ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ ​និងបណ្តុះបណ្តាលវិជ្ជាជីវៈ នៅ​ព្រឹកថ្ងៃទី១៦ កុម្ភៈ ឆ្នាំ២០២៣នេះ ​បានអនុញ្ញាតឯកអគ្គរាជទូតរដ្ឋទូត នៃប្រទេសចំនួន៤ (ក្រុមប្រទេស Nordic) ​ប្រចំាកម្ពុជា ​ចូលជួបសម្តែងការគួរសម និងពិភាក្សាការងារលើការងារ​មួយចំនួន។

ប្រភពក្រសួងការងារ និងបណ្តុះបណ្តាលវិជ្ជាជីវៈ ​នៅក្រោយចប់ជំនួបនេះ បានឲ្យដឹងថា ឯកអគ្គរាជទូតរដ្ឋទូត ​នៃប្រទេសចំនួន៤ ​ដែលចូលជួបសម្តែងការគួរសម និងពិភាក្សាការងារនេះ រួមមាន ​ឯកឧត្តម Jon Astrom Grondahl ឯកអគ្គរាជទូតស៊ុយអ៊ែតប្រចាំកម្ពុជា ​ថៃ ឡាវ មីយ៉ាន់ម៉ា ជាប្រធានប្រតិភូ, លោកជំទាវ Astrid Emilie Helle ឯកអគ្គរាជទូតណវ៉េប្រចាំកម្ពុជា ​និងថៃ, ឯកឧត្តម Jon Thorgaard ឯកអគ្គរាជទូតដេនម៉ាកប្រចាំកម្ពុជា​ និងថៃ ​និងឯកឧត្តម Jyri Jarviaho ឯកអគ្គរដ្ឋទូតហ្វាំងឡង់ដ៏ប្រចាំកម្ពុជា និងថៃ។

នៅក្នុងជំនួបនេះ ឯកឧត្តមបណ្ឌិត អ៊ិត សំហេង បានជម្រាបជូនភ្ញៀវថា កម្ពុជាបាននិងកំពុង បន្ត​ពង្រឹងការអនុវត្តឱ្យកាន់តែមានប្រសិទ្ធភាព ​និងធ្វើវិសោធនកម្មច្បាប់ស្តីពីការងារ ដើម្បីឆ្លើយតប​ទៅ​នឹងតម្រូវការនៃការធានាបាននូវលក្ខខណ្ឌការងារល្អប្រសើរ និងភាពសុខដុមក្នុងទំនាក់ទំនង​វិជ្ជាជីវៈ។

ពង្រឹងការអនុវត្តច្បាប់ស្តីពីសហជីព ដើម្បីធានានូវសិទ្ធិសេរីភាពអង្គការវិជ្ជាជីវៈ ដែលតំណាង​ឱ្យ​សំឡេង និងឆន្ទៈពិតប្រាកដរបស់កម្មករនិយោជិត និយោជក ក្នុងការការពារសិទ្ធិ និងផល​ប្រយោជន៍​ស្របច្បាប់​របស់គាត់ និងជាដៃគូសន្ទនាដ៏មានប្រសិទ្ធភាពក្នុងកិច្ចសន្ទនាសង្គម កិច្ចព្រម​ព្រៀង​ជាសកល (Global Deal Initiative) ការបន្តអនុវត្តបានយ៉ាងល្អ​នូវយន្តការត្រី​ភាគីក្នុងចរចា និងដោះស្រាយបញ្ហានានាប្រកបដោយជោគជ័យ​ គម្រោងរោងចក្រកាន់តែប្រសើរនៅកម្ពុជា និងការបន្តពង្រឹងយន្តការក្រុមប្រឹក្សាអាជ្ញាកណ្តាលសុទ្ធជាធាតុផ្សំនៃការកសាងជំនឿ​ទុកចិត្តរបស់​អ្នក​វិនិយោគទុនប្រទេសទាំងនេះនៅកម្ពុជា។

ជាការឆ្លើយតប ឯកឧត្តម លោកជំទាវ ឯកអគ្គរាជទូត រដ្ឋទូតទាំងអស់ បានសំដែងនូវកោតសរសើរ និង​វាយតម្លៃខ្ពស់ចំពោះវឌ្ឍនភាពរីកចម្រើនរបស់កម្ពុជាលើគ្រប់វិស័យ ជាពិសេសក្នុងដំណាក់​កាល​នៃការរាតត្បាតជំងឺកូវីដ-១៩ រដ្ឋាភិបាលកម្ពុជា ​បានគ្រប់គ្រងបានយ៉ាងល្អ ដែលអាចជួយ​សង្គ្រោះអាយុជីវិតប្រជាជន ​ហើយឈានទៅបើកដំណើរការសកម្មភាពសេដ្ឋកិច្ច សង្គមឡើងវិញ​ពេញលេញលើគ្រប់វិស័យ។

ទន្ទឹមនឹងនេះ ក៏បានសំដែងនូវការកោតសសើរ ​ចំពោះការវិវត្តន៍រីកចម្រើននៃវិស័យការងារ ដែល​បានយកចិត្តទុកដាក់ខ្ពស់ក្នុងការធ្វើឱ្យប្រសើឡើងនូវកិច្ចសន្ទាសង្គម សិទ្ធិសេរីភាព អង្គការវិជ្ជាជីវៈ សិទ្ធិការងារ កាត់បន្ថយបាននូវិវាទការងារ​ មានយន្តការត្រីភាគីច្បាស់លាស់ដោះស្រាយការងារ​ដោយឯករាជ្យ និងតម្លាភាព។

ក្រសួងការងារ បានបញ្ជាក់ថា ភាគីទាំងពីរ នឹងបន្តរួមគ្នាលើកិច្ចសហប្រតិបត្តិលើគម្រោងផ្សេងទៀត ដែលប្រទេសទាំងនេះ​មានគំរូដ៏ល្អសម្រាប់ចែករំលែកបទពិសោធន៍ សំដៅគាំទ្រក្នុងការធ្វើឱ្យប្រសើរ​ថែម​ទៀតទាំងលើសេវាទីផ្សារការងារ ការកសាងធនធានមនុស្សដែលមានជំនាញវិជ្ជាជីវៈ ជា​កម្លាំងពលកម្មជំនាញ ការធានានូវ​សិទ្ធិសេរីភាពអង្គការវិជ្ជាជីវៈ លក្ខខណ្ឌការងារ និងការ​ប្រយុទ្ធ​ប្រឆាំង​អំពើរជួញដូរមនុស្ស ​ដើម្បីបន្តបង្កើននូវការជឿជាក់ និង​ភាពទាក់​ទាញដល់អ្នក​វិនិយោទុន និងអ្នកប្រើប្រាស់ទំនិញ ​មកលើប្រភពទំនិញពីកម្ពុជា ដែលជាប្រទេសអនុវត្តតាមអនុលោមភាព​នៃ​បទដ្ឋានការងារអន្តរជាតិ៕អត្ថបទ៖ ឈិត បូរ៉ាវី