមិនៅប្រទេសអ៊ុយក្រែន។ យានដ្រូនរបស់អ៊ីរ៉ង់ទាំងនេះបានសម្លាប់ជនស៊ីវិលអ៊ុយក្រែន ដូច្នេះជាលើកទី១ ហើយដែលយើងកំពុងស្នើឱ្យដាក់ទណ្ឌកម្មលើប្រតិបត្តិករសេដ្ឋកិច្ចអ៊ីរ៉ង់ រួមទាំងអ្នកដែលពាក់ព័ន្ធទៅនឹងឆ្មាំបដិវត្តន៍៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
